1, 2. (a) Ukucabanga ngomuntu esimthandayo kanye lokukhuluma ngaye kungasinceda ngani? (Khangela umfanekiso osekuqaliseni.) (b) Yiphi imibuzo esizayihlola?

 UKUCABANGA ngomuntu esimthandayo kanye lokukhuluma ngaye kungaqinisa ubuhlobo bethu laye. Lokhu kufanana lobuhlobo bethu loJehova, uNkulunkulu. UDavida engumalusi, wayehlala ebuka amazulu agcwele izinkanyezi ebusuku njalo enakana ngoMdali wazo omangalisayo. Wabhala wathi: “Nxa nginakana ngamazulu akho, umsebenzi weminwe yakho, inyanga lezinkanyezi ozibeke endaweni yazo, uyini umuntu osungaze uzihluphe ngaye na, indodana yomuntu ukuthi uyinanze?” (Hubo. 8:3, 4) Umphostoli uPhawuli esebone ukuthi injongo kaJehova mayelana lo-Israyeli ongokomoya yayigcwaliseka ngendlela emangalisayo wababaza wathi: “Yeka ukuzika kwenotho yenhlakanipho kanye lokwazi kukaNkulunkulu!”​—Roma. 11:17-26, 33.

² Nxa sisekutshumayeleni siyabe sicabanga ngoJehova njalo sikhuluma ngaye. Lokhu kukodwa nje kulempumela emihle. Abanengi abenelisa ukungena enkonzweni yesikhathi esigcweleyo sebekubonile ukuthi esinye isibusiso abasithola ngokwengezelela inkonzo yabo ngesokuthi ukuthanda kwabo uNkulunkulu kuyajula. Nxa usenkonzweni yesikhathi esigcweleyo khathesi kumbe nxa ufuna ukungena kuyo, cabanga ngalokhu: Inkonzo yesikhathi esigcweleyo ingabuqinisa njani ubuhlobo bakho loJehova? Nxa uliphayona zibuze, ‘Kuyini okuzanginceda ukuthi ngiqhubeke ngisenkonzweni le elezibusiso ezinengi?’ Nxa ungakaphayoni, zibuze, ‘Kuyini engingakulungisisa ukuze ngiqalise ukwenza njalo?’ Ake sibone izindlela ezimayelana lokuthi inkonzo yesikhathi esigcweleyo ingabuqinisa njani ubuhlobo bethu loNkulunkulu.

3. Ukukhuluma ngezibusiso zoMbuso ezizayo ekutshumayeleni kusinceda ngani?

³ Ukuxoxa labanye ngezibusiso zoMbuso ezizayo kwenza sisondele phansi kukaJehova. Yiwuphi umbhalo othanda ukuwusebenzisa nxa utshumayela endlini ngendlu? Kungenzeka yini ukuthi uthanda ukusebenzisa iHubo 37:10, 11; uDanyeli 2:44; uJohane 5:28, 29; kumbe iSambulo 21:3, 4? Izikhathi zonke nxa sixoxa labanye ngezithembiso ezinjengalezi sikhunjuzwa ukuthi uNkulunkulu wethu ophanayo nguye sibili osipha “zonke izipho ezinhle lezipheleleyo.” Lokhu kusisondeza eduze laye.​—Jak 1:17.

4. Kungani ukuqakathekisa kwethu ubuhle bukaNkulunkulu kujula nxa sibona ukuthi abantu esibatshumayezayo basemnyameni ngokomoya?

⁴ Ukubona ukuthi abantu esibatshumayezayo basemnyameni ngokomoya kujulisa ukuqakathekisa kwethu iqiniso. Abantu emhlabeni abalaso isiqondiso esithembekileyo esingabasiza ukuthi baphumelele njalo bathokoze. Abanengi bayakhathazeka ngekusasa njalo kabalathemba. Bayakudingisisa ukuthi kanti vele siphilelani. Labanengi abahambayo emansontweni balolwazi olulutshwana ngeMibhalo. Bafanana labantu baseNineve yasendulo. (Bala uJona 4:11.) Nxa sisenza okunengi enkonzweni yethu kuyasicacela kakhulu ukuthi ukukhonza kwabantu esibatshumayezayo lokwabantu bakaJehova kwehlukene. (Isa. 65:13) Siyakhunjuzwa ngobuhle bukaJehova obukhanya ngokuthi usinika esikudingayo ekumkhonzeni kwethu, aphinde anxuse abantu bonke ukuthi bazoduduzwa yikuthola ulwazi ngaye kanye lethemba leqiniso.​—Isam. 22:17.

5. Ukunceda abanye ngokubatshela iqiniso kusisiza njani ukuthi singakhulelwa yizinhlupho zethu?

⁵ Ukunceda abanye ngokubatshela iqiniso kwenza kube lula ukuthi singakhulelwa zinhlupho zethu. UTrisha oliphayona lesikhathi sonke wakubona ukuthi kuliqiniso lokhu lapho abazali bakhe bedivosa. Uthi: “Lokhu kwangizwisa ubuhlungu engingakaze ngibuzwe empilweni yami.” Ngelinye ilanga wayengani udanile njalo esizwa kusithi angaphumi endlini, lanxa kunjalo wahamba wayabona abantwana abathathu ayefunda labo iBhayibhili. Abantwana laba babephakathi kobunzima obukhulu. Uyise wayebatshiyile njalo umnewabo omkhulu wayebahlukuluzile. UTrisha uthi: “Loba yiluphi uhlupho kumbe ubuhlungu engangibuzwa babungatsho lutho nxa ngikhangela isimo ababekuso. Ekufundeni kwethu, amehlo abo amancane ayetshengisa intokozo njalo babegegedeka ngenxa yokuthokoza okukhulu. Abantwana laba babeyisipho esivela kuJehova ikakhulu ngalonalelo langa.”

6, 7. (a) Ukholo lwethu luqiniswa njani nxa sifundisa iqiniso eliseBhayibhilini? (b) Ukubona abafundi beBhayibhili bethuthukisa impilo zabo ngokusebenzisa izimiso zeMibhalo kuyithinta njani indlela esikubona ngayo ukuhlakanipha kukaNkulunkulu?

⁶ Ukufundisa iqiniso eliseBhayibhilini kuqinisa ukholo lwethu. Umphostoli uPhawuli wabhala ngamanye amaJuda aphila ngesikhathi sakhe ayesenza okwehlukene lalokho ayekutshumayela. Wathi: “Wena ofundisa abanye, kambe lawe kawuzifundisi na? (Roma. 2:21) Lokhu kayisikho okwenziwa ngamaphayona lamuhla. Balamathuba amanengi okufundisa abanye iqiniso lokubancedisa ukuthi bafunde iBhayibhili. Ukuze bakwenze kuhle lokhu, kumele balungiselele nxa besiyafundisa umuntu munye ngamunye, mhlawumbe bachwayisise ukuze baphendule imibuzo. Iphayona elithiwa nguJaneen lithi: “Isikhathi sonke nxa ngithola ithuba lokufundisa abanye iqiniso, ngizizwa angani ngibhale iqiniso elingacitshekiyo engqondweni lasenhliziyweni yami. Lokhu kwenza ukuthi ukholo lwami lungadindi ndawonye kodwa luqhubeke luqina.”

⁷ Ukubona esibafundisa iBhayibhili bethuthukisa impilo zabo ngokusebenzisa izimiso zeBhayibhili kwenza ukuthi sikuqakathekise kakhulu ukuhlakanipha kukaNkulunkulu. (Isa. 48:17, 18) Lokhu kusuka kusincede ukuthi sizimisele kakhulu ukuqhubeka sisebenzisa izimiso lezi ezimpilweni zethu. Elinye iphayona okuthiwa ngu-Adrianna lithi: “Kwesinye isikhathi izimpilo zabantu ziba ngokunye nxa bethemba ukuhlakanipha kwabo. Kodwa nxa  beqalisa ukuthemba ukuhlakanipha kukaJehova, impumela yakhona bahle bayibone khonapho nje.” UPhil laye uthi: “Uyabona indlela uJehova antshintsha ngayo abantu okwabehlulayo ukuzintshintshela bebodwa.”

8. Ukusebenza labantu abenza okuhle ekutshumayeleni kusinceda ngani?

⁸ Ukusebenza labantu abenza okuhle ekutshumayeleni kuthuthukisa ukukhonza kwethu. (Zaga. 13:20) Amaphayona amanengi athatha isikhathi esinengi esebenza labanye ekutshumayeleni. Lokhu kwenza kube lamathuba amanengi ‘okuqinisana.’ (Roma. 1:12; bala iZaga 27:17.) Iphayona elithiwa nguLisa lithi: “Emsebenzini kugcwele ukuncintisana kanye lomhawu. Nsukuzonke usebenza labantu abanyeyayo labakhuluma inhlamba. Kwenziwa loba yini ukuze wedlule abanye. Kwezinye izikhathi uyahlekwa kumbe ugconwe ngenxa yokuziphatha kwakho kobuKhristu. Kodwa ukusebenza lamanye amaKhristu esikhonza lawo ekutshumayeleni kwenza ngithuthuke kakhulu. Nxa sengitshayisile, ngibuyela endlini ngitshaywa ngumoya, kungelani lokuthi ngidinwe kakhulu.”

9. Ukuphayona lomuntu esitshade laye, kuyithinta njani intambo elemicu emithathu?

⁹ Ukuphayona lomuntu esitshade laye kuqinisa intambo elemicu emithathu. (UmTshu. 4:12) UMadeline ophayona lomkakhe uthi: “Mina lomkami senelisa ukuthatha isikhathi eside sikhuluma ngalokho esihlangane lakho enkonzweni kumbe okunye esikuthole sibala iBhayibhili esingakusebenzisa ekutshumayeleni. Umnyaka munye ngamunye odlulayo siphayona ndawonye, uthando lwethu luyaqina kakhulu.” UTrisha laye uthi: “Asixabani ngezindaba zemali ngenxa yokuthi sonke asifuni ukungena ezikweledini. Sihamba ngezikhathi ezifananayo ekutshumayeleni, njalo lokhu kwenza sizibone sisonke izimpindelo zethu kanye labantu esifunda labo iBhayibhili okuyikho okusinceda ukuthi sithandane kakhulu njalo sisondele kakhulu kuNkulunkulu.”

10. Nxa siqakathekisa imisebenzi yoMbuso ukwedlula ezinye izinto njalo sikubona ukuthi uJehova uyasisekela, kwenzakalani ekumthembeni kwethu?

 ¹⁰ Ukuthemba kwethu uJehova kuyaqina nxa siqakathekisa imisebenzi yoMbuso ukwedlula ezinye izinto, futhi sizibonela ngawethu ukuthi uJehova uyasisekela njalo simbona ephendula imithandazo yethu. Phose wonke amaKhristu athembekileyo ayakubona ukuthi kuliqiniso lokhu. Kodwa labo abasenkonzweni yesikhathi esigcweleyo bakubona kakhulu ukuthi ukuthemba uJehova yikho okungabanceda ukuthi bahlale bengamaphayona. (Bala uMathewu 6:30-34.) UCurt, ophayonayo njalo obambela umbonisi wesiqinti wavuma ukuhambela ibandla okwakuthatha amahola amabili lengxenye ukuyafika kulo. Yena kanye lomkakhe oliphayona, babelephethulo eyayingabafikisa kodwa yayingeneli ukuthi baphenduke njalo kwakusasele iviki ukuthi ahole. UCurt uthi: “Ngaqalisa ukuzibuza ukuthi kambe ngangenze isinqumo esiyiso yini.” Sebethandazile, baphetha ngokuthi babezahamba kulelobandla, belethemba lokuthi uNkulunkulu wayezabanika abakudingayo. Sebezasuka, omunye udade wabatshayela ucingo wasebatshela ukuthi ufuna ukubanika isipho. Isipho lesi kwakuyimali eyayisenela ukuthi bahambe baphenduke. UCurt uthi: “Nxa sihlangana lezimo ezinjengalezi kanenginengi, kulula ukubona ukuthi uJehova uyasisekela.”

11. Yiziphi ezinye izibusiso ezitholwa ngamaphayona?

¹¹ Akuthandabuzwa ukuthi amaphayona akubona kanengi ukuthi nxa esebenza ngamandla enkonzweni kaJehova njalo elwela ukusondela kuye, yena uvula impophoma yezibusiso ezingapheliyo ezimangalisayo, ‘zibe ngezabo.’ (Dute. 28:2) Lanxa kunjalo, ukuphayona lakho kulobunzima bakho. Akulanceku kaNkulunkulu engehlelwa yizinhlupho ezabangelwa yikuhlamuka kuka-Adamu. Lanxa amanye amaphayona akubona kungcono ukuthi ekele ukuphayona okwesikhathi esithile, izinhlupho lezi kanengi zingalungiseka kumbe zibalekelwe. Kuyini okunganceda amaphayona ukuze aqhubeke ekholisa isibusiso sawo senkonzo?

12, 13. (a) Kumele lenzeni iphayona nxa likubona kunzima ukuthi lifikise amahola alo? (b) Kungani kuqakatheke kakhulu ukuthi iphayona lizinike isikhathi sokubala iBhayibhili nsukuzonke, ukuzifundela lilodwa kanye lokucabangisisa?

¹² Amaphayona amanengi awalasikhathi samahala. Kungaba nzima ukwenza konke afuna ukukwenza, yikho kuqakathekile ukuthi ahlele kuhle isikhathi sawo. (1 Kor. 14:33, 40) Nxa kunzima ukuthi iphayona lifikise amahola afunekayo, kungadingeka ukuthi lihlole kutsha indlela elisebenzisa ngayo isikhathi. (Efe. 5:15, 16) Lingazibuza: ‘Ngithatha isikhathi esinganani ekuzilibaziseni kanye lakwezinye izinto zokuzithokozisa nje? Kuyadingeka yini ukuthi ngizikhuze? Ngingantshintsha yini isikhathi sami somsebenzi wami wokuziphilisa?’ Wonke umKhristu angavuma ukuthi kulula ukwengezelela izinto ezithile esikhathini sakho; yikho-ke labo abasenkonzweni yesikhathi esigcweleyo kungadingeka ukuthi bahlale behlola izimo njalo balungisise lapho okulohlupho khona.

¹³ Iphayona kumele lihlele ukuba lesikhathi sokubala iBhayibhili nsuku zonke, esokuzifundela lilodwa kanye lesokucabangisisa kumbe ukunakana. Yikho-ke, iphayona kumele lizikhuze ukuze izinto ezingaqakathekanga kakhulu zingaphambanisi isikhathi salo sokwenza izinto lezi eziqakathekileyo. (Flp. 1:10) Ngokwesibonelo, libone ngelihlo lengqondo lidiniwe lifika endlini livela ekutshumayeleni. Lifuna ukulungiselela imihlangano elandelayo ntambama. Kodwa liqala ngokulayitha ikhompiyutha yalo beselibala ama-imeyili alo, liwaphendule. Lilokhu lisebulenjini khonapho, liya kwenye iWebhusayithi ukuze libone ukuthi intengo yento elifuna ukuyithenga isiyehlile yini. Lisalibele, sekwedlule amahola amabili lingakaqalisi lokufunda lokho akade lihlele ukukufunda. Kungani kungasondaba encane le? Ingcitshi kwezemidlalo kumele  zinakekele imizimba yazo nxa zifuna ukuqhubeka zidlala okweminyaka eminengi. Yikho-ke amaphayona lawo nxa efuna ukuqhubekela phambili esenkonzweni yesikhathi esigcweleyo kumele abe lohlelo oluhle lokuzifundela ewodwa.​—1 Tim. 4:16.

14, 15. (a) Kungani kungamelanga amaphayona avume ukuphanjaniswa yizinto ezinenginengi ekuphileni? (b) Kumele lenzeni iphayona nxa lingaba sebunzimeni?

¹⁴ Amaphayona aphumelelayo azama ngamandla wonke ukuthi aphile ukuphila okulula okungaphanjaniswa yizinto ezinenginengi. UJesu wakhuthaza abafundi bakhe ukuthi babelelihlo elihle. (Mat. 6:22) Wenza ukuthi impilo yakhe ingaphanjaniswa yizinto ezinenginengi ukuze afeze inkonzo yakhe kungelalutho olumphambanisayo. Yikho wathi: “Amakhanka alemilindi lezinyoni zezulu zilezidleke, kodwa iNdodana yomuntu kayilandawo yokubeka ikhanda layo.” (Mat. 8:20) Lilesifiso sokufunda kulokho okwenziwa nguJesu, iphayona lenza kuhle ukuhlala licabanga ukuthi ukuba lezinto ezinengi kuzakwenza ukuthi libe lomsebenzi omnengi wokuzilondoloza, ukuzilungisisa lokuzintshintshantshintsha.

¹⁵ Amaphayona ayananzelela ukuthi isibusiso sawo senkonzo awasitholanga ngenxa yokuthi aqakatheke kakhulu kulabanye. Kodwa loba yisiphi isipho kumbe isibusiso senkonzo esingasithola, siyabe sisithole ngenxa yomusa kaNkulunkulu ongasifanelanga. Lokhu kutsho ukuthi nxa sifuna ukuqhubeka singamaphayona, kumele sithembe uJehova. (Flp. 4:13) Izinhlupho lobunzima kuzakuba khona. (Hubo. 34:19) Nxa kungabakhona, amaphayona kumele amthembe uJehova ukuthi awaqondise. Kanti njalo avumele uNkulunkulu ukuthi awasize kulokuthi ahle atshiye inkonzo yawo eyisibusiso. (Bala iHubo 37:5.) Nxa ekubona ukuthi uNkulunkulu uyawasekela ngothando, azasondela kuye, yena abe nguYise wasezulwini owakhathalelayo.​—Isa. 41:10.

16. Kumele wenzeni nxa ufuna ukuphayona?

¹⁶ Nxa ufuna ukuthola izibusiso ezifanana lalezo ezijatshulelwa yilabo abasenkonzweni yesikhathi esigcweleyo, tshela uJehova ngesifiso sakho. (1 Joha. 5:14, 15) Khuluma lalabo abaphayonayo khathesi. Zenzele imigomo eqhubekayo ezakwenza ukuthi uphayone. Yikho okwenziwa nguKeith lo-Erika. Bobabili babesebenza njalo njengabanye abatshadileyo abalingana labo, basebethenge indlu kanye lemota entsha besanda nje kutshada. Bathi: “Sasicabanga ukuthi izinto lezo zizasenza sisuthiseke, kodwa kazizange ngitsho lakancane.” Lapho uKeith ephelelwa ngumsebenzi waba liphayona elisizayo. Uthi: “Ukuphayona kwangikhumbuza ngentokozo enkulu etholakala ngokutshumayela.” Yena lomkakhe baba ngabangane benye imuli engamaphayona eyabanceda ukuthi babone intokozo etholakala ngokuphila okulula kanye lokuphayona. UKeith lo-Erika benzani? Bathi: “Senza uluhlu lwemigomo yethu ephathelane lokukhonza, salunamathisela efiligini njalo sasifaka ukhwetshu kwesesikwenzile.” Ngemva kwesikhathi esithile, benelisa ukuphayona.

17. Kungani singathi uyabe uhlakaniphile nxa ucabanga ngokulungisisa isikhathi sakho kumbe ukuntshintsha okuthile empilweni ukuze uphayone?

¹⁷ Ungaba liphayona yini? Nxa okwakhathesi ungakakuboni ukuthi lokhu ungakwenza njani, yenza konke okusemandleni akho ukuze usondele kakhulu kuJehova ngokwenza okunengi enkonzweni. Nxa ungathandaza ubusuhlola izimo zakho, uzathola ukuthi ukulungisisa isikhathi sakho kumbe ukuntshintsha okuthile empilweni yakho kuzakwenza wenelise ukuphayona. Nxa usuphayona, konke ozincitsha khona kuzakhanya kukuncane kakhulu nxa sesiqathanisa lentokozo ozayithola. Ukuqakathekisa izinto eziphathelane loMbuso ukwedlula izifiso zakho kuzakwenza usuthiseke kakhulu. (Mat. 6:33) Uzahlala uthokoza kakhulu ngenxa yokupha abanye. Okuhle kakhulu yikuthi uzathola amathuba amanengi okucabanga ngoJehova lokukhuluma ngaye, ujulisa ukumthanda kwakho njalo usenza athokoze.