1, 2. (a) Go nagana ka motho yo re mo ratago le go bolela ka yena go ka re kgoma bjang? (Bona seswantšho seo se lego mathomong a sehlogo.) (b) Re tlo ahlaahla dipotšišo dife?

GO NAGANA ka motho yo re mo ratago le go bolela ka yena go matlafatša tswalano ya rena le yena. Go bjalo le ka tswalano ya rena le Jehofa Modimo. Ge Dafida e be e sa le modiši, o ile a fetša mašego a mantši a lebeletše magodimong ao a tletšego dinaledi gomme a naganišiša ka Mmopi wa tšona yo a sa bapišwego le selo. O ngwadile gore: “Ge ke bona magodimo a gago, mediro ya menwana ya gago, kgwedi le dinaledi tšeo o di dirilego, gona motho wa nama le madi ke eng moo o bilego o dula o nagana ka yena, le gona ngwana wa motho wa lefaseng ke eng ge o bile o mo hlokomela?” (Ps. 8:3, 4) Le gona ka morago ga gore moapostola Paulo a bone kamoo morero wa Jehofa o bego o phethagala ka tsela e makatšago go Isiraele ya moya, o ile a re: “A bodiba bja mahumo a Modimo, bohlale le tsebo!”—Baroma 11:17-26, 33.

² Ge re tšea karolo bodireding, re nagana ka Jehofa le go bolela ka yena. Seo ka bosona se a re matlafatša. Ba bantši bao ba tsenetšego bodiredi bja nako e tletšego ba hweditše gore go tšea karolo ka mo go oketšegilego tirelong ya go bolela ka Mmušo go matlafatša go rata ga bona Modimo. Go sa šetšwe gore ga bjale o tirelong ya nako e tletšego goba o katanela go fihlelela pakane yeo, ipotšiše gore: Bodiredi bja nako e tletšego bo ka matlafatša bjang tswalano ya ka le Jehofa? Ge e ba o le mmulamadibogo, ipotšiše gore: ‘Ke tla thušwa ke’ng gore ke tšwele pele ke le tirelong ye e putsago?’ Ge e ba o se wa tšwa o eba mmulamadibogo, ipotšiše gore: ‘Nka dira diphetogo dife gore ke kgone go ba mmulamadibogo?’ A re ahlaahleng ditsela tšeo ka tšona tirelo ya nako e tletšego e ka matlafatšago tswalano ya rena le Modimo.

3. Ge re le bodireding, go bolela ka ditšhegofatšo tša nakong e tlago tša Mmušo go re kgoma bjang?

³ Go bolela ka ditšhegofatšo tša Mmušo wa Modimo le ba bangwe go re batametša kgauswi le Jehofa. Ke lengwalo lefe leo o ratago go le diriša ge o eya ka ntlo le ntlo? Na o rata Psalme 37:10, 11; Daniele 2:44; Johane 5:28, 29; goba Kutollo 21:3, 4? Nako e nngwe le e nngwe ge re bolela le ba bangwe ka dikholofetšo tše di lego mangwalong a, re ikgopotša gore ka kgonthe Modimo wa rena yo lerato ke monei wa “mpho e nngwe le e nngwe e botse le neo e nngwe le e nngwe e phethagetšego.” Seo se re batametša kgauswi le yena.—Jak. 1:17.

4. Ke ka baka la’ng go bona boemo bjo bo nyamišago bja moya bja batho ba bangwe go dira gore re tšeele godimo kudu botho bja Modimo?

⁴ Go bona boemo bjo bo nyamišago bja moya bja bao re ba botšago ditaba tše dibotse go dira gore re tšeele therešo godimo kudu. Batho ba lefase ga ba na tlhahlo yeo e ka botwago yeo e ka ba thušago go atlega le go hwetša lethabo. Ba bantši ba tshwenyegile ka bokamoso e bile ga ba na kholofelo. Ba tsoma morero wa bophelo. Gaešita le bontši bja bao e lego badumedi ga ba tsebe mangwalo gakaalo. Ba itshwanela le batho ba Ninife ya bogologolo. (Bala Jona 4:11.) Ge re tšea karolo ka mo go oketšegilego bodireding, re thoma go bona gabotse phapano magareng ga boemo bja moya bja bao re bolelago le bona tšhemong le bja batho ba Jehofa. (Jes. 65:13) Re gopotšwa botho bja Jehofa ka ge a sa fo re nea dinyakwa tša rena tša moya; o laletša bohle gore ba tle ba lapološwe moyeng le go ba le kholofelo ya kgonthe.—Kut. 22:17.

5. Go thuša ba bangwe moyeng go dira gore re ikwe bjang ka mathata a rena?

⁵ Go thuša ba bangwe moyeng go dira gore re se imelwe ke mathata a rena. Trisha yo e lego mmulamadibogo wa ka mehla, o ile a lemoga ntlha yeo ge batswadi ba gagwe ba be ba hlalana. O re: “Ga se ka ka ka kwa bohloko bja mohuta wo bophelong bja ka.” Ka letšatši le lengwe ge a be a nyamile gomme a sa nyake go ya felo, o ile a ya go swara thuto ya Beibele le bana ba bararo bao ba bego ba na le mathata ka gae. Tatago bona o be a ba tlogetše gomme mogolo’a bona a ba tlaiša. Trisha o re: “Bothata goba kgateletšego le ge e le efe yeo ke bego ke na le yona e be e se selo ge ke ipapetša le bona. Ge re dutše re ithuta, ba be ba ntebeletše ka mahlwana a bona e bile ba segasega ba thabile. Bana bao e be e le mpho e tšwago go Jehofa, kudukudu letšatšing leo.”

6, 7. (a) Tumelo ya rena e matlafala bjang ge re ruta ba bangwe ditherešo tša Beibele? (b) Re ikwa bjang ka bohlale bja Modimo ge re bona barutwana ba Beibele ba kaonefatša maphelo a bona ka go diriša melao ya motheo ya Mangwalo?

⁶ Go ruta ba bangwe ditherešo tša Beibele go matlafatša tumelo ya rena. Moapostola Paulo o ngwadile ka Bajuda ba bangwe ba mehleng ya gagwe bao ba bego ba sa dire seo ba bego ba se ruta gore: “Na wena o rutago yo mongwe, ga o ithute?” (Baroma 2:21) Ruri babulamadibogo lehono ba fapana le Bajuda bao! Ba na le dibaka tše dintši tša go ruta ba bangwe therešo le go swara dithuto tša Beibele. E le gore ba dire seo ka katlego, ba swanetše go lokišeletša thuto e nngwe le e nngwe, mohlomongwe ba dire le nyakišišo gore ba kgone go araba dipotšišo tšhemong. Mmulamadibogo yo a bitšwago Janeen o re: “Nako le nako ge ke ruta ba bangwe ditherešo, ke ikwa eka ditherešo tše di tsema medu monaganong le pelong ya ka. Ka baka leo, tumelo ya ka ga se ya ema felo gotee eupša e a gola.”

⁷ Go bona barutwana ba Beibele ba kaonefatša maphelo a bona ka go diriša melao ya motheo ya Beibele go dira gore re tšeele godimo kudu bohlale bja Modimo. (Jes. 48:17, 18) Seo se re thuša gore re ikemišetše le go feta go tšwela pele re diriša melao yeo ya motheo maphelong a rena. Mmulamadibogo yo mongwe yo a bitšwago Adrianna, o re: “Ge batho ba ithekga ka bohlale bja bona, maphelo a bona e ba tlhakatlhakano feela. Eupša ge ba thoma  go ithekga ka bohlale bja Jehofa, gateetee go ba le diphetogo.” Ka mo go swanago, Phil o re: “O bona kamoo Jehofa a kgonago go fetoša batho bao ba paletšwego ke go iphetoša.”

8. Go šoma tšhemo le bana babo rena ba beago mohlala go re kgoma bjang?

⁸ Go šoma tšhemo le bana babo rena ba beago mohlala go re matlafatša moyeng. (Die. 13:20) Babulamadibogo ba bantši ba fetša nako e ntši bodireding ba na le baebangedigotee. Seo se ba nea dibaka tše di oketšegilego tša go ‘kgothatšana.’ (Baroma 1:12; bala Diema 27:17) Mmulamadibogo yo a bitšwago Lisa o re: “Mošomong go tletše moya wa phadišano le mona. Letšatši le letšatši o kwa lesebo le maroga. Yo mongwe le yo mongwe o lwela maemo mošomong. Ka dinako tše dingwe o a kwerwa ka baka la ge o le Mokriste. Lega go le bjalo, go šoma le Bakristegotee bodireding go tloga go aga. Mafelelong a letšatši, ke boa gae ke lapologile go sa šetšwe gore ke lapile gakaakang.”

9. Ge balekane e le babulamadibogo, seo se kgoma bjang thapo ya melogo e meraro ya lenyalo?

⁹ Balekane bao e lego babulamadibogo ba tiiša thapo ya melogo e meraro ya lenyalo. (Mmo. 4:12) Madeline yo a bulago madibogo le monna wa gagwe o re: “Nna le monna wa ka re fetša nako e ntši re boledišana ka diphihlelo tša tšhemong goba re bolela ka ntlha yeo re ka e dirišago bodireding yeo re e hweditšego mmalong wa rena wa Beibele. Ngwaga o mongwe le mongwe woo re bulago madibogo gotee, re batamelana le go feta.” Ka mo go swanago Trisha o re: “Ka ge bobedi bja rena re sa nyake go tsena dikolotong, ga re ke re elwa ka tšhelete. Ka ge re na le lenaneo le le swanago la tirelo, re sepela gotee ge re eya maetong a go boela le dithutong tša Beibele gomme seo se re thuša go gola moyeng le go matlafatša lenyalo la rena.”

10. Ge re etiša Mmušo pele e bile re bona thekgo ya Modimo, go bota ga rena Jehofa go kgomega bjang?

 ¹⁰ Re bota Jehofa ka mo go oketšegilego ge re etiša pele dikgahlego tša Mmušo, re bona thekgo ya gagwe le ge re bona a araba dithapelo tša rena. Go fihla bokgoleng bjo itšego, seo se direga go Bakriste ka moka ba botegago. Eupša bao ba lego tirelong ya nako e tletšego ba lemoga gore go ithekga ka Jehofa go ba thuša gore ba se tlogele bobulamadibogo. (Bala Mateo 6:30-34.) Curt, yo e lego mmulamadibogo e bile e lego mothuši wa molebeledi wa tikologo o ile a dumela go etela phuthego yeo e lego bokgole bja diiri tše pedi le seripa go tloga mo a dulago gona. Yena le mosadi wa gagwe yoo le yena e lego mmulamadibogo, ba be ba na le peterole ka koloing yeo e bego e ka ba iša phuthegong yeo eupša ba ka se kgone go boa, gomme o be a tla hwetša mogolo wa gagwe ka morago ga beke. Curt o re: “Ke ile ka thoma go ipotšiša ge e ba ke be ke dirile phetho e nepagetšego.” Ka morago ga go rapela, ba ile ba phetha ka gore ba tla amogela kabelo yeo, ba kgodišegile gore Modimo o tla ba nea dinyakwa tša bona. Ge ba le kgauswi le go tloga, kgaetšedi yo mongwe o ile a ba leletša gomme a ba botša gore o ba swaretše mpho. E be e le tšhelete e lekanago tlwaa gore ba kgone go ya phuthegong yeo le go boa. Curt o re: “Ge o eba le diphihlelo tše bjalo kgafetšakgafetša, go bonolo gore o bone thekgo ya Jehofa.”

11. Le ge babulamadibogo ba lebeletšana le mathata, na ba hwetša ditšhegofatšo?

¹¹ Ee, babulamadibogo ba hweditše gore ge ba šoma ka thata tirelong ya Jehofa le go hlagolela tswalano ya kgauswi le yena, ba ‘fihlelelwa’ ke ditšhegofatšo tše dintši kudu. (Doit. 28:2) Eupša bobulamadibogo bo na le ditlhohlo tša bjona. Bahlanka ka moka ba Modimo ba lebeletšana le mathata ao a bakilwego ke borabele bja Adama. Le ge babulamadibogo ba bangwe ba ile ba swanelwa ke go kgaotša tirelo ya bona ka nakwana, gantši tše dingwe tša ditlhohlo tša tirelo ye ba ka lebeletšana le tšona goba ba di phema. Ke’ng seo se ka thušago babulamadibogo gore ba dule ba thabela tokelo ya bona ya tirelo?

12, 13. (a) Mmulamadibogo o swanetše go dira’ng ge e ba a thatafalelwa ke go fihlelela diiri tša gagwe? (b) Ke ka baka la’ng go le bohlokwa gore mmulamadibogo a bale Beibele letšatši le letšatši, a be le thuto ya motho ka noši le go naganišiša?

¹² Babulamadibogo ba bantši ba dula ba swaregile. Ka ge go ka ba thata gore ba dire dilo ka moka, go bohlokwa gore ba be le thulaganyo. (1 Bakor. 14:33, 40) Ge e ba mmulamadibogo a thatafalelwa ke go fihlelela diiri tša gagwe, go ka nyakega gore a lekole lefsa kamoo a dirišago nako ya gagwe. (Baef. 5:15, 16) A ka ipotšiša gore: ‘Ge e le gabotse ke diriša nako e kae ke ithabiša le go itapološa? Na ke swanetše go itaya kutšwanyana? Na nka beakanya nako ya ka ya mošomo wa boiphedišo?’ Mokriste yo mongwe le yo mongwe a ka dumela gore go bonolo gore motho a dire dilo tšeo a bego a sa di rulaganya; ka gona bao ba lego tirelong ya nako e tletšego ba swanetše go hlahloba lenaneo la bona kgafetšakgafetša gomme ba bone moo ba ka lokišago gona.

¹³ Mmulamadibogo yo mongwe le yo mongwe o swanetše go bala Beibele letšatši le letšatši, a be le thuto ya motho ka noši le go naganišiša. Ka go re’alo, mmulamadibogo o swanetše go itaya gore dilo tšeo di sego bohlokwa di se ke tša mo jela nako ya go dira dilo tša bohlokwa. (Bafil. 1:10) Ka mohlala, nagana ka mmulamadibogo a boa gae ka morago ga go fetša letšatši ka moka bodireding. O rulagantše go diriša mantšiboa ao go lokišeletša diboka tše di tlago. Eupša o thoma pele ka go bala lengwalo leo a le rometšwego. Ke moka o bula khomphutha gore a bale di e-mail le go di araba. Ge a sa le Inthaneteng, o tsena Wepesaeteng e itšego go bona ge e ba theko ya selo seo a se nyakago e theogile. Ge a re phaphara, diiri tše pedi di fedile a se a hlwa a ithuta seo a bego a rulagantše go ithuta sona mantšiboeng ao. Ke ka baka la’ng seo e le bothata? Boradipapadi bao ba nago le bokgoni ba swanetše go hlokomela mebele ya bona ge  e ba ba nyaka go dula ba le bjalo bophelo ka moka. Ka mo go swanago, babulamadibogo ba swanetše go ba le lenaneo la ka mehla la thuto ya motho ka noši leo le tla ba matlafatšago moyeng gore ba tšwele pele ba le bodireding bja nako e tletšego.—1 Tim. 4:16.

14, 15. (a) Ke ka baka la’ng babulamadibogo ba swanetše go phela bophelo bjo bonolo? (b) Ke’ng seo mmulamadibogo a swanetšego go se dira ge a na le mathata?

¹⁴ Babulamadibogo bao ba atlegago ba katanela go phela maphelo a bonolo. Jesu o kgothaleditše barutiwa ba gagwe gore ba be le leihlo le le lokilego. (Mat. 6:22) O ile a phela bophelo bjo bonolo gore a kgone go phetha bodiredi bja gagwe ntle le tšhitišo. Ke ka baka leo a ilego a re: “Diphukubje di na le melete le dinonyana tša legodimo di na le dihlaga, eupša Morwa wa motho ga a na mo a ka latšago hlogo ya gagwe gona.” (Mat. 8:20) Mmulamadibogo yo a nyakago go ithuta mohlaleng wa Jesu o swanetše go gopola gore ge a ka ba le dilo tše dintši tše di bonagalago, ke moo go tla nyakegago gore a di hlokomele, a di lokiše goba a reke tše dingwe ge di senyega.

¹⁵ Babulamadibogo ba a lemoga gore ga se ba hwetša tokelo ye ya tirelo ka gobane ba le kaone go feta ba bangwe. Go e na le moo, mpho goba tokelo le ge e le efe ya tirelo yeo re ka bago re na le yona re e neilwe ka baka la botho bjo bogolo bja Modimo. Ka gona, e le gore o tšwele pele o le mmulamadibogo, o swanetše go ithekga ka Jehofa. (Bafil. 4:13) Mathata ona a tla ba gona. (Ps. 34:19) Ge go eba bjalo, babulamadibogo ba swanetše go tsoma tlhahlo go Jehofa gomme ba mo dumelele gore a ba thuše, go e na le gore ba kitimele go tlogela tirelo ya bona. (Bala Psalme 37:5.) Ge ba bona thušo e lerato ya Modimo, ba tla mmatamela kudu ka ge e le Tatago bona yo lerato wa legodimong.—Jes. 41:10.

16. Ke’ng seo o swanetšego go se dira ge o nyaka go ba mmulamadibogo?

¹⁶ Ge e ba o nyaka ditšhegofatšo tšeo di thabelwago ke bao ba lego tirelong ya nako e tletšego, botša Jehofa. (1 Joh. 5:14, 15) Boledišana le bao ga bjale e lego babulamadibogo. Ipeele dipakane tšeo di tlago go go thuša go ba mmulamadibogo. Keith le Erika ba dirile sona seo. Ba be ba šoma, gomme go swana le banyalani ba bangwe bao ba lekanago le bona, ba itše go nyalana ba reka ntlo le koloi e mpsha. Ba re: “Re be re nagana gore dilo tše di tla re kgotsofatša—eupša re be re iphora.” Ge Keith a be a felelwa ke mošomo, o ile a tšea bobulamadibogo bja go thuša. O re: “Bobulamadibogo bo ile bja nkgopotša lethabo leo le tlišwago ke go ba bodireding.” Ba ile ba gwerana le banyalani ba babulamadibogo bao ba ilego ba ba thuša go bona lethabo leo le tlišwago ke go phela bophelo bjo bonolo le go bula madibogo. Ke’ng seo Keith le Erika ba ilego ba se dira? Ba re: “Re ile ra ngwala lelokelelo la dipakane tša moya, ra le kgomaretša setšidifatšing gomme ra swaya pakane e nngwe le e nngwe yeo re bego re e fihlelela.” Ge nako e dutše e eya, ba ile ba ba babulamadibogo.

17. Ke ka baka la’ng e le gabohlale gore o dire diphetogo lenaneong la gago goba tseleng yeo o phelago ka yona gore o be mmulamadibogo?

¹⁷ Na o ka tšea bobulamadibogo? Ge e ba o ka se kgone go ba mmulamadibogo gona bjale, dira sohle seo o ka se kgonago gore o batamelane le Jehofa ka go tšea karolo ka botlalo bodireding. Ka morago ga go rapela le go naganišiša, o ka hwetša gore go dira diphetogo lenaneong la gago le tseleng yeo o phelago ka yona go ka go thuša gore o bule madibogo. Ge e ba o ka kgona go bula madibogo, ditšhegofatšo tšeo o tlago go di hwetša di tla feta kgole boikgafo bjo o tla bago o bo dirile. O tla kgotsofatšwa kudu ke go etiša pele dikgahlego tša Mmušo go e na le go etiša tša gago. (Mat. 6:33) O tla hwetša lethabo le legolo leo le tlišwago ke go fa. Go feta moo, o tla ba le dibaka tše di oketšegilego tša go naganišiša ka Jehofa le go bolela ka yena gomme seo sa dira gore o mo rate kudu le go mo thabiša.