1, 2. (a) Oshizemo ohashi kala shini uuna tatu dhiladhila nokupopya kombinga yomuntu ngoka tu hole? (Tala kethano ndyoka li li petameko.) (b) Otatu ka kundathana omapulo geni?

OKUDHILADHILA nokupopya kombinga yomuntu ngoka tu hole ohaku koleke ekwatathano lyetu naye. Shoka osho shi li wo ngaaka shi na ko nasha nekwatathano lyetu naJehova Kalunga. E li omusita gwoonzi, David okwa li a kala omausiku ogendji ta tala koonyothi dhokegulu nokutedhatedha kombinga yOmushiti gwadho ngoka itaa vulu okuyelekwa nasha. Okwa nyola a ti: “Ngele te tala kegulu ndyoka we li shiti, komwedhi noonyothi mbyoka we yi uthile omahala gayo — omuntu omushike, sho ho mu dhimbulukwa; omushamba gwowala, nando u na oshimpwiyu naye?” (Eps. 8:3, 4) Nokonima sho omuyapostoli Paulus a dhiladhila kunkene elalakano lyaJehova li na ko nasha naIsraeli shopambepo lya li ta li gwanithwa momukalo gwa dhenga mbanda, okwa ti: “Ano [uuwindji] wuuyamba waKalunga ou thike peni! Uunongo noondunge dhe odha hulila peni!” — Rom. 11:17-26, 33.

² Sho tu li muukalele, ohatu dhiladhila nokupopya kombinga yaJehova. Shoka ohashi tu etele uuwanawa. Oyendji mboka ye li aakokolindjila yopandjigilile oya mona kutya ohole yawo yokuhola Kalunga oya kola shoka shi li eyambeko limwe ndyoka ha li zi mokulonga ethimbo olindji miilonga yUukwaniilwa. Kutya nduno owu li omukokolindjila nenge owo to lalakanene, dhiladhila kwaashika: Ongiini iilonga yuukokolindjila tayi ka koleka ekwatathano lyoye naJehova? Ngele owu li omukokolindjila, ipula to ti: ‘Oshike tashi ka kwathela ndje ndi tsikile miilonga mbika yi ikalekelwa?’ Ngele ku li natango omukokolindjila, ipula to ti: ‘Omalunduluko geni ndi na okuninga, opo ndi ninge omukokolindjila?’ Natu ka kundathaneni omikalo dhontumba nkene uukokolindjila tawu vulu okukoleka ekwatathano lyetu naKalunga.

3. Ohashi tu gumu ngiini sho tatu popi kombinga yomalaleko nuuyamba gUukwaniilwa gomonakuyiwa muukalele?

³ Okupopya nayalwe kombinga yomalaleko nuuyamba gUukwaniilwa  gomonakuyiwa ohaku tu hedhitha popepi naJehova. Enyolo lini wu hole okulongitha uuna to longo egumbo negumbo? Pamwe owu hole okulongitha Episalomi 37:10, 11; Daniel 2:44; Johannes 5:28, 29; nenge Ehololo 21:3, 4? Ethimbo kehe tatu kundathana nayalwe omauvaneko ngoka, ohaku tu dhimbulukitha kutya Kalunga ketu ngoka omugandji oye shili ha gandja “oshipewa kehe oshiwanawa nomagano kehe ga gwana ga pwa.” Shika ohashi tu hedhitha popepyeelela naye. — Jak. 1:17.

4. Omolwashike olupandu lwetu lwuuwanawa waJehova halu indjipala sho tatu mono mboka ya hepa pambepo?

⁴ Okumona mboka tatu uvithile nkene ya hepa pambepo ohaku indjipaleke olupandu lwetu lwoshili. Aantu muuyuni ka ye na ewiliko li shi okwiinekelwa ndyoka ta li vulu oku ya kwathela ya pondole noya mone enyanyu. Oyendji ohayi ipula nonakuyiwa nokaye na etegameno lyasha. Ohaya kongo ya mone kutya elalakano lyonkalamwenyo olini. Nokuli noyendji mboka ye li momalongelokalunga oyu uvite ko owala Ombiimbeli kashona. Otaya faathanithwa naantu yomuNinive shonale, “mboka [ya li] kaaye shi nando eyooloko pokati kolulyo lwawo nolumoho lwawo.” (Jona 4:11, NW) Uuna tatu longitha ethimbo olindji muukalele, ohatu mono lela eyooloko lyonkalo yopambepo pokati kaamboka tatu uvithile nosho wo oshigwana shaJehova. (Jes. 65:13) Ohashi tu dhimbulukitha uuwanawa waJehova molwaashoka iha gwanitha po owala oompumbwe dhetu dhopambepo, ihe oha hiya ayehe ya mone etalaleko lyopambepo nosho wo etegameno lyashili. — Eh. 22:17.

5. Ohatu kala tu uvitile ngiini omaupyakadhi getu uuna tatu kwathele yalwe pambepo?

⁵ Okukwathela yalwe pambepo ohaku shi ningitha oshipu kutse tu yande okukala twa gwililwa po komaupyakadhi gopaumwene. Trisha, omukokolindjila gwondjigilile, okwa li e shi imonene ko sho aavali ye ya li ya hengana. Okwa ti: “Osha li shimwe shomiiningwanima monkalamwenyo yandje shoka sha li she ehameke ndje noonkondo pamaiyuvo.” Esiku limwe sho a li uvite oluhodhi noonkondo nokwa li a hala okukala pegumbo, okwa li a yi a ka konakone Ombiimbeli nuunona wu li utatu mboka wa li megumbo moka mwa li onkalo ombwiinayi noonkondo. He yawo okwa li e ya thigi po, nomumwayimati gwawo gwomukuluntu okwa li e ya hepeke shinyanyalitha. Trisha okwa ti: “Uupyakadhi kehe nenge uudhigu mboka nda li tandi ungaunga nawo ka wa li tawu vulu okuyelekwa nowawo. Sho tatu konakona, uumeho wawo owa li tawu tayima notawu imemeha shili wa nyanyukwa. Uunona mboka owa li shili omagano ga za kuJehova, unene tuu esiku ndyoka.”

6, 7. (a) Eitaalo lyetu ohali kolekwa ngiini uuna tatu longo yalwe ooshili dhOmbiimbeli? (b) Ohatu kala tu na olupandu lu li ngiini sho tu wete nkene aakonakonimbiimbeli yetu taya hwepopaleke oonkalamwenyo dhawo sho taya tula miilonga omakotampango gopamanyolo?

⁶ Okulonga yalwe ooshili dhOmbiimbeli ohaku koleke eitaalo lyetu. Omuyapostoli Paulus okwa li a nyola kombinga yAajuda yopethimbo lye mboka ya li itaaya tula miilonga shoka ya li tayu uvitha a ti: ‘Ngoye ho longo yalwe, omolwashike ihoo ilongo ngoye mwene?’ (Rom. 2:21) Aakokolindjila yokunena inaya yooloka ko tuu kuyo! Ohaya mono aluhe oompito odhindji okulonga yalwe oshili nokuninga omakonakonombiimbeli. Opo ya pondele, oya pumbwa yi ilongekidhile ekonakonombiimbeli kehe nomathimbo gamwe oye na okuninga omapekapeko, opo ya yamukule omapulo. Omukokolondjila gwedhina Janeen okwa ti: “Ethimbo kehe tandi longo yalwe oshili, ohandi kala ndu uvite kutya ooshili ndhika ohadhi ningine momadhiladhilo gandje nomomutima gwandje. Shika osha ningitha ndje ndi kale ndi na eitaalo ta li tsikile nokukola.”

⁷ Okumona nkene aakonakonimbiimbeli taya hwepopaleke oonkalamwenyo dhawo sho taya tula miilonga omayele gOmbiimbeli, ohaku kokeke olupandu lwetu lwuunongo waKalunga. (Jes. 48:17, 18) Shoka nokuli ohashi tu kwathele tu kale twa tokola toko tu tsikile nokutula miilonga omakotampango ngaka moonkalamwenyo dhetu. Adrianna omukokolindjila gulwe naye okwa ti: “Aantu ohashi vulika ya kale ye na oonkalamwenyo dha piyagana ngele oyi igameke koondunge dhawo yene. Ihe uuna yi ikolelele kuunongo waJehova ohaya tameke okumona uuwanawa pethimbo opo tuu mpoka.” Sha faathana, Phil okwa ti: “Oho mono nkene Jehova ha vulu okulundulula aantu mboka ya li inaaya pondola  sho ya li taya kambadhala okulundulula oonkalamwenyo dhawo kuyo yene.”

8. Okulonga pamwe nAakriste ooyakwetu muukalele ohaku tu gumu ngiini?

⁸ Okulonga pamwe nooitaali ooyakwetu muukalele ohaku tu tungu pambepo. (Omayel. 13:20) Aakokolindjila oyendji ohaya kala ethimbo olindji muukalele naauvithi ooyakwawo. Shika ohashi ya pe oompito ya ‘tsaathane omukumo.’ (Rom. 1:12; lesha Omayeletumbulo 27:17.) Omukokolindjila gwedhina Lisa okwa ti: “Olundji miilonga, ohamu kala ombepo yethigathanopo noyondumbo. Esiku kehe owa dhingililwa koluhoko nosho wo komalaka omawinayi. Kehe gumwe okwa hala okumona ondondo yopombanda kashi na nduno mbudhi kutya otashi pula shike. Omathimbo gamwe, oho ulwa nayi nenge wu yolwe omolweihumbato lyoye lyopaKriste. Ihe okulonga pamwe nAakriste ooyakwetu muukalele ohaku tungu shili. Kehulilo lyesiku, ohandi ya kegumbo nda talalelwa, nonando ondi kale nda loloka shi thike peni.”

9. Okukokola ondjila nookuume ketu kopandjokana ohaku vulu okuguma ngiini ongodhi yondjokana ndjoka ya yogohwa oondali ndatu?

⁹ Okukokola ondjila pamwe nookuume ketu kopandjokana ohaku koleke ongodhi yondjokana ndjoka ya yogohwa oondali ndatu. (Omuuv. 4:12) Madeline, ngoka ha kokola ondjila pamwe nomusamane gwe, okwa ti: “Ngame nomusamane gwandje ohatu kala ethimbo ele tatu popi kombinga yesiku lyetu muukalele nenge kombinga yoshinima shimwe shoka twa lesha melandulathano lyetu lyOmbiimbeli shoka tatu vulu okulongitha muukalele wetu. Omvula kehe tatu kokola ondjila pamwe, ekwatathano lyetu oha li kolo.” Sha faathana, Trisha okwa ti: “Atuhe otu shi shi kutya inatu hala okukala tu na oongunga, onkee ano ihatu kondjo omolwiimaliwa. Otu na elandulathano lyokuya muukalele lya faathana, onkee ohatu ningi omaishunoko getu pamwe nosho wo omakonakonombiimbeli, shoka hashi tu kwathele tu kale tu na ekwatathano lya kola notu hedhe popepi naJehova.”

10. Einekelo lyetu muJehova oha li gumwa ngiini uuna tatu kongo tangotango Uukwaniilwa naasho tatu mono nkene Kalunga te tu ambidhidha?

 ¹⁰ Einekelo lyetu muJehova ohali koko sho tatu pititha Uukwaniilwa komeho, tatu mono nkene Jehova te tu ambidhidha, nankene wo sho ta yamukula omagalikano getu. Odhoshili kutya shika ohashi ningilwa Aakriste ayehe aadhiginini. Ihe aakokolindjila oye shi shi kutya ongele owala yi inekela muJehova taya vulu okutsikila nuukokolindjila. (Lesha Mateus 6:30-34.) Curt ngoka omukokolindjila noha longo e li omutonateli gwoshikandjo omalupita, okwa li a zimine a ka talele po egongalo ndyoka li li kokule negumbo lye, hapu endwa oowili mbali netata noshihauto. Ye nomukulukadhi gwe, ngoka naye omukokolindjila, oya li ye na owala omahooli mohauto yawo gokuya. Ihe kaya li ye na omahooli gokugaluka ko nokwa li ku na natango oshiwike shimwe Curt a kwate ondjambi ye yokomwedhi. Curt okwa ti: “Onda li nda tameke okwiipula ngele onda ninga ngaa etokolo li li mondjila.” Konima sho ya galikana, oya tokola kutya otaya ka gwanitha po oshinakugwanithwa shoka, ye na einekelo kutya Kalunga ota ka gwanitha po oompumbwe dhawo. Sho ya li ye li po ku ya, omumwameme gumwe okwe ya dhengele e ta ti kutya oku ya nine omagano. Oga li naanaa oshimaliwa shoka ya li ya pumbwa, opo ya mane ko etalelopo lyawo. Curt okwa ti: “Uuna to mono iimoniwa ya tya ngeyi ethimbo nethimbo, oho mono lela kutya Jehova ote ku kwathele.”

11. Aakokolindjila ohaya mono omalaleko nuuyamba gamwe geni?

¹¹ Eeno, olundji aakokolindjila ohaye shi imonone ko kutya sho taa longo nuudhiginini miilonga yaJehova notaya hedha popepyeela naye, ohaya ‘udhililwa’ komayambeko ogendjigendji. (Deut. 28:2, NW) Nonando ongawo, uukokolindjila owu na wo omashongo. Kape na nando ogumwe gwomaapiya yaKalunga ihaa mono omaupyakadhi ngoka ge etithwa ku Adam ngoka inaa vulika. Nonando aakokolindjila yamwe kaya li ya vulu okutsikila we niilonga yawo uule wethimbo lyontumba, olundji omaupyakadhi ngoka ohaya vulu oku ga kandula po nenge nokuli ye ga yande. Oshike tashi vulu okukwathela aakokolindjila ya tsikile okunyanyukilwa iilonga yawo mbika yi ikalekelwa?

12, 13. (a) Omukokolindjila ota vulu okuninga po shike ngele oha mono oshidhigu okugwanitha po oowili dhe? (b) Omolwashike sha simanenena okukala nelandulathano lyokulesha Ombiimbeli kehe esiku, lyokukonakona paumwene, nosho wo lyokutedhatedha?

¹² Aakokolindjila oyendji ohaya kala yi ipyakidhila noonkondo. Opo omuntu a longe kehe shimwe shoka a hala okuninga, osha simana a kale e na elandulathano ewanawa lyopaumwene. (1 Kor. 14:33, 40) Ngele omukokolindjila oha nyengwa okugwanitha po oowili dhe, nena otashi vulika a pumbwa okukonakonuna omukalo moka ha longitha ethimbo lye. (Ef. 5:15, 16) Ota vulu okwiipula ta ti: ‘Mbela ohandi longitha ethimbo li thike peni momainyanyudho? Mbela onda pumbwa okwiipangela lela? Mbela otandi vulu okulundulula elandulathano lyandje lyiilonga yokukonga omboloto?’ Omukriste kehe ote shi zimine kutya oshipu okugwedha mo iinima melandulathano lyetu. Onkee ano, aakokolindjila oya pumbwa okukonakona oonkalo dhawo pandjigilile nokuninga omalunduluko ngele sha pumbiwa.

¹³ Melandulathano lyomukokolindjila omu na okukala elesho lyOmbiimbeli esiku kehe, ekonakono lyopaumwene, nosho wo okutedhatedha. Onkee ano, omukokolindjila okwa pumbwa okwiipangela, opo kaa longithe po ethimbo lye ndyoka a tula po lyiinima mbyoka ya simanenena naambyoka inayi simana. (Fil. 1:10) Pashiholelwa, dhiladhila komukokolindjila e ya kegumbo konima sho a kala esiku alihe muukalele. Okwa li a dhiladhila okulongitha ongulohi ndjoka i ilongekidhile okugongala hoka taku ka landula ko. Ihe tango okwa lesha oombilive dhe. Opo nduno okwa tema okompiuta ye e ta lesha oo-email dhe noku dhi yamukula. Manga e li kOintaneta, okwa patulula o-Web site yimwe a tale ngele ondando yoshinima shimwe shoka a hala okulanda oya shuna pevi. Sho owala a ka tala, oowili mbali odha pita po nale noina tameka nando okukonakona shoka a li e na okukonakona ongulohi ndjoka. Omolwashike shoka shi li uupyakadhi? Aatondoki dhingi oye na okusila oshimpwiyu omalutu gawo ngele oya hala okutsikila okutondoka. Shaa faathana, aakokolindjila nayo oya pumbwa  okukala ye na elandulathano ewanawa lyokukonakona paumwene, opo yi ipaluthe pambepo ngele oya hala okutsikila miilonga yuukokolindjila. — 1 Tim. 4:16.

14, 15. (a) Omolwashike aakokolindjila ye na okukaleka onkalamwenyo yawo paunathangwa? (b) Ngele omukokolindjila okwa mono uupyakadhi, oku na okuninga shike?

¹⁴ Aakokolindjila mboka haye shi enditha nawa ohaya kambadhala okukaleka onkalamwenyo yawo paunathangwa. Jesus okwa li a ladhipike aalongwa ye ya kale neho lyanathangwa. (Mat. 6:22, yelekanitha NW.) Jesus okwa li a kaleke onkalamwenyo ye paunathangwa, opo a vule okugwanitha po oshilonga she shuukalele itaa piyaganekwa kusha. Okwa li a vulu okutya: “Oombandje odhi na omakwena, noondhila odhi na iihandhila, ihe Omuna gwOmuntu [ke] na mpoka ta langeke omutse gwe.” (Mat. 8:20) Omukokolindjila ngoka ha landula oshiholelwa shaJesus, ota ka kaleka momadhiladhilo kutya mokukala e na iiniwe oyindji, otaku ke mu pula ethimbo olindji oku yi sila oshimpwiyu, oku yi pangela nenge oku yi pingena po nayilwe.

¹⁵ Aakokolindjila ohaya dhimbulukwa kutya iilonga yawo oyi ikalekelwa, ihe ihaya dhiladhila kutya yo oye li nawa ye vule yalwe. Pehala lyaashono, omagano kehe nenge oshilonga kehe shoka tatu vulu okukala tu na, otwe shi pewa omolwesilohenda lyaKalunga. Onkee ano, kehe gumwe oku na okwiinekela muJehova, opo a vule okutsikila e li omukokolindjila. (Fil. 4:13) Omashongo nomaudhigu otaga ka holoka po. (Eps. 34:19) Uuna ga holoka po, pehala lyokweetha po nziya iilonga yawo yi ikalekelwa, aakokolindjila oye na okupula ewiliko kuJehova e ya kwathele. (Lesha Episalomi 37:5.) Sho taya mono nkene Kalunga teya kwathele pahole, otaya ka hedha popepyeelela naye e li Tate gwawo gwomegulu ngoka heya sile oshimpwiyu. — Jes. 41:10.

16. Ngele owa hala okukokola ondjila, owu na okuninga shike?

¹⁶ Ngele owa hala wu yambekwe ngaashi mboka ye li muukokolindjila, lombwela Jehova ehalo lyoye. (1 Joh. 5:14, 15) Popya wo naamboka taya kokola ondjila ngashingeyi. Itulila po omalalakano ngoka tage ke ku kwathela wu ninge omukokolindjila. Shoka osho Keith naErika ya li ya ningi. Ngaashi aaihokani yepipi lyawo, oya li ye na iilonga yokwiikongela omboloto yesiku kehe, oya li ya landa egumbo nohauto ompwe mbala konima sho ya hokana. Oya ti: “Otwa li twa dhiladhila kutya iinima mbyoka otayi ke tu etela enyanyu, ihe hasho nando.” Sho Keith a lalekwa miilonga, okwa li a kutha uukwathelikokolindjila. Okwa ti: “Okukokola ondjila okwa li kwa dhimbulukitha ndje nkene okukala muukalele haku e ta enyanyu.” Oya li ya panga uukuume naaihokani mboka ye li aakokolindjila mboka ya li ye ya kwathele ya mone enyanyu ndyoka ha li zi mokukala nonkalamwenyo yanathangwa nosho wo mokukokola ondjila. Keith naErika oya li ya ningi po shike? “Otwa li twa nyola omusholondondo gwomalalakano getu gopambepo e tatu gu tula kokila yokutalaleka, e tatu kala hatu ndhindhilike elalakano kehe ndyoka twa adha.” Mokweendela ko kwethimbo, oya li ya tameke uukokolindjila.

17. Omolwashike tashi ka kala pandunge wu dhiladhile kombinga yokuninga omalunduluko monkalamwenyo yoye, opo wu ninge omukokolindjila?

¹⁷ Mbela oto vulu okuninga omukokolindjila? Ngele ngashingeyi itashi wapa kungoye wu shi ninge, oto vulu okuninga ashihe shoka to vulu wu hedhe popepyeelela naJehova mokulonga ngaashi to vulu muukalele. Ngele owa konakona oonkalo dhoye pamwe negalikano, otashi vulika wu mone kutya ngele owa ningi omalunduluko gontumba melandulathano lyoye nenge monkalamwenyo yoye, oto ka vula okuninga omukokolindjila. Ngele owa ningi omukokolindjila, enyanyu ndyoka to ka mona ota li ka kala li vule eiyambo kehe ndyoka to ka ninga. Oto ka kala wa nyanyukwa shili molwaashoka owa pititha komeho iinima yUukwaniilwa pehala lyokupitha komeho iinima yoye. (Mat. 6:33) Oto ka mona enyanyu ndyoka hali zi mokugandja kuyalwe. Natango, oto ka mona oompito odhindji dhokudhiladhila nokupopya kombinga yaJehova, hoka taku ka kokeka ohole yoye yoku mu hola nosho wo oku mu nyanyudha.