1, 2. (a) Kan hmangaihte chungchâng ngaihtuahna leh sawi chhuahna chuan eng nge a rah chhuah theih? (A thupui bula milem en rawh.) (b) Eng zawhnate nge kan ngaihtuah ang?

KAN hmangaih tak tuemaw chungchâng ngaihtuah a, a chanchin sawi chhuahna chuan amah nêna kan inzawmna chu a tinghet a. Chu chu Pathian Jehova nêna kan inlaichînna chungchângah pawh a dik hle a ni. Berâm vêngtu a nih angin, Davida chuan zâna arsi pêt ûnna vân boruak zau tak chu vawi tam tak thlîrin, tehkhin rual loh chûng thilte Siamtu chungchâng chu a ngaihtuah ngei ang. Heti hian a ziak a ni: “I vân, i kut chhuakte, thla leh arsi i ruathote khi, ka ngaihtuah châng chuan, ‘Mihring hi eng nge maw a niha, i hriat reng ṭhin ni? Mihring fapa pawh hi eng nge maw a niha, i kan ṭhin ni?’ ka ti ṭhîn,” tiin. (Sâm 8:3, 4) Thlarau lam Israelte chunga Jehova thiltum ropui taka a thlen famkim dân a ngaihtuah hnu chuan, tirhkoh Paula chu: “Pathian finna leh hriatna ngahzia chu a va thûk êm!” tiin a au chhuak hial bawk a ni.—Rom 11:17-26, 33.

² Rawngbâwlnaa kan tel hian Jehova chungchâng chu kan ngaihtuahin, kan sawi chhuak a. Chu ringawt pawh chuan rah ṭha a nei a ni. Hunbi kima rawngbâwl thei mi tam takte chuan Lalram rawngbâwlnaa an tel tam an hlâwkpuina kawng khat chu Pathian an hmangaihna a thûk zual hi niin an sawi. Tûnah hunbi kimin rawng i bâwl mêk emaw, chutianga rawngbâwl i tum emaw pawh ni se, hei hi ngaihtuah rawh: Hunbi kima rawngbâwlnain engtin nge Jehova nêna in inlaichînna a tihngheh theih? Pioneer i nih chuan, heti hian inzâwt rawh, Engin nge he rawngbâwlna manhla taka thawk zêl tûrin min ṭanpui ang? Pioneer i la nih loh chuan heiti hian inzâwt rawh, Ka nih theih nân eng ang insiam remna nge ka neih theih? Hunbi kima rawngbâwlnain Pathian nêna kan inlaichînna a tihngheh theih dân kawngte chu i lo ngaihtuah ang u.

3. Rawngbâwlnaah nakina lo thleng tûr Lalram malsâwmnate sawi chhuahna chuan engtin nge min nghawng?

³ Mi dangte nêna nakina lo thleng tûr Lalram malsâwmnate sawihona chuan Jehova min hnaih zualtîr. In tin kalnaah eng Bible châng nge i hman ṭhin? I Bible châng hman duh chu Sâm 37:10, 11; Daniela 2:44; Johana 5:28, 29; a nih loh leh Thu Puan 21:3, 4 a ni em? Hêng thutiamte mi dangte nêna kan sawiho apiangin, kan Pathian thilphal tak chu “thilpêk ṭha leh famkim zawng zawng” min petu a nihzia hriattîr kan ni a. Chu chuan amah min hnaih zualtîr a ni.—Jak. 1:17.

4. Engvângin nge thlarau lama mite pachhiatzia kan hmuh hian Pathian ṭhatna kan ngaihhlutna chu a zual?

⁴ Kan thu hrilhnate thlarau lama pachhiatzia kan hmuhna chuan thutak ngaihhlutna min neih zualtîr. Khawvêl mite chuan hlawhtlinna leh hlimna nei tûrin kaihhruaina rin tlâk an nei lo. A tam zâwkte chuan nakin hun tûr chu lungkhamin, beisei tûr an nei lo. Nun awmzia chu an zawng a. Sakhaw ngaihsak takte pawhin Pathian Lehkha Thu an hre tam meuh lo. Anni chu hmân lai Ninevi khuaa mite ang an ni hlawm a ni. (Jona 4:11 chhiar rawh.) Rawngbâwlnaa kan tel tam hian, kan thu hrilhte thlarau lam dinhmun leh Jehova mite neih thlarau lam dinhmun inthlauh dân chu kan hmu fiah lehzual a. (Is. 65:13) Kan thlarau lam mamawh min pêk bâkah, thlarau lama intihharhna leh beiseina dik tak min pêkna kawnga Jehova ṭhatna chu min hriatnawntîr a ni.—Thup. 22:17.

5. Mi dangte thlarau lama ṭanpuina chuan kan buainate eng anga thlîr tûrin nge min ṭanpui?

⁵ Mi dangte thlarau lama ṭanpuina chuan mahni buaina avânga hrilhhaina pumpelh a tiawlsam zual. Regular pioneer thawk mêk Trisha-i chuan a nu leh pate an inṭhen chuan he thu dikzia hi a tawng a ni. Heti hian a sawi a: “Chu chu ka nuna ka lungngaih lai berte zînga mi a ni,” tiin. Ni khat chu a lungngaih avângin ina awm thawven mai mai a tum a; mahse, in chhûng dinhmun chhe tak kâra awm naupang pathumte chu Bible zirpui tûrin a kal ta tho va. Pa ber chuan anni chu a kalsan a, an upa ber mipa chuan anni chu a tiduhdah bawk a ni. Trisha-i chuan: “Buaina leh lungngaihna ka hmachhawn engpawh chu an dinhmun nêna khaikhin chuan eng tham mah a ni lo. Bible kan zir lai chuan, makti takin an meng a, phûrna leh hlimna avângin an nui ker ker a. Chûng naupangte leh a bîk takin chu mi nî chu ka tân chuan Jehova thilthlâwnpêk a ni tak zet a ni,” tiin a sawi.

6, 7. (a) Bible thutak kan zirtîr hian engtin nge kan rinna tihngheh a nih? (b) Bible thu bulte an nunpui avânga zirlaiin a nun a tihchangkân dân kan hmuh hian, Pathian finna kan ngaihhlutna chu engtin nge a awm?

⁶ Bible thutak zirtîrna chuan kan rinna a tinghet zual. Trihkoh Paula chuan, an thu zirtîr anga awm lo, a hun laia Juda ṭhenkhatte chungchângah: “Nang, mi dangte zirtîrtu, nangmah i inzirtîr lo maw?” tiin a ziak a. (Rom 2:21) Anni chu tûn laia pioneer-te nên chuan an va inang lo tak êm! Anni chuan a tlângpui thuin mi dangte thutak zirtîr a, Bible zirna kaihhruai theihna hun remchâng tam tak an nei a. Hlawhtling taka ti thei tûr chuan, zirna an neih dâwn apiangin an inbuatsaih a, zawhnate chhâng tûrin zir bingna an nei ṭhîn a ni. Pioneer thawk mêk Janeen-i chuan: “Mi dangte thutak zirtîr theihna hun remchâng ka neih apiangin, hêng thutakte hi ka rilru leh ka thinlungah a intuh nghet lehzualin ka hria. Chuvângin, ka rinna chu a ngai reng lo va, a ṭhang chho zêl a ni,” tiin a sawi.

⁷ Bible zirlaite’n Bible thu bulte nunpuia an nun an tichangkâng chho hmuhna chuan Pathian finna ngaihhluhna min neihtîr lehzual. (Is. 48:17, 18) Chu chuan Bible thu bulte nunpui zêl kan tumna chu a tinghet sauh a ni. Pioneer dang, Adrianna-i chuan: “Mite’n mahni finna an rinchhan hian, an nun chu buainain a khat thei a. Mahse, Jehova finna an rinchhan ṭan hian  a hlâwkna chu an hmu ṭan nghâl a ni,” tiin a sawi. Chutiang bawkin, Phil-a chuan: “Mahnia inthlâkthleng tuma hlawhchhamte pawh Jehova’n a thlâkthleng thei tih ka hmu a ni,” tiin a sawi bawk.

8. Engtin nge rawnbâwlnaa ṭhian ṭha nêna thawh dunna chuan min nghawng?

⁸ Rawngbâwlnaa ṭhian ṭha nêna thawh dunna chuan thlarau lamah min tichak zual. (Thuf. 13:20) Pioneer a tam zâwkte chuan rawngbâwlnaah hun tam tak chu chanchin ṭha hriltu dangte nên an hmang a. Hei hian “inthlamuan tawn theihna tûr” hun remchâng tam zâwk a pe a ni. (Rom 1:12; Thufingte 27:17 chhiar rawh.) Pioneer thawk mêk Lisa-i chuan: “Hnathawhna hmunah chuan inelna leh îtsîkna a lang fo va. Nî tin mai hian inrêlna leh ṭawngkam mawihnai lo hlîr kan ngaithla a. Engpawh huama hmasâwn tumna lam hlîr a ni. A châng chuan, Kristian nungchang ṭha avânga sawichhhiat leh nuihzat pawh kan tawng thei. Mahse, kan Kristian unaute nêna rawngbâwlnaa thawh dunna chuan min tichak hle a. Nî a han ral meuh chuan engang pawhin chau mah ila, ka hahdam a ni,” tiin a sawi.

9. Nupaa pioneer thawhna chuan inneihna hrui pathum chungah eng nge a thlen theih?

⁹ Nupaa pioneer thawhna chuan, inneihna hrui pathumte chu a tinghet zual. (Thur. 4:12) A pasal nêna pioneer thawk Madeline-i chuan heti hian a sawi a ni: “Ka pasal nên chuan rawngbâwlnaa hun kan hman dân emaw, Bible kan chhiarna aṭanga rawngbâwlna atâna hman theih tûr thute emaw sawihovin, hun kan hmang thei a. Pioneer kan thawh kumte a liam zêl rualin, kan inhnaih sâwt hle a ni,” tiin. Trisha-i pawh chuan: “Leiba neih loh chu kan tum dûn a, chuvângin sum chungchângah kan inhnial buai ngai lo. Rawngbâwlna hun duan inang kan nei a, chuvângin kan tlawhkîr leh  Bible zirna thiltihah kan inthawhpui zêl a, chu chuan rilru lam leh thlarau lamah ngaihtuahna thuhmun min neihtîr a ni,” tiin a sawi ve bawk.

10. Lalram dah hmasa a, Pathian ṭanpuina kan dawn hian, chu chuan Jehova kan rinna chu engtin nge a nghawng?

¹⁰ Lalram kan dah hmasak a, Jehova ṭanpuina kan dawn bawk a, kan ṭawngṭaina a ngaithla tih kan hmuh hian, Jehova kan rinna chu a zual. Hei hian Kristian zawng zawngte tân pawh dikna chin a nei a. Mahse, hunbi kima rawngbâwlte chuan Jehova chunga innghahnain pioneer thawk zêl tûrin a ṭanpui thei tih an hria a ni. (Matthaia 6:30-34 chhiar rawh.) Pioneer thawk a, bial kantu aiawha kohhran tlawh ṭhîn Curt-a chuan an in aṭanga motor-a dârkâr hnih leh a chanve vêl kal ngai kohhran pakhat tlawh tûra tih chu a pawm a. Pioneer thawk ve bawk a nupui nên chuan an kalna tûr kohhran thlen theihna âwm tâwk petrol an nei a, mahse, haw lehna tûr daih an nei si lo; hlawh lâk nân chawlhkâr khat lai a la ngai bawk si. Curt-a chuan, “Thu tlûkna finthlâk ka siam em le? tiin ka inngaihtuah ṭan a,” tiin a sawi. Pathian hnêna an ṭawngṭai hnuah, Pathianin an mamawh a pe dâwn tih ring tlat chungin chu chanvo chu an pawm ta a. An haw leh dâwn chuan unaunu pakhatin a ko va, thilpêk tûr a neih thu a hrilh a ni. Chuta an sum dawn chu an haw leh nâna an mamawh zât chiah a ni a. Curt-a chuan, “Hetiang thil i tawn zauh zauh chuan, Jehova ṭanpuina a ni tih hmuh hmaih theih a ni lo,” tiin a sawi.

11. Pioneer thawkte malsâwmna dawn ṭhenkhat chu engte nge ni?

¹¹ Ni e, pioneer-te chuan Jehova rawngbâwlnaa an inhman tam a, amah nêna inlaichînna ṭha neih an tum zawh poh leh, tâwp ngai lo tûr anga lang malsâwmnain anni chu “a zui zêl” tih an hria a ni. (Deut. 28:2) Chutichung chuan, pioneer thawhna chuan harsatna a nei tho a ni. Pathian chhiahhlawhte zîngah hian Adama helnain a thlen buaina laka fihlîm an awm si lo. Pioneer ṭhenkhat chuan an rawngbâwlna chu hun engemawti chhûng chawlhsan hrih ngai niin hre mah se, an harsatna chu hmachhawn theih emaw, pumpelh theih emaw a ni fo ṭhîn. Engin nge pioneer-te chu an rawngbâwlna chhunzawm zêl tûrin ṭanpui thei ang?

12, 13. (a) Pioneer-in a dârkâr a hmuh tlin loh chuan eng nge a tih ang? (b) Engvângin nge nî tina Bible chhiarna, mi mala zirna, leh chhût ngunnate chu thil pawimawh tak a nih?

¹² Pioneer a tam zâwkte chuan hun âwl an nei meuh lo va. Thil engkim hi tih vek theih a nih loh avângin, ṭha taka inruahman fel a pawimawh hle. (1 Kor. 14:33, 40) Pioneer-in dârkâr a hmuh tûr zât hmuh harsa a tih chuan, a hun hman dân chu a ennawn a ngai mai thei a ni. (Eph. 5:15, 16) Heti hian a inzâwt thei ang: ‘Intihhlim nân leh thil dang tih nân hun eng zât chiah nge ka hman? Mahni inthunun lehzual ka ngai em? Eizawn nâna ka hnathawh hun chu ka siamrem thei ang em?’ tiin. Kristian tupawhin kan hun duana thil dang belh chu a awlsam hle tih an pawm ngei ang; chuvângin, hunbi kima rawngbâwltute tân he mi chungchânga inennawn ṭhin leh a ṭûl anga insiam ṭhat ṭhin chu a ngai a ni.

¹³ Nî tina Bible chhiar te, mahnia inzirna neih te, chhût ngunna te hi pioneer hun duanah chuan a tel tûr a ni a. Chuvângin, pioneer tân thiltih pawimawh lo zâwkte’n thil pawimawh atâna hun dahte a lâk pên loh nân mahni a inthunun ṭhin a ngai a ni. (Phil. 1:10, NW) Entîr nân, ni lênga rawng a bâwl hnuah chuan pioneer chu inah a lo hawng a. Tlai lam chu inkhâwm atâna inbuatsaih nân hman a tum a ni. Mahse, a mail dawnte chhiar phawt chu a tum a. A computer chu tinungin, a e-mail dawnte chu a chhiar a, a chhâng bawk a. Chutianga Internet a khawih lai chuan, a thil lei duh pakhat man a tlâk hniam leh hnaim loh hre tûrin Web site pakhatah a lût a ni. A inhriat chhuah hmain dârkâr hnih a liam tawh a, chu mi tlaia inkhâwm atâna inbuatsaih a tum chu a la ti lo a  ni. Engvângin nge chu chu buaina a tlin? Infiam mite chuan infiamnaa hun rei tak chhûng tel an duh chuan an taksa an enkawl ṭhat a ngai a. Chutiang bawkin, pioneer-te tân hunbi kima rawngbâwl zêl tûr chuan thlarau lama an intihchak leh theih nân mi mala zirna hun duan ṭha tak an neih a ngai a ni.—1 Tim. 4:16.

14, 15. (a) Engvângin nge pioneer-te chuan an nun an tihsamkhai ang? (b) Pioneer-in harsatna a tawh chuan eng nge a tih ang?

¹⁴ Pioneer hlawhtlingte chuan an nun tihsamkhai chu an tum a. Isua chuan a zirtîrte chu mit fîm nei tûrin a fuih a ni. (Mt. 6:22) Amah ngei pawhin tibuaitu awm lova a rawngbâwlna a hlen theih nân a nun chu a tisamkhai a. Heti hian a sawi thei a ni: “Sihalten kua an nei a, chunglêng savate pawhin bu an nei a, Mihring Fapa erawh hi chuan a lu nghahna a nei lo,” tiin. (Mt. 8:20) Isua entawn tûr siam aṭanga inzir a duh avângin, pioneer chuan bungrua a ngah poh leh a enkawl a, a siam ṭhat a, a nih loh leh a thlâkthleng a ngai dâwn tih a hre reng tûr a ni.

¹⁵ Pioneer-te chuan rawngbâwl theihna chanvo hlu an neih chu anmahni lama thil an tihṭhat avânga nei an ni lo tih an hria a. Chutiang thilpêk emaw, rawngbâwl theihna chanvo emaw kan neih engpawh chu Pathian khawngaihna zâra kan neih a ni. Chuvângin, pioneer anga rawngbâwl zêl thei tûr chuan, Jehova chunga innghah ṭheuh a ngai a ni. (Phil. 4:13) Harsatna leh buainate chu a awm ngei ang. (Sâm 34:19) Chutiang hunah chuan pioneer-te chuan an rawngbâwlna bânsan nghâl mai lovin, Jehova kaihhruaina an zawng ang a, Pathian ṭanpuina an nghâk tûr a ni. (Sâm 37:5 chhiar rawh.) Pathian ṭanpuina duhawm tak an han dawn hian, anmahni ngaihsaktu an Pa chu an hnaih zual sauh vang.—Is. 41:10.

16. Pioneer thawh i duh chuan, eng nge i tih ang?

¹⁶ Hunbi kima rawngbâwltute dawn ang malsâwmnate i dawn duh chuan, chu i châkna chu Jehova hriattîr rawh. (1 Joh. 5:14, 15) Tûna pioneer thawk mêkte chu be rawh. Pioneer ni chho thei tûrin thiltum tênau zâwk insiam rawh. Chu chu Keith-a leh Erika-i tih dân chu a ni. An inneih hnu chuan an rualpui nupa tam takte ang bawkin hunbi kimin hna an thawk a, in pakhat leh motor thar pakhat an nei a ni. Heti hian an sawi: “Hêng thilte kan neih hian, lungawina nei tûrah kan inngai a—mahse, kan nei miah lo,” tiin. Keith-a chu a hnathawhna ata bântîr a nih chuan auxiliary pioneer a thawk a. Heti hian a sawi a ni: “Pioneer thawhna chuan rawngbâwlnain hlimna nasa tak min neihtîr tih min hriattîr a ni,” tiin. Pioneer thawk nupa tuak khat dang nên chuan an inṭhian ta a, anni chuan hlimna chu nun tihsamkhaina leh pioneer thawhna aṭanga neih theih a ni tih hmu tûrin an ṭanpui a ni. Keith-a leh Erika-i chuan eng nge an tih? “Thlarau lama kan thiltum chu ziak chhuakin, kan fridge-ah kan târ a, kan tihhlawhtlin tawhte chu kan thai chhe zêl a ni,” an ti. A hnuah chuan, pioneer an thawk thei ta a ni.

17. Pioneer thawh theih nâna i hun duan leh i nun dân thlâkthleng tum chu engvângin nge a finthlâk?

¹⁷ Pioneer i thawk thei ang em? Tûnah i thawk mai thei lo a nih pawhin i thawh theih dân tûr chu dap la, rawngbâwlnaa tam lehzuala telin Jehova i hnaih zual theih nân theih tâwp chhuah ang che. Ṭawngṭaina nêna i ngaihtuah hnuah, i hun duan siam remna leh i nun dân tlêma thlâkthlengin pioneer i thawk thei ang tih i hre mai thei. Pioneer i thawk thei dâwn a nih chuan i hlimna dawn tûr chuan in inpêkna engpawh chu a khûm var var ang. Mahni duh dân aia Lalram dah hmasakna aṭanga lo awm lungawina i nei lehzual ang a. (Mt. 6:33) Mi dangte i pêkna aṭanga lo awm hlimna chu i nei lehzual bawk ang. Chu bâkah, Jehova chungchâng ngaihtuah nân leh sawi nân hun remchâng tam zâwk i nei ang a, amah i hmangaihna i tizualin, amah i tihlim hle bawk ang. (w13-E 09/15)