1, 2. (a) Dahme kin wiawi ni atail medewe oh koasoia duwen emen me kitail poakohng? (Menlau kilang tepin kilel.) (b) Peidek dah kan me kitail pahn koasoiapene?

 NI ATAIL kin medewe oh koasoia duwen emen me kitail poakohng, atail nanpwungmwahu reh kin kehlailla. Met pil duwehte atail nanpwungmwahu rehn Siohwa Koht. Nin duwen sounsilepen sihpw men, nipwong tohto Depit kin kilengdalahng usu kan oh doudouloale uwen kapwuriamwei en wiepen limen Sounkapikadao. E ntingihedi: “Ni ei kin kilengdawohng pahnlahng, iei wiepen nin limomwi, maram oh usu kan me komw ketin koasoanedier nan dewerail—dahkot aramas, me komwi kin ketin kupwukupwure; aramas mwahl, me komwi kin ketin apwahpwalih?” (Mel. 8:3, 4) Pil ni wahnpoaron Pohl eh ntingihada duwen kupwuren Siohwa ong Kristian keidi kan eh kin pweida ni ahl kaselel, e nda: “Ia uwen loalen sapwellime erpit oh kupwurokong!”​—Rom 11:17-26, 33.

² Ni atail kohla kalohk, kitail kin medewe oh koasoia duwen Siohwa. Met kin kakehlakahla atail nanpwungmwahu reh. Pioneer tohto kin pehm me arail limpoak ong Koht kin laudla pwehki re kak kihong arail ahnsou laud ong doadoahk en kalohk. Iren onop wet pahn sewese pioneer kan oh irail me men wiahla pioneer ren medewe kanahieng duwen peidek pwukat: Ia duwen doadoahk en pioneer eh kak kakehlakahla atail nanpwungmwahu rehn Siohwa? Ma ke kin iang pioneer, dahme pahn seweseiuk ken pousehlahte nan doadoahk tohrohr wet? Ma ke saikinte iang pioneer, dahme ke kak wia pwe ken kak tepida iang doadoahk wet? Kitail koasoiapene mahs ahl akan me doadoahk en pioneer kak kakehlakahda atail nanpwungmwahu rehn Koht.

3. Ia duwen atail koasoia duwen kapai kan me Wehin Koht pahn wahdo eh sewese kitail?

³ Ni atail koasoia duwen kapai kan me Wehin Koht pahn wahdo, kitail kin karanihala Siohwa. Mehnia iren Paipel me ke keieu perenki doadoahngki ni omw kin kalohk ihmw lel ihmw? Mwein ke perenki Melkahka 37:10, 11; Daniel 2:44; Sohn 5:28, 29; de Kaudiahl 21:3, 4. Ahnsou koaros me kitail koasoiaiong meteikan duwen inou pwukat, e katamankihong kitail me “soangen wiawi sapan koaros oh kisakis mwahu koaros” kin kohsang rehn Siohwa, atail Koht sapan. Met kin kahrehiong kitail en karanihala ih.​—Seims 1:17.

4. Dahme kahrehda atail kalahnganki sapwellimen Koht kupwuramwahu kin laudla ni atail kalohk ong meteikan?

⁴ Ni atail kin kilang pali laud en aramas akan ar nsensuwed oh anahne sawas, met kin kalaudehla atail kalahnganki padahk mehlel. Aramas nan sampah wet sohte kin ale sawas me re anahne pwe ren uhdahn pweida oh peren. Me tohto kin pwunodki dahme pahn wiawi ahnsou kohkohdo oh sohte arail koapworopwor. Irail kin raparapahki ia wehwehn mour. Pil tohto me kin leme me irail poadidi ong pelien lamalam sohte uhdahn ese Paipel. Irail duwehte mehn Ninipe ko. (Wadek Sona 4:11. *) Ni atail kalaudehla atail koasoakoasoiong aramas akan nan kalohk, kitail kin kalaudehla atail pohnese ia uwen mwahu en Siohwa eh kin ketin apwahpwalih kitail. (Ais. 65:13) Ahpw Siohwa kin ketin wia laudsang apwahpwalih anahn en sapwellime aramas akante. E kin ketikihong aramas koaros ahnsou mwahu en ale kamweit oh ahneki koapworopwor mehlel. Met katamankihong kitail uwen mwahu en Siohwa.​—Kaud. 22:17.

5. Ia atail pepehm ong atail kahpwal kan ni atail kin padahkihong meteikan duwen padahk mehlel?

⁵ Ni atail kin padahkihong meteikan padahk mehlel, kitail sukuhlki en dehr nohn pwunodki atail kahpwal kan. Trisha, me wia emen pioneer, nda me e uhdahn pwunod ni ahnsowo me eh pahpa oh nohno mweipeseng. Ehu rahn e uhdahn nsensuwed oh sohte men kohla kalohk. Mendahki met, e kohla wia onop Paipel. E onop rehn seri silimen me keirda nan peneinei ehu me ahneki kahpwal tohto. Arail pahpao kohkohsang irail oh riarail pwutak laudo kin lemei ong irail. Trisha nda: “Kahpwal oh nsensuwed koaros me I ahneki sohte pahrekiong arail kahpwal ko. Ni at kin onop Paipel, pohn masarail ko kin perenda oh re kin kouruhr pwehki arail peren. Rahno uhdahn sansal me seri pwukat iei kisakis ehu sang rehn Siohwa.”

6, 7. (a) Ia duwen atail pwoson eh kin kehlailla ni atail padahki padahk mehlel en Paipel? (b) Ia atail pepehm ni atail kilang kaweid kan en Paipel eh sewese neitail tohnsukuhl kan en Paipel kamwahwihala arail mour?

⁶ Ni atail padahkihong meteikan padahk mehlel, atail pwoson kin kehlailla. Wahnpoaron Pohl ntingkihlahng ekei mehn Suhs ko nan eh ahnsou me sohte kin wia dahme re padahkihong meteikan ren wia: “Ke kin padahkih meteikan–a dahme ke sohte pil padahkihki pein kowe?” (Rom 2:21) Pioneer kan kalapw ahneki ahnsou mwahu tohto pwehn padahkihong meteikan padahk mehlel oh onop Paipel rehn meteikan. Pwe ren pweida mwahu, re anahne padahki mahs pein irail. Re anahne kaunopada ong ehuehu onop oh pil wia roporop kan pwehn sapengala peidek kan. Pioneer men me ede Janeen kawehwehda me ehuehu ahnsou me e kin padahkihong meteikan padahk mehlel, eh pwoson padahk pwukat kin kehlailla.

⁷ Ni atail kilang kaweid kan en Paipel eh sewese neitail tohnsukuhl en Paipel kan kamwahwihala arail mour, e kin kalaudehla atail  kesempwalki sapwellimen Koht erpit. (Ais. 48:17, 18) Met kahrehiong kitail en pousehlahte doadoahngki kaweid pwukat nan atail mour. Pioneer men me ede Adrianna, nda: “Mouren aramas kak mi nan apwal ni arail kin koapworopworki pein arail loalokong. Ahpw ni arail tepida koapworopworki sapwellimen Siohwa erpit, re mwadang tepida kilang kamwahu kan.” Pioneer men me ede Phil nda me e pwuriamweikihla eh kilang aramas akan ar kak wekidala arail mour pwehki sawas sang Siohwa.

8. Ia duwen atail iang riatail Kristian kan nan kalohk eh sewese kitail?

⁸ Atail iang riatail Kristian kan nan kalohk kin kangoange kitail. (Lep. Pad. 13:20) Ahnsou laud pioneer kan kin ieiang riarail Kristian kan nan kalohk. Met kihong irail ahnsou mwahu ren “sawaspene” de kangoange emenemen. (Rom 1:12; wadek Lepin Padahk 27:17.) Pioneer men me ede Lisa kawehwehda me ni eh wasahn doadoahko, aramas ako kin peirinpene oh pahn wia soahng koaros re kak pwehn tiengla mwohn meteikan. Rahn koaros e kin rong aramas akan lipahned oh peined. E doula koasoia: “Mie pak aramas ako kapailoke de kouruhrkin ie pwehki ei wiewiahn Kristian. Ahpw ei kin iang iengei Kristian kan nan kalohk kin uhdahn kangoange ie. Ni imwilahn rahno, I pwurala imweio nsenamwahu mendahki I uhdahn pwangada.”

9. Ni emen eh kin iang eh pwoudo pioneer, ia duwen met eh sewese ara mouren pwopwoud?

⁹ Ni atail kin iang atail pwoud pioneer, atail mouren pwopwoud kin kehlailla. (Ekl. 4:12) Madeline, me iang eh pwoudo pioneer, koasoia: “Ngehi oh ahi pwoudo kak koasoakoasoiapene dahme se wia nan kalohk de mehkot se wadek sang nan at wadawad en Paipel me se  kak doadoahngki nan kalohk. Sounpar koaros me se pioneer, se kin karanihala emenemen.” Pioneer men me ede Trisha nda me ih oh eh pwoudo pwungkihda ira en dehr pwainda soahng kan me pweilaud ong ira. Imwilahn met, ira sohte kin akamaiki mwohni. Ira pil kin ehu pwurala rehn tohnihmw kan me perenki rong oh wia ara onop en Paipel kan. Met sewese ara mouren pwopwoud en kehlailla.

10. Ni atail kin mwohneki mahs Wehio oh pehm sapwellimen Koht sawas, ia duwen met eh kamwakid atail likih Siohwa?

¹⁰ Atail likih Siohwa kin laudla ni atail mwohneki mahs Wehio, pehm sapwellime sawas, oh kilang eh ketin sapengala atail kapakap kan. E mehlel me Kristian lelepek koaros kin likih Siohwa. Ahpw pioneer kan kin diarada me ihte sang arail likih Siohwa me re kak pousehlahte pioneer. (Wadek Madiu 6:30-34.) Curt me wia pioneer men oh ekei pak kin wilian sounapwalih me kin seiloak, ale luhk en mwemweitla ni mwomwohdiso ehu me dohkihsang imweo awa riau elep. Eh pwoudo pil wia pioneer men. Kahs me mi nan werera sidohsao itarongehte ira en lella ni mwomwohdisowo ahpw sohte kak pwurodo, oh Curt pahn payday wihk ehu mwuhr. Curt nda me ira ekis pweiek en kohla. Ahpw ira kapakapki oh pilada ira en kapwaiada pwukoa wet. Ira likih me Koht pahn ketin apwalihala ara anahn akan koaros. Mwohnte ara kohkohla, emen sister delepwohnla oh nda me e men kihong ira kisakis ehu. Kisakiso iei uwen mwohnio me ira anahne ong ara seiloako. Curt nda me ni soahng pwukat kin pwurepwurehng wiawi, e kin mengei en kilang me Siohwa iei me kin ketikihong kitail dahme kitail anahne.

11. Ia ekei kapai kan me pioneer kan kin alehdi?

¹¹ Pioneer kan kalapw nda me ni arail karanihala Koht oh kalaudehla arail papah ih, kapai kan me re ale pil tohtohla. (Deud. 28:2) Ahpw doadoahk en pioneer sohte kin mengei ahnsou koaros. Kitail koaros kin lelohng lokolok pwehki soh unsek oh pil pwehki sampah suwed wet. Ekei pak kahpwal kan kin kahrehiong pioneer kan ren uhdihsang arail pioneer erein ahnsou kis. Ahpw re kalapw kak kapwungala de soikala kahpwal pwukat. Dahme kak sewese pioneer kan ren pousehlahte nan arail doadoahk tohrohr wet?

12, 13. (a) Dahme pioneer men anahne wia ma e apwalki lel eh awahn kalohk? (b) Dahme kahrehda e uhdahn kesempwal en koasoanehdi ahnsoun wadawad Paipel rahn koaros, wia pein onop en Paipel oh doudouloale?

¹² Pali laud en pioneer kan uhdahn kedirepw. E kak apwal en wia soahng koaros, eri e kesempwal en wiahda koasoandi mwahu. (1 Kor. 14:33, 40) Ma pioneer men apwalki wiahda eh awahn kalohk kan, e anahne medemedewe mwahu ia duwen eh kin doadoahngki eh ahnsou. (Ep. 5:15, 16) Ele e pahn idek: ‘I kin kihong ahnsou laud ong mehn kamweit kan? I kak wekidala ei koasoandi en doadoahk? I kin kihong ahnsou laud ong soahng kan me sohte nohn kesempwal?’ Pioneer kan anahne idek rehrail peidek pwukat ahnsou koaros oh wiahda wekidekla kan me anahn.

¹³ Pioneer men anahne wiahda ahnsou nan eh koasoandi pwehn wadek Paipel rahn koaros, wia pein eh onop oh doudouloale. Pioneer men anahne tehk mwahu me soahng kan me sohte kesempwal en dehr kihsang eh ahnsou en wia soahng kan me kesempwal. (Pil. 1:10) Karasepe, medewehla pioneer men me pwurodo imweo mwurin eh kalohk rahn ehu pwon. E koasoanehdi me ni soutiko e pahn kaunopada ong mihting me pahn wiawi. Ahpw e tepida mahs wadek nah kisinlikou kan. Ih eri oahnda nah computero oh wadek oh sapengala nah e-mail kan. Erein eh doadoahngki Internet, e kilang pweinen mehkot me e men pwainda. E tehkada me awa riau dauliher ahpw e saikinte tepida kaunopada ong mihtingo. Dahme kahrehda met wia kahpwal ehu? Duwehte soun  mwadong men me anahne ahnsou koaros kang mwenge mwahu pwehn wiahte emen sounmwadong, pioneer kan anahne ahnsou koaros wia pein arail onop Paipel pwe ren kak pousehlahte pioneer.​—1 Tim. 4:16.

14, 15. (a) Dahme kahrehda pioneer kan anahne mourki mour ehu me sohte kedirepwki soahng kan me sohte uhdahn kesempwal? (b) Ma pioneer men lelohng kahpwal, dahme e anahne wia?

¹⁴ Pioneer kan me pweida mwahu kin wia uwen arail kak pwe ren mourki mour ehu me sohte kedirepwki mehkan me sohte uhdahn kesempwal. Iei met me Sises ketin kangoangehki sapwellime tohnpadahk kan ren wia. (Mad. 6:22) E ketin mourki mour ehu me duwehte met pwe sohte mehkot en kak kedirepwe sapwellime doadoahk en kalohk. Ehu pak e mahsanih me kidien wel kan mie deurail, oh menpihr kan mie pasarail, “a Nein-Aramas sohte wasa e kak kaulewei ie tapwi.” (Mad. 8:20) Pioneer kan me sukuhlki sang sapwellimen Sises mehn kahlemeng kin tamataman me ma mie arail kepwe tohto, re pahn kin anahne apwalih, kamwahwihala de wiliandi.

¹⁵ Pioneer kan pohnese me doadoahk tohrohr ehu arail, ahpw re sohte kin medewe me re mwahusang meteikan. Re ese me doadoahk en pioneer iei kisakis ehu sang rehn Siohwa. Eri pwe ren pousehlahte nan doadoahk wet, emenemen pioneer anahne likih Siohwa. (2 Kor. 4:7) E uhdahn pahn mie kahpwal kan. (Mel. 34:19) Ma met wiawi, pioneer kan anahne peki sapwellimen Siohwa kaweid oh mweidohng en ketin sewese irail, ahpw ren dehr mwadangete uhdihsang arail doadoahk en pioneer. (Wadek Melkahka 37:5.) Ni arail kilang duwen Siohwa eh kin ketin apwalih irail ni limpoak, arail nanpwungmwahu reh pahn kehlailla.​—Ais. 41:10.

16. Ma ke men pioneer, dahme ke anahne wia?

¹⁶ Ma ke men pioneer oh ahneki kapai kan me pioneer kan ahneki, kapakapkiong Siohwa duwen met. (1 Sohn 5:14, 15) Koasoiong pioneer kan. Wiahda mehn akadei kan me pahn sewese iuk en wiahla pioneer men. Iei met me Keith oh Erika wia. Duwehte pwopwoud teikan, ira kin doadoahk en mwohni mpen awa 40 nan wihk ehu oh ira pwainda ihmw ehu oh sidohsa kapw mwurinte ara pwopwoudida. Ira nda: “Se leme me mepwukat pahn wahdo nsenamwahu, ahpw soh.” Mwurin Keith sohla eh doadoahk, e tepida wia sawaspen pioneer. E nda: “Doadoahk en pioneer kin katamankihong ie ia uwen peren laud me kohsang doadoahk en kalohk.” Ira kompoakepahnkihla pwopwoud ehu me pil kin pioneer me sewese ira en pohnese me doadoahk en pioneer oh ahneki mour me sohte kedirepwki soahng kan me sohte uhdahn kesempwal kin imwikihla peren laud. Dahme Keith oh Erika wia? Ira ntingihedi ara mehn akadei kan oh kapasahda ni ara aispwoakso. Ni ara kin kapwaiada ehu mehn akadei ko, ira kin irisala. Mwurin ahnsou kis, ira kakehr pioneer.

17. Dahme kahrehda e pahn loalokong en medemedewe kanahieng ma ke kak pioneer?

¹⁷ Ke kak wiahla pioneer men? Ma ke pehm me ke sohte kak wiahla pioneer men ahnsou wet, nantihong laud ken karanihala Siohwa sang ni omw wia uwen omw kak nan doadoahk en kalohk. Ma ke kapakap ong Siohwa oh medewe kanahieng duwen omw irairo, ele ke pahn esehda me omw pahn wekidala ekei omw koasoandi kan pahn mweidohng uhk ken pioneer. Ni omw tepida pioneer, omw peren pahn laudsang tounmetei koaros me ke pahn wiahda. Ke pahn peren pwehki ke kin mwohneki mahs Wehin Koht nan omw mour oh pwehki ke kin sewese laud meteikan. (Mad. 6:33) Ke pahn ahneki ahnsou laud en medewe oh koasoia duwen Siohwa, oh met pahn kalaudehla omw limpoak ong ih oh kaperenda kupwure.