Kwingila Bu Pania Kuningijanga Kipwano Kyetu Na Leza

“I biyampe kwimba mitendelo kudi Leza wetu.”​—MIT. 147:1.

BIPANGUJO BYA KULANGULUKILA’PO

Le kwingila bu pania kukokeja kuningija kipwano kyobe na Yehova namani?

Shi wi pania, le i bika bibwanya kukukwasha wendelele kwingila uno mwingilo?

Shi pano kudipo pania, le i bika bibwanya kukukwasha ubadilwe mu bapania?

1, 2. (a) Le i bika bibwanya kulupuka ku kulanga ne kwisamba myanda ya muntu otusenswe? (Tala kifwatulo kidi kūlu.) (b) Le i bipangujo’ka byotusa kubandaula?

 KULANGA ne kwisamba myanda ya muntu otusenswe kubwanya kuningija kipwano kyotupwene nandi. Mo mobikadile ne na kipwano kyetu na Yehova Leza. Byaādi mukumbi, Davida wādi upityija kitatyi kilampe bufuku utala madiulu atoywele ñenyenye ne kulangulukila pa Umpangi wao kadi wadingakene nandi. Wāsonekele amba: “Po nañanga madiulu obe, mīngilo ya minwe yobe, ne kweji ne ñenyenye, byo watūdile; lelo muntu nandi i waka, ōlañanga? Kadi mwana muntu ōpempula nandi le i waka?” (Mit. 8:3, 4) Mutumibwa Polo pa kupwa kulangulukila pa mwāfikidile mpango ya Leza pa Isalela wa ku mushipiditu mu muswelo wa kutendelwa, wānene amba: “E! E! E! E! munshi bulamo bwa bupeta bwa ñeni ne kuyūkidija kwa Leza!”​—Loma 11:17-26, 33.

² Potudi mu busapudi, tulañanga ne kwisamba myanda ya Yehova. Kulonga namino kudi na lupusa luyampe. Bavule babwenye kwingila mwingilo wa kitatyi kyonso bamwene’mba, dyese dimo dyobamwenine mu kwingila bininge mwingilo wa Bulopwe i dya kutamija buswe bobaswele Leza. Ekale shi wingilanga pano mwingilo wa kitatyi kyonso nansha kulonga bukomo bwa kufikila pa kino kitungo, wiipangule amba: Le mwingilo wa kitatyi kyonso ubwanya kuningija kipwano kyopwene na Yehova namani? Shi wi pania, wiipangule’mba, ‘le i bika bikankwasha ñendelele kwingila uno mwingilo?’ Shi kwingilangapo bu pania, wiipangule’mba, ‘le i bika byombwanya kulonga mwanda wa nshilule kwibwingila?’ Tubandaulei’ko bidi miswelo ibwanya mwingilo wa kitatyi kyonso kuningija kipwano kyetu na Leza.

 MWINGILO WA KITATYI KYONSO NE KIPWANO KYETU NA LEZA

3. Lelo kwisambila pa madyese a Bulopwe a kumeso kwitukwashanga namani mu mwingilo?

³ Kwisambila na bakwetu pa madyese a Bulopwe a kumeso kwitufwenyanga kudi Yehova. Le i kisonekwa’ka kyosenswe kwingidija mu busapudi bwa ku njibo ne njibo? Padi usenswe Mitōto 37:10, 11; Danyele 2:44; Yoano 5:28, 29; nansha Kusokwelwa 21:3, 4. Kitatyi kyonso kyotwisambila pa ino milao na bakwetu, tuvulukanga amba Leza wetu wa buntu ye mwine upānanga “bintu byonso byakupanwa bilumbuluke, ne byabuntu bibwane.” Kino kitufwenyanga kwadi.​—Yak. 1:17.

4. I kika kinenenwa’mba nsangaji yotusangedile buyampe bwa Leza ivulanga kitatyi kyotumona ngikadilo ya ku mushipiditu ya bulanda idi’mo bakwetu?

⁴ Kumona ngikadilo ya ku mushipiditu ya bulanda idi’mo bantu botusapwila kuvudijanga nsangaji yotusangedile bubinebine. Bantu ba mu ino ntanda kebadipo na buludiki bukulupilwa bwa kwibakwasha bekale na būmi buyampe kadi bwa nsangaji. Bavule bazumbijanga mutyima pa būmi bwa kumeso, kadi kebadipo na lukulupilo. Bakimbanga kwikala na būmi budi na kitungo. Enka ne bantu bavule badi mu bipwilo badi na buyuki butyetye bwa Bisonekwa. Badi pamo bwa bantu ba Nineva wa kala. (Tanga Yona 4:11.) Shi tutambila bininge mu mwingilo, tukamona patōkelela kwishila kudi pa bukata bwa ngikadilo ya ku mushipiditu ya boba botusapwila ne ya bantu ba Yehova. (Is. 65:13) Byobya bitulongela Yehova kupita ne pa kuvuija bisakibwa byetu bya ku mushipiditu bituvulujanga buyampe bwandi; kadi witwita batwe bonso tutūkijibwe mutyima ku mushipiditu ne kwikala na lukulupilo lwa binebine.​—Kus. 22:17.

5. Le kukwasha bakwetu ku mushipiditu kwitukwashanga tumone makambakano etu namani?

⁵ Kukwasha bakwetu ku mushipiditu kwitukwashanga tuleke kulēmenenwa na makambakano etu. Trisha, pania wa lonso, wemwenine uno mwanda kitatyi kyelubwile bambutwile bandi. Unena amba: “Uno wadi mwanda wāndobeje mpata mu būmi bwami.” Difuku dimo paadi na bulanda bininge ne kwimona bu washala kasuku ku njibo, waendele kukefunda Bible na bana basatu badi nabo na makambakano ku njibo. Shabo webanyemene, kadi tutu wabo nandi wibasusula. Trisha unena amba: “Makambakano ne masusu ami onso keadipo adingakene nansha pabwipi pene na abo. Kitatyi kyotwadi twifunda, meso abo adi akela’tu, kadi basepa tusepo twa nsangaji. Bano bana badi bu kyabuntu kya Leza, nakampata mu dino difuku.”

6, 7. (a) Le lwitabijo lwetu lukomejibwanga namani kitatyi kyotufundija bubinebine bwa mu Bible? (b) Kitatyi kyotumona bifundwa bya Bible bilumbulula būmi bwabyo na kwingidija misoñanya ya mu Bisonekwa, le nsangaji yotusangedile tunangu twa Leza ikalanga namani?

⁶ Kufundija bubinebine bwa mu Bible kukomejanga lwitabijo lwetu. Mutumibwa Polo wāsonekēle Bayuda bamo ba mu andi mafuku bākomenwe kwingidija byobādi basapula amba: “Le . . . abe ufundijanga mukwenu, ne kwifundija abe mwine mpika?” (Loma 2:21) Bine, dyalelo bapania kebadipo uno muswelo! Divule dine badi na mikenga mivule ya kufundija bakwabo bubinebine ne kwendeja bifundwa bya Bible. Pa kubwanya kulonga namino, bafwaninwe kuteakanya kifundwa ne kifundwa, ne kulonga padi bukimbi mwa kulondolwela ku bipangujo. Pania umo witwa bu Janeen ushintulula amba: “Kitatyi kyonso kyonadi na mukenga wa kufundija bakwetu bubinebine, muswelo obadi betaba ku buno bubinebine wadi ushala nyeke mu ñeni ne mu mutyima wami. Mfulo mfulō, lwitabijo lwami kelwadipo lujinajina ino lwendelela na kutama.”

⁷ Kumona bifundwa bya Bible bilumbulula būmi bwabyo na kwingidija misoñanya ya mu Bible, kuvudijanga nsangaji yotusangedile tunangu twa Leza. (Is. 48:17, 18) Kino nakyo kitukwashanga tusumininwe kwingidija nyeke ino misoñanya mu būmi bwetu. Adrianna, pania mukwabo, unena amba: “Būmi bwa bantu bubwanya kwikala bwa makambakano shi bakulupile mu tunangu twa abo bene.  Ino, shi abashilula kukulupila mu tunangu twa Yehova, ebiya bashilula kwimwena byabuyabuya.” Mo monka ne Phil nandi unena amba: “Ukamona muswelo ubwanya Yehova kushinta bantu kebādipo na nsangaji kitatyi kyobalonga bukomo bwa kushinta.”

8. Le kingila na balunda bayampe mu mwingilo wa busapudi kwitukwashanga namani?

⁸ Kwingila na balunda bayampe mu mwingilo wa busapudi kwitutamijanga ku mushipiditu. (Nk. 13:20) Bapania bavule bapityijanga kitatyi kivule mu mwingilo na basapudi bakwabo. Kino kibapanga mikenga mivule ya ‘kwikankamika abo bonso.’ (Loma 1:12; tanga Nkindi 27:17.) Pania umo witwa bu Lisa unena amba: “Ku kaji kudi nyeke mushipiditu wa kwitaka ne mukao. Bakubāba difuku ne difuku ne kukunena bibi. Kadi balonga kintu kyo-kyonso mwanda wa kwikala kumeso kwa bakwabo. Kyaba kimo, bakufutulula nansha ku kuzawila mwanda wa mwiendelejo wa bwine Kidishitu. Inoko, kwenda mu mwingilo wa busapudi na banabetu bene Kidishitu kukankamika’po kashā. Ku mfulo kwa difuku, njokelanga ku njibo mutūkijibwe mutyima nansha shi ne mukōke namani.”

9. Le kwingila bu pania na mwinē petu kukokeja kulengeja monji wa mpambo isatu wa busongi wikale namani?

⁹ Kwingila bu pania na mwinē petu kuningijanga monji wa mpambo isatu wa busongi. (Mus. 4:12) Madeline, waingile bu pania pamo na wandi mulume unena amba: “Ami ne wami mulume tupityijanga kitatyi mu kwisambila pa muswelo otwapityija difuku mu busapudi, nansha pa kintu kampanda kyotutanga mu butangi bwetu bwa Bible kyotukokeja kwingidija mu busapudi. Mwaka onso otwingidila pamo bu pania, twifwenanga bininge.” Mo monka ne Trisha nandi unena amba: “Batwe bonso twadi twepuka kwapula mapu, kutyina twa kalwa pa myanda ya lupeto. Tudi na mpangiko imo ya busapudi, o mwanda twendanga mu kujokela’mo ne kwendeja  bifundwa bya Bible bya batwe bonso, bine bitukwashanga twikale na malango ne būmi bwa ku mushipiditu bumo.”

10. Kitatyi kyotutūla Bulopwe bwa Leza pa kifuko kibajinji ne kwimwena bukwashi bwandi, le kukulupila kotukulupile mudi Yehova kwikalanga namani?

¹⁰ Kukulupila kotukulupile mudi Yehova kutamanga kitatyi kyotutūla tumweno twa Bulopwe pa kifuko kibajinji, kyotwimwena bukwashi bwa Yehova, ne kyotumumona ulondolola milombelo yetu. Mo mobikadilanga kyaba kimo ne na bene Kidishitu ba kikōkeji. Inoko, boba badi mu mwingilo wa kitatyi kyonso bamonanga’mba kukulupila mudi Yehova kubwanya kwibakwasha bendelele kwikala bu bapania. (Tanga Mateo 6:30-34.) Curt, wingilanga bu pania ne bu mpingakani wa mutadi wa kipindi, waitabije kwenda mu mansá abidi ne kipindi mwanda wa kukapempula kipwilo kidi kulampe na kwabo. Aye ne wandi mukaji pania, badi’tu na esanshi mibwanine mu motoka wabo ya kukebafikija ku kipwilo, ino yokebabwanyapo kujoka, kadi badi ba kumufuta lupeto pa kupwa kwa yenga umo. Curt unena amba, “nashilwile kwiipangula shi nakwete butyibi buyampe.” Pa kupwa kulombela, bafula kukunena’mba bakavuija mwingilo wabo, na kikulupiji amba Leza ukavuija bisakibwa byabo. Abo’tu ke basa kutaluka, kaka umo webeta ne kwibalombola’mba ngidi na kyabuntu kya kwimupa. Kino kyabuntu kyadi kya lupeto’nka lobadi basakilwa pa kwenda ne kujoka. Curt unena’mba, “kyaba kyowimwena bintu pamo bwa bino kitatyi ne kitatyi, ukapelelwa kumona’mba i Yehova wa kukwasha.”

11. Le i madyese’ka amoamo emwenanga bapania?

¹¹ Bine, bapania bamonanga divule amba kitatyi kyobeelela mu mwingilo wa Yehova ne kulondalonda kipwano kyobapwene nandi, ‘bapetwanga’ na madyese amweka bu keadi mpwilo. (Kup. 28:2) Inoko, mwingilo wa bu pania udi na makambakano ao. I kutupu mwingidi wa Leza nansha umo ushīkilwe ku makambakano alupukile ku butomboki bwa Adama. Nansha bapania bamo byobamonanga amba kebabwanyapo kwendelela na mwingilo wabo mu kitatyi kampanda, divule dine makambakano abwanya kupwa nansha kwepukwa. Le i bika bibwanya kukwasha bapania bendelele kwingila mwingilo wabo?

SHALA NYEKE MU MWINGILO WA KITATYI KYONSO

12, 13. (a) Le pania ufwaninwe kulonga bika shi ukomenwanga kufikila pa nsá itungilwe? (b) Mwanda waka kutūla’ko mpangiko ya kutanga Bible difuku ne difuku, kwifunda pa kasuku ne kulanguluka bidi na mvubu?

¹² Bapania bavule i bavudilwe bya kulonga. Bibwanya kwikala bikomo kulonga bintu byonso, o mwanda kwiteakanya biyampe kudi na mvubu. (1 Kod. 14:33, 40) Shi pania ukomenwanga kufikila pa nsá itungilwe, ufwaninwe padi kubandaula muswelo waingidija kitatyi kyandi. (Ef. 5:15, 16) Ubwanya kwiipangula amba: ‘Le i bitatyi binga byompityijanga mu kwipwija mukose nansha mu byamazua? Lelo nsakilwa kwidingila bya binebine? Lelo mbwanya kujadika mpangiko ya kami kaji?’ Mwine Kidishitu yense uketabija’mba bipēlanga kubwanya bintu ku mpangiko ya muntu; o mwanda boba badi mu mwingilo wa kitatyi kyonso basakilwa kubandaula myanda kitatyi ne kitatyi ne kwiijadika shi bilomba kwiijadika.

¹³ Kutanga Bible difuku ne difuku, kwifunda pa kasuku ne kulanguluka bifwaninwe kubadilwa mu mpangiko ya pania. Mu muswelo umo onka, pania usakilwa kwidingila mwanda wa mingilo yampikwa mvubu yakamudila kitatyi kyaetūdile’ko kya kulonga bintu bya mvubu. (Fid. 1:10) Kimfwa, mumone’po bidi mu ñeni ujokela ku njibo pa kupwa kupityija difuku mu mwingilo. Ukimba kuteakanya ku kyolwa kupwila kulonda’ko. Ino katange bidi dibajinji musapu obamutumine. Kupwa waakija kompyuta, katange ne kulondolola ku musapu. Padi pa Entelenete, watwela pa diteba mwanda wa kutala shi bei ya bintu byakimba kupota ibatūka. Kumeso  kwa kwiisokola, pabapite mansá abidi, ino kashilwile kwifunda myanda yaadi nayo mu ñeni mu kino kyolwa. Mwanda waka uno i mwanda mukatampe? Banyemi ba bwino batanga mutyima ku imbidi yabo shi basaka beje mu mwingilo wabo. Mo monka ne bapania, nabo basakilwa kwikala na kibidiji kiyampe kya kulonga kifundwa kya pa kasuku mwa kutamina ku mushipiditu shi basaka kushala nyeke mu mwingilo wa kitatyi kyonso.​—1 Tem. 4:16.

14, 15. (a) Mwanda waka bapania bafwaninwe kwikala na būmi bupēla? (b) Le i bika bifwaninwe kulonga pania shi watanwa na makambakano?

¹⁴ Bapania bapa bipa biyampe mu mwingilo baloñanga bukomo bwa kwikala nyeke na būmi bupēla. Yesu wākankamikile bandi bana ba bwanga bekale na diso ditūkanye. (Mat. 6:22) Wādi nyeke na būmi bupēla mwanda wa kuvuija mwingilo pampikwa kulabikwa. Wādi na bubinga bwa kunene amba: “Mizeu īdi ne mikembo, ne byoni bya mūlu nabyo bidi ne manswa, ino Mwana wa muntu kadi ne pakusamina mutwe wandi.” (Mat. 8:20) Pa kusaka kuboila ñeni ku kimfwa kya Yesu, i biyampe pania avuluke’mba shi udi na bintu bivule bya ku ngitu, ukakimba kwibilama, kwibilongolola nansha kwibipingakanya.

¹⁵ Bapania bayukile’mba dyese dyabo dya mingilo kedibapelwepo mwanda wa kufwaninwa kobafwaninwe’dyo. Ino, kyabuntu ne dyese dyonso dyotubwanya kwikala nadyo, tudi nadyo pa buntu bwa Leza. Nanshi, pa kwendelela kwingila bu pania, muntu yense ufwaninwe kukulupila mudi Yehova. (Fid. 4:13) Kukalupuka nyeke makambakano ne bikoleja . (Mit. 34:19) Shi bibalupuka, bapania bafwaninwe kukimba buludiki bwa Yehova ne kumupa mukenga wa kwibakwasha, pa kyaba kya kwipangila kuleka mwingilo wabo. (Tanga Mitōto 37:5.) Kitatyi kyobemwena bukwasha bwa buswe bwa Leza, bakamufwena pamo bwa Shabo wa mūlu wa kilelo.​—Is. 41:10.

LE UBWANYA KWIKALA PANIA?

16. Le i bika byofwaninwe kulonga shi usaka kwingila bu pania?

¹⁶ Shi usaka kwimwena madyese emwenanga boba badi mu mwingilo wa kitatyi kyonso, yukija Yehova. (1 Yoa. 5:14, 15) Wisambe na boba bengila kala bu pania. Witungile bityebitye bitungo bya kwikala pania. Kino kyokyalongele ba Keith ne Erika. Badi bengila kitatyi kyonso pamo na mwingidilanga bantu bavule besongele ba yabo myaka, bapotele njibo ne motoka mupya pa kupwa’tu kwa kwisonga. Banena amba: “Twadi tulanga’mba bino bintu biketuletela nsangaji​—ino kebyetulete’yopo.” Kitatyi kyatalwilwe Keith pa kaji, waingile bu pania mukwashi. Uvuluka amba: “Kwingila bu pania kwamvulwije nsangaji idi mu busapudi.” Bapwene na ba mulume ne mukaji bapania bebakweshe bemwene nsangaji idi mu kwikala na būmi bupēla ne mu mwingilo wa bupania. Le ba Keith ne Erika balongele bika? Banena’mba, “twalembele bitungo byetu bya ku mushipiditu, twalamika’byo ku fidigo ne kusamuna pa kitungo ne kitungo shi tubavuija’kyo.” Mu kine kitatyi’kya, babwenye kwingila bu pania.

17. Mwanda waka i biyampe kushinta mpangiko yobe nansha būmi bobe mwanda wa kwingila bu pania?

¹⁷ Le ubwanya kubadilwa mu bapania? Shi pano kubwanyapo, tala muswelo obwanya kwibwingila, longa bukomo bwa kutamija kipwano kyobe na Yehova na kusapula ne pa mfulo. Pa kupwa kwibandaula ne milombelo ponka, ubwanya kumona’mba kushinta bintu bimo mu mpangiko yobe nansha mu būmi bobe kukakulengeja wingile bu pania. Shi ubwanye kwingila bu pania, ukekala na nsangaji mipite ne kwipāna konso kobwanya kwipāna. Ukemwena nsangaji mikatampe itamba ku kutūla tumweno twa Bulopwe kumeso kwa tobe. (Mat. 6:33) Ukemwena nsangaji mikatampe itamba ku kupāna. Kadi, ukela na mikenga mivule ya kulanguluka ne kwisamba myanda ya Yehova, kutamija buswe bomuswele ne kumusangaja.

[Bipangujo bya Kifundwa]

[Kifwatulo pa paje 27]

[Bifwatulo pa paje 29]

Kwingila mwingilo wa kitatyi kyonso kuletanga nsangaji mu būmi (Tala musango 9)