1, 2. (a) Kico sa pasa ora nos ta pensa riba un persona cu nos ta stima y ta papia di dje? (Wak e prome plachi.) (b) Cua ta algun pregunta cu nos lo analisa?

 ORA nos ta pensa riba un hende cu nos ta stima y ta papia di dje, nos amistad cu e persona ey ta bira mas fuerte. Esey ta conta tambe pa nos amistad cu Jehova Dios. Tempo cu David tabata wardador di carne, el a pasa hopi anochi ta medita riba e Creador incomparabel di e cielo yen di strea. David a skirbi: “Ora mi contempla bo cielonan, e obra di bo dedenan, e luna y e streanan cu abo a establece, ta kico hende ta, cu bo ta corda di dje? Y e yiu di hende, cu bo ta haci caso di dje?” (Sal. 8:3, 4) Y despues cu apostel Pablo a analisa e manera maraviyoso cu Jehova tabata cumpli cu Su proposito pa cu cristiannan ungi, el a declara: “O ki profundo e rikesa, sabiduria y conocemento di Dios ta!”—Rom. 11:17-26, 33.

² Ora nos ta den sirbishi di veld, nos ta pensa riba Jehova y papia tocante dje. Esey so caba ta beneficia nos. Hopi pionero a ripara cu nan amor pa Jehova a crece como cu nan ta pasa mas tempo den sirbishi. Sea cu bo ta trahando pionero caba of bo ta purbando di alcansa e meta ey, ta bon pa bo medita riba e siguiente preguntanan: Con e sirbishi di pionero por fortalece mi amistad cu Jehova? Si mi ta pionero, kico lo yuda mi keda den e sirbishi special aki cu ta duna mi asina tanto satisfaccion? Ki cambionan mi tin cu haci pa mi por cuminsa traha pionero? Prome, laga nos considera algun manera cu e trabou di pionero por fortalece nos amistad cu Dios.

3. Ora nos ta papia den sirbishi tocante e bendicionnan cu e Reino lo trece, ki efecto esey tin riba nos?

³ Nos ta hala mas cerca Jehova ora nos ta papia cu otro hende tocante e bendicionnan cu e Reino lo trece.  Cua ta e textonan di Bijbel cu bo gusta uza ora bo ta predica di cas pa cas? Kisas bo texto preferi ta Salmo 37:10 y 11; Daniel 2:44; Juan 5:28 y 29 of Revelacion 21:3 y 4. Cada bes cu nos papia cu un hende tocante e promesanan ey, nos mes ta ser recorda cu “tur don cu ta bon y tur regalo perfecto” ta bin di nos Dios generoso. Esaki ta hala nos mas cerca dje.—Sant. 1:17.

4. Dicon nos ta haya mas aprecio pa Jehova su bondad ora nos ta predica na otro hende?

⁴ Nos ta haya mas aprecio pa e berdad ora nos mira con infeliz y indefenso mayoria di hende cu nos ta predica na dje ta. Hende den mundo no tin un guia confiabel pa yuda nan haya satisfaccion y felicidad. Mayoria di nan ta preocupa pa futuro y no tin ningun speransa. Nan ta busca e nificacion di bida, pero hasta esnan cu ta religioso sa masha poco di Bijbel. Nan ta parce e hendenan di Ninive di antiguedad. (Lesa Jonas 4:11.) Ora nos ta participa mas tanto den sirbishi, nos ta mira mas cla e contraste entre e condicion spiritual di e hendenan cu nos ta predica na dje y e condicion di e pueblo di Jehova. (Isa. 65:13) Tambe nos ta ser recorda di e bondad di Jehova, ya cu e ta haci mas cu djis satisface e necesidadnan spiritual di su pueblo so. Si nos wak bon, e ta duna tur hende e chens di haya consuelo y un berdadero speransa.—Rev. 22:17.

5. Con nos ta cuminsa mira nos propio problemanan ora nos ta yuda otro hende siña e berdad?

⁵ Nos ta siña preocupa menos cu nos propio problemanan ora nos ta yuda otro hende siña e berdad. Un pionero regular cu yama Trisha a comproba esaki ora cu su mayornan tabata den proceso di divorcio. El a conta cu esey tabata un di e periodonan di mas dificil den su bida. Un dia, e tabata basta tristo y tabatin gana di keda cas. Pero toch el a dicidi di bay studia cu tres mucha cu tabatin un situacion masha dificil na cas. Nan tata a bandona e famia, y nan ruman homber a maltrata nan. Trisha a bisa: “Mi problema- y preocupacionnan no tabata nada na comparacion cu di nan. Pero segun cu nos tabata studia, nan wowo a cuminsa briya y nan a hari di emocion y alegria. E muchanan ey tabata un regalo di Jehova, vooral e dia ey.”

6, 7. (a) Con nos fe ta bira mas firme ora nos ta siña hende e berdadnan di Bijbel? (b) Con nos ta sinti ora nos mira cu principionan biblico ta yuda nos studiantenan hiba un mihor calidad di bida?

⁶ Nos fe ta bira mas firme ora nos ta siña hende e berdadnan di Bijbel. Den tempo di apostel Pablo tabatin algun hudiu cu no tabata haci loke nan a siña otro hende. Pablo a skirbi tocante nan: “Abo cu ta siña otro hende, no ta siña bo mes?” (Rom. 2:21) Den nos tempo, e pioneronan ta completamente diferente. Por lo general, nan tin hopi oportunidad pa siña hende e berdad y pa dirigi estudio di Bijbel. Pa nan por haci esey bon, nan tin cu prepara pa cada estudio y, tin biaha, busca informacion pa contesta cierto pregunta. Un pionero cu yama Janeen a splica: “Cada bes cu mi haya un oportunidad pa siña otro hende e berdad, mi ta ripara cu esaki ta graba e berdadnan ey mas profundamente den mi mente y mi curason. Como resultado, mi fe no ta keda para un caminda sino ta sigui crece.”

⁷ Nos ta haya mas aprecio ainda pa e sabiduria di Dios ora nos mira cu principionan biblico ta yuda nos studiantenan hiba un mihor calidad di bida. (Isa. 48:17, 18) Esey ta motiva nos mas ainda pa sigui aplica e principionan aki den nos mes bida. Adrianna, un otro pionero, a bisa: “Ora hende ta confia den nan mes sabiduria, nan bida por ta un desaster. Pero ora nan cuminsa confia den e sabiduria di Jehova, bo ta mira e beneficionan di biaha.” Anto  un pionero cu yama Phil a bisa: “Bo ta mira cu Jehova si por cambia hende cu no a logra cambia nan bida ora nan a purba di hacie riba nan mes.”

8. Ki efecto trahamento den sirbishi hunto cu nos rumannan tin riba nos?

⁸ Nos ta ser anima ora nos ta traha hunto cu nos rumannan den sirbishi. (Prov. 13:20) Mayoria di pionero ta pasa basta tempo den sirbishi hunto cu otro rumannan, y esey ta duna nan hopi oportunidad pa nan “por tin un intercambio di estimulo.” (Rom. 1:12; Lesa Hebreonan 10:24.) Un pionero cu yama Lisa a comenta: “Na trabou semper tin un spirito di competencia y hacimento di jaloers. Tur dia bo ta haya bo cu redashi y papiamento di palabra malo. Tur hende kier bay dilanti cueste loke cueste. Tin biaha, nan ta haci bofon di bo pa motibo di bo conducta cristian. En cambio, traha den sirbishi cu bo rumannan ta masha edificante. Na final di dia, mi ta yega cas anima, ni maske con cansa mi ta.”

9. Ora un esposo y esposa ta traha pionero hunto, con esey ta yuda nan matrimonio?

⁹ Bo matrimonio ta bira mas fuerte ora bo ta traha pionero hunto cu bo casa. (Ecl. 4:12) Madeline, kende ta traha pionero hunto cu su casa, a splica: “Ami cu mi casa por papia tocante nos dia den sirbishi of tocante un punto cu nos a haya den nos lesamento di Bijbel cu nos por uza den sirbishi. Cada aña cu nos pasa trahando hunto como pionero, nos ta bira mas pega cu otro.” Trisha, menciona anteriormente, tambe a bisa algo similar: “Nos tur dos ta dicidido pa no hinca nos curpa den debe, pues nos no tin pleito tocante placa. Como cu nos tin e mesun orario  di sirbishi, nos ta bay estudio y rebishita hunto, y esey ta hala nos mas cerca otro y mas cerca Jehova.”

10. Kico ta pasa cu nos confianza den Jehova ora cu nos pone su Reino na prome luga y ta mira cu e ta apoya nos?

¹⁰ Nos confianza den Jehova ta crece ora cu nos pone su Reino na prome luga y ta mira cu e ta apoya nos y contesta nos oracionnan. Ta berdad cu, te na cierto grado, tur cristian leal ta confia den Jehova. Pero esnan cu ta pionero ta descubri cu nan mester confia den Jehova pa nan por keda traha pionero. (Lesa Mateo 6:30-34.) Por ehempel, Curt ta traha pionero hunto cu su esposa y ta sirbi como superintendente di circuito substituto. E rumannan a pidie bishita un congregacion cu ta keda dos ora y mei for di su cas, y el a acepta pa hacie. Pero su auto tabatin net suficiente gasolin pa bay, pero no pa bin bek, y ainda tabata falta un siman p’e cobra su salario di trabou. Curt a conta con el a cuminsa duda si el a haci bon di acepta pa bay bishita un congregacion asina leu. Pero despues di haci oracion, nan a dicidi cu nan lo bay, confiando cu Jehova lo percura pa nan necesidadnan. Net prome cu nan a sali bay, un ruman muher a bel y bisa nan cu e tin un regalo pa nan: tabata precies e suma di placa cu nan tabata falta pa haci e biahe. Curt a bisa: “Ora bo pasa den e sorto di cosnan ey, ta facil pa mira e man di Jehova den e asunto.”

11. Menciona algun bendicion cu pioneronan ta disfruta di dje.

¹¹ Hopi biaha pioneronan ta ripara cu mas intimo nan amistad bira cu Jehova y mas nan haci den sirbishi, mas bendicion nan ta haya. (Deu. 28:2) Pero esey no kiermen cu e trabou di pionero semper ta facil. Tur sirbidor di Dios ta sufri di e consecuencianan di e rebelion di Adam. Aunke ta asina cu algun pionero tabatin cu stop cu nan sirbishi pa un tempo, hopi biaha pioneronan por soluciona of hasta evita situacionnan dificil. Kico por yuda nan sigui disfruta di nan sirbishi privilegia?

12, 13. (a) Kico un pionero mester haci si e tin problema pa yega su ora? (b) Dicon ta asina importante pa traha tempo pa lesa Bijbel tur dia, pa haci estudio personal y pa medita?

¹² Mayoria di pionero tin un programa yen. Kisas ta dificil pa nan logra haci tur cos, y pesey nan mester ta bon organisa. (1 Cor. 14:33, 40) Si un pionero tin problema pa yega su ora, lo e tin cu analisa ta con e ta uza su tempo. (Efe. 5:15, 16) Lo ta bon p’e puntra su mes: ‘Cuanto tempo mi ta dedica realmente na diberticion? Lo mi mester ta mas disciplina? Lo mi por ahusta e orario cu mi ta traha pa gana mi pan?’ Sin duda, tur cristian sa cu ta masha facil pa agrega cosnan innecesario na nan programa. Pues, pioneronan mester evalua nan situacion regularmente y haci cambio si ta necesario.

¹³ Un pionero mester traha tempo pa lesa Bijbel tur dia, pa haci estudio personal y pa medita. Pues, e tin cu disciplina su mes pa no laga actividadnan menos importante kita e tempo cu el a aparta pa cosnan necesario. (Flp. 1:10) Por ehempel, imagina bo cu un pionero ta yega cas despues di un dia largo den sirbishi. E tin pensa di uza e anochi ey pa prepara pa e siguiente reunion. Pero prome e ta bay lesa corant. Despues e ta cende computer y ta lesa su e-mailnan y contesta nan. Unabes e ta online, e ta probecha bay na un website pa wak si e prijs di un articulo cu e kier cumpra a baha. Anto sin cu e ripara, casi dos ora a pasa y ainda e no a cuminsa prepara pa reunion. Dicon esaki ta un problema? Wel, si un deportista  profesional kier tin un carera largo, e tin cu cuida su curpa y come saludabel. Di igual manera, pa un pionero por keda den sirbishi di tempo completo, e mester tin un bon programa di estudio personal pa charge su bateria den sentido spiritual.—1 Tim. 4:16.

14, 15. (a) Dicon pioneronan mester tene nan bida simpel? (b) Kico un pionero mester haci si e ta confronta dificultad?

¹⁴ Rumannan cu kier keda den e trabou di pionero ta haci nan best pa tene nan bida simpel, manera Hesus a anima su discipelnan pa haci. (Mat. 6:22) Hesus mes tambe a hiba un bida simpel pa asina e por a cumpli cu su sirbishi sin distraccion. Ta pesey e por a bisa: “Zoro tin hol y parha di cielo tin neishi, ma e Yiu di hende no tin caminda pa pone su cabes.” (Mat. 8:20) Un pionero cu kier siña for di e ehempel di Hesus tin cu corda cu mas cos material e tin, mas cos e tin pa mantene, drecha y reemplasa.

¹⁵ Pioneronan ta realisa cu nan privilegio di sirbishi ta special, pero esey no ta pasobra nan ta mihor cu otro hende. Mas bien, nan sa cu cualkier privilegio of don cu nan por tin ta debi na Jehova su bondad inmereci. Pues, pa un ruman keda den e trabou di pionero, e tin cu confia den Jehova. (Flp. 4:13) Un cos ta sigur, lo surgi problema y dificultad. (Sal. 34:19) Pero ora esey sosode, pioneronan mester busca e guia di Jehova y dun’e un chens di yuda nan, en bes di core bandona nan privilegio di sirbishi. (Lesa Salmo 55:22.) Segun cu nan ta mira con Jehova ta apoya nan cu amor, nan lo sinti nan mas cerca di nan Tata celestial.—Isa. 41:10.

16. Si bo ta desea di traha pionero, kico bo mester haci?

¹⁶ Si bo tambe ta desea di haya e bendicionnan cu pioneronan ta disfruta di dje, bo tin cu laga Jehova sa esey. (1 Juan 5:14, 15) Papia cu rumannan cu ta trahando pionero. Pone metanan cu lo yuda bo bira pionero un dia. Esey ta loke Keith cu Erika a haci. Nan tabata traha henter dia y, mescos cu hopi pareha di nan edad, nan a cumpra un cas y un auto nobo un poco despues cu nan a casa. Nan a admiti: “Nos a kere cu e cosnan ey lo a duna nos satisfaccion, pero esey no tabata e caso.” Ora Keith a perde trabou, el a cuminsa traha pionero auxiliar. El a bisa: “E trabou di pionero a laga mi corda e goso cu bo ta sinti ora bo ta predica.” Nan a bira amigo di un pareha cu tabata traha pionero, y e pareha aki a laga nan mira e felicidad cu bo ta haya ora bo ta hiba un bida simpel y ta traha pionero. Kico Keith cu Erika a haci? “Nos a traha un lista di nos metanan spiritual, peg’e na frishider y a scrap nan un pa un segun cu nos tabata alcansa nan.” Cu tempo, nan por a cuminsa traha pionero.

17. Dicon lo ta sabi pa bo analisa bo situacion pa wak si bo por traha pionero?

¹⁷ Abo por bira pionero? Si bo ta pensa cu na e momentonan aki esey no ta posibel, haci tur loke ta na bo alcance pa participa plenamente den sirbishi. Esaki lo fortalece bo amistad cu Jehova. Bo por pidi su guia den oracion, y despues analisa bo circunstancia. Kisas lo bo mira cu si bo djis haci algun cambio den bo programa of den bo estilo di bida, lo bo por bira pionero. Ora bo cuminsa traha pionero, lo bo ripara cu e goso cu bo ta haya ta supera cualkier sacrificio cu bo ta haci. Lo bo sinti mayor satisfaccion, pasobra bo ta pone e Reino prome cu bo propio interesnan. (Mat. 6:33) Lo bo sinti e felicidad cu ta bin di duna. Y lo bo tin mas oportunidad pa pensa riba Jehova y papia di dje, y esaki lo haci bo amor p’e mas profundo y lo alegra su curason.