1, 2. a) Pitapash ninanda alicachishpa paimanda parlajpica ¿imata pasan? (Callari dibujota ricupangui.) b) ¿Ima tapuicunatata yachajugrinchi?

IMASHINAMI pitapash alicachishpaca paipi pensarishpa, paimanda cutin cutin parlajushpa paita ashtahuan yanchi, shinallatami Jehová Dioshuanbash cana canchi. Nara rey tucushpaca Davidca llamacunata michishpa purishpami Jehová Diospa rurashcacunapi pensarishpaca nirca: ‘Jahua pachata ricushpaca, canba maqui rurashcatami ricujuni. Lunatapash luzerocunatapash, canmi rurapashcangui. Runaca ¿ima cajpita paitaca yarianguiyari? Huañuna aichayu runaca ¿ima cajpita ricungapaj shamunguiyari? nishpa (Sal. 8:​3, 4). Apóstol Pablopash Jehová Dios paipa munaita ungidocunapi pactachijujta ricushpami nirca: ‘Taita Diosca tucui imatapash charij, ali yuyaita charij, aligutapacha yachajmi’ can nishpa (Rom. 11:​17-26, 33).

² Villachinajushpaca Jehová Diospi pensarishpa, paimanda parlashpami cushijunchi. Ashtaca precursorcunaca ricushcami Diospa Reinomanda villachishpaca Jehová Diosta ashtahuan juyai callariscata. Shinaca precursor regular cashpa catingapaj o precursor regular tucungapaj munajushpaca pensarinami capanchi, precursor canaca imashinata Jehová Diospaman quimirichun ayudahuanga nishpa. Ña precursor cashpaca tapuripaichi ¿imata ayudahuanga precursor regular cashpa catichun? nishpa. Cutin nara precursor cashpaca tapuripaichi precursor cangapaca ¿imatata rurana cani? nishpa. Shinaca precursor canaca Jehová Diospaman ashtahuan quimirichun imashina ayudajta yachajupashunchi.

3. Diospa Reinopi bendiciongunamanda parlashpaca ¿imashinata sintirinchi?

³ Diospa Reinopi bendiciongunamanda parlashpami Jehová Diosman ashtahuan quimirinchi. Villachingapaj llujshishpaca ¿nachu quiquinga Salmo 37:​10, 11​ta, Daniel 2:​44​ta, Juan 5:​28, 29​ta o Apocalipsis 21:​3, 4​ta gentecunaman liinata gushtapangui? Shamuj punllacunapi Jehová Dios imata ruranata parlashpaca, ñucanchillatami Jehová Dios ‘aligutapacha’ caraj Dios cashcata yarinajunchi. Jehovamanda parlashpami paiman ashtahuan quimirinchi (Sant. 1:17).

4. Pipash na ayudajpi gentecuna llaquilla causanajujta ricushpaca ¿imatata cuenta japinchi?

⁴ Pipash na ayudajpi gentecuna llaquilla causanajujta ricushpami Bibliapi yachajushcacunataca ashtahuan alicachinchi. Cai mundopi gentecunaca pipash na aliguta ayudajpimi llaquilla causan. Ashtacacunaca shamuj punllacunapi ima pasanatapash na yachashpami causan. Ali causangapaj munashpapash na ushashcachu. Taita Diosta catinchi nishpapash Bibliapi ima nijujtaca na yachanllu. Cunan tiempopi gentecunaca punda tiempopi Nínive llactamanda gentecuna cuendami can (Jonás 4:​11, liingui). Ashtahuan villachishpami ricunchi, shuj gentecuna espiritualmente yarjaihuan cuenda causanajujpipash, Jehovata sirvijcunaca espiritualmente ali micushcacuna cajta (Is. 65:13). Shinallata, ashtahuan villachishpami ricunchi, ñucanchicunaman yachachishca jahuapash, Jehová Diosca shuj gentecunatapash yachajuichi, aliguta causaichi nishpa invitajujta (Apoc. 22:17).

5. Shujcunaman Bibliamanda yachachinaca ¿imashinata ñucanchi problemacunapi ayudan?

⁵ Shujcunata ayudashpaca ñucanchi problemacunamandaca na ushashcata pinarinajushunllu. Trisha shuti precursora paniguca paipa taitamamacuna divorciarijpimi ninanda llaquirishca carca. Shuj punllaca llaquilla caimandami villachingapajpash na llujshishpa huasipi quedangapaj munarca. Shinapash quimsa uchila huahuagucunaman Bibliamanda yachachingapami rirca. Chai huahuagucunaca taita jichushpa rijpi, rucu turi maltratashpa charishcajpimi juyaipa causanajurca. Trisha shuti panica ninmi: “Paicunapa llaquicunahuan ricujpica ñuca llaquicunaca na imapash cashcarcachu. Bibliamanda yachachijpica imatapash tarishca cuendami huahuagucunaca ninanda cushijurca. Paicunata ricushpami ñucaca pagui Jehová Dios nircani” nin.

6, 7. a) Bibliamanda shujcunaman yachachijpica ¿imashinata ñucanchi fepash shinlliyan? b) Bibliapa consejocunata pactachishpa gentecuna ali causai callarijta ricushpaca ¿imatata ñucanchipash rurangapaj munapanchi?

⁶ Bibliamanda yachachishpaca ñucanchi fetami shinlliyachinchi. Apóstol Pabloca chai tiempopi huaquin judiocuna imata yachajushcata na pactachinajujpimi nirca: ‘Shujcunaman yachachijushpaca ¿imashpata canra na yachajungui?’ nishpa (Rom. 2:21). Shinapash cunan punllacunapi precursorcunaca shuj ali ejemplotami cun. Paicunaca ashtacacunamanmi Bibliamanda parlan yachachinbash. Piman yachachigrijushpapash aliguta prepararishpami yachachin. Huaquin tapuicunata contestangapaca aligutami investigan. Janeen shuti precursora paniguca ninmi: “Shujcunaman Bibliamanda yachachishcacunaca ñuca umapipash, shungupipash tarpushca cuendami quedan. Ñucapa fepash ashtahuanmi shinlliyan” nin.

⁷ Bibliapa consejocunata pactachishpa gentecuna ali causanajujta ricushpaca Jehová Dios ali yachaj Dios cashcatami ashtahuan intindinchi (Is. 48:​17, 18). Bibliapa consejocunata pactachishpa shujcuna ali causanajujta ricushpaca ñucanchipash Bibliapa consejocunata pactachishpa catingapami munanchi.  Adrianna shuti precursora paniguca ninmi: “Gentecuna paicunapilla confiashpaca ashtaca problemacunatami charin. Shinapash ali yachaita charij Jehová Diospi confiashpaca ratomi ali causai callarin” nishpa. Phil shuti huauquipash ninmi: “Munashpapash na cambiai ushashca gentecunatapash Jehová Dios cambiajtami ricushcani” nishpa.

8. Huauquipanicunahuan villachingapaj llujshishpaca ¿imashinata sintiripanchi?

⁸ Huauquipanicunahuan villachishpaca ñucanchillatami animarinchi (Prov. 13:20). Ashtaca precursorcunaca huauquipanicunahuan villachingapaj llujshishpami ‘shujmanda shujmanda’ animarin (Rom. 1:12; Hebreos 10:​24, liingui). Lisa shuti precursora paniguca ninmi: “Trabajopi cumbacunaca envidiozocunami can, paicunalla ashtahuan ali llujshingapaj munajcuna, cuenterocuna, mapa shimicunata parlajcunami can. Testigocunamanda burlarishpami pingaichingapaj munan. Cutin congregacionbi turipanicunahuan villachingapaj rishpaca cushillami sintirini. Chishipi huasiman shaijushca tigrashpapash cushijushcami tigrani” nin.

9. Ishcandi precursorcuna canaca ¿imashinata cusahuarmipura ali causachun ayudan?

⁹ Cusahuarmicuna ishcandi precursorcuna cashpaca ishcandillatami aliguta causan (Ecl. 4:12). Madeline shuti paniguca paipa cusandimi precursorcuna can. Paica ninmi: “Ñuca cusahuanga villachingapaj rishpa ima experienciacunata charishcata, Bibliata liishpa villachingapaj ima textota tarishcatami parlanchi. Chaita ruranami ñucanchitaca cada huata ashtahuan ali llevarichun ayudan” nin. Trisha shuti panigupash ninmi: “Ñuca cusahuanga na dibi tucungapaj munanchichu. Chaimandami culquimandaca na fiñanajunchi. Revisitacunata igual ruraimanda, gentecunamanbash igual Bibliata yachachingapaj rimandami  ashtahuan ali llevarinchi, Jehová Diosmanbash ashtahuan quimirinchi” nin.

10. Diospa Reinota pundapi churashpa Jehová Dios ayudajujta sintishpaca ñucanchi confianzahuanga ¿imata tucun?

¹⁰ Diospa Reinota pundapi churajpi Jehová Dios ayudajujta intindishpa, ñucanchi oraciongunata uyajujta cuenta japishpami paipi ashtahuan confianchi. Tucuicunallatami Jehová Diospi confianchi. Shinapash, Jehová Dios ayudajpillami precursor cashpa catita ushani nijcunaca ashtahuanmi Jehovapi confian (Mateo 6:​30-34, liingui). Curt shuti huauquica paipa huarmindimi precursorcuna can. Shinallata superintendente de circuito sustitutomi can. Paica paipa huasimanda ishcai horas chaupita carropi rishpami shuj congregacionda visitagrijurca. Shinapash ringapallami gasolinataca charirca. Trabajomanda cobrangapajpash shuj semana faltajurcarami. Chaimadami paica rinapachachu cani imashi nishpa pensarirca. Shinapash Jehovata mañashca jipaca, Jehová ayudanapi confiashpami paipa huarmihuanga rishunlla nishpa parlarirca. Ña huasimanda llujshigrinajujpica shuj panigu cayashpami gasolinapa minishtijushca culquita cararca. Chaimandami Curt shuti huauquica nin: “Cashna experienciacunata cutin cutin charishpami Jehová Dios ayudajujta sintishcani” nishpa.

11. Precursorcunaca ¿ima bendiciongunatata chasquin?

¹¹ Jehovata pundapi churashpa sirvij precursorcunaca Jehovaman ashtahuan quimirishpa ashtaca ashtaca bendiciongunatami charishca (Deut. 28:​2). Shinapash Adanba huahuacuna caimandaca paicunapashmi llaquicunata charishca. Huaquingunaca problemacuna ricurijpimi asha tiempota precursor canata saquishca. Shinapash chai problemacunapi aliguta pensarishpa precursor canata saquinaca huaquinbica na minishtirishcachu. Shinaca ¿imata ayudanga precursorcuna cashpa catichun? Huaquin ayudacunata ricupashun.

12, 13. a) Horascunata na pactachi ushajushpaca ¿imatata precursorcunaca rurana can? b) ¿Imamandata precursorcunaca Bibliata liingapaj, estudio personalta charingapaj, imata liishcapi pensaringapaj tiempota llujchina can?

¹² Ashtaca precursorcunaca tauca cosascunata rurana caimandami paicunapa tiempotaca aliguta ricuna can (1 Cor. 14:​33, 40). Horascunata na pactachijushpaca precursorcunaca tapurinami can: “¿Imapash cosascunata rurajuimandachu na pactachijuni? Ñucapa tiempotaca ¿alichu utilizajuni? ¿O yapatachu trabajajuni?” nishpa (Efes. 5:​15, 16). Tucuicunallatami huaquinbica manapash minishtirishca cosascunata rurashpa ñucanchi tiempotaca ocupanchi. Shinapash precursorcunaca paicunapa tiempohuan imata rurajushcata ricushpami minishtirijpica cambiocunata rurana can.

¹³ Precursorcunapaca Bibliata liina, estudio personalta charina, imata liishcapi pensarinaca minishtirishcapachami can. Chaimandami chai minishtirishca cosascunata pundapi churashpa shuj cosascunataca jipaman rurangapaj saquina can (Filip. 1:10). Pensaripashunchi. Shuj precursorca tucui punlla villachishpa huasiman tigrashcanman. Paica tandanajuipa prepararingapami munajun. Shinapash huasiman chayashpaca cartacunata ricun, computadorata prindishpa mensajecunata liishpa contestan, shinallata pai munajushca cosascunapa precio bajarishcatami Internetpi ricun. Na cuenta japijtami casi ishcai horasta chaipi yalishca. Tandanajuipaca na preparari ushashcachu. Shinaca chai huauquica ¿imatata rurana can? Imashinami ali deportista cashpa catingapaca aliguta cuidarina, aliguta alimentarina minishtirin, shinallatami precursor cashpa catingapaca Bibliata liina, estudio personalta  charina, imata liishcapi pensarina minishtirin. Shina rurashpami precursorcunaca espiritualmente cutin shinlliyashpa catin (1 Tim. 4:16).

14, 15. a) ¿Imamandata precursorcunaca minishtirishca cosascunahuanlla causana can? b) Llaquicuna ricurijpica ¿imatata precursorcunaca rurana can?

¹⁴ Ali precursorcunaca minishtirishca cosascunahuanlla causangapami esforzarin. Jesuspash paipa catijcunataca minishtirishca cosascunahuanlla causachunmi animarca (Mat. 6:22). Jesusca Diospa Reinomanda ashtahuan villachingapaj munashpami minishtirishca cosascunahuanlla causarca. Paica nircami: ‘Añascunapash paicuna causana utujuta charinmi. Jahuata rij alasyu animalcunapash tazinda charinmi. Ashtahuangarin Runa Aichayu tucushca ñucaca maigupi siririshpa samanatallapash na charinichu’ nishpa (Mat. 8:20). Jesuspa ejemplota catishpa causangapaj munaj precursorcunaca na ashtaca cosascunata charinapi preocuparishpami ali canman. Ashtaca cosascunata charishpaca chaicunata cuidangapaj, arreglangapaca ashtaca tiempomi minishtirin.

¹⁵ Precursorcunaca Jehová Dios paicunata llaquishpa ayudashcamandami precursorcuna caita ushashca. Na paicunapa esfuerzomandallachu precursorcuna caita ushashca. Chaimandami precursorcuna cashpa catingapaca Jehová Diospa ayudata minishtin (Sal. 121:​1, 2). Llaquicuna, problemacuna ricurijpica Jehovapa ayudata mascashpami Jehová ayudachun saquina can (Sal. 34:19; Salmo 55:​22, liingui). Na ñapash pensarinachu can, precursor canata saquinami cani nishpa. Jehová ayudajujta sintishpaca ashtahuan ashtahuanmi Jehovaman quimiringui (Is. 41:10).

16. Precursor tucungapaca ¿imatata rurana capangui?

¹⁶ Precursor tucushpa ashtaca bendiciongunata charingapaj munashpaca Jehovamanmi parlana cangui (1 Juan 5:​14, 15). Shinallata shuj precursorcunahuanbash parlanallami cangui. Precursor tucungapaj arreglocunatapash ruranami cangui. Keithpa Erikapa ejemplota ricupashun. Paicunaca punlla enteromi trabajan carca. Paicunaca ali causangapaj nishpami cazarashca jipaca huasita, mushuj carrota randirca. Shinapash na cushilla sintirircachu. Trabajomanda llujchijpica Keithca precursor auxiliar tucushpami shuj gentecunaman villachishpa ninanda cushijurca. Shinallata, shuj cusahuarmi precursorcunahuanmi ali apari callarirca. Chai precursorcunami paicunataca minishtirishca cosascunahuanlla cushijushpa precursorcuna tucuchun ayudarca. Chaimandami Keithca Erikahuan parlarishpa shuj hojapi escribirca precursorcuna tucungapaj imata rurana cashcata. Paicunaca ninmi: “Chai hojapi escribishca listataca refrigeradora pungupi churashpami imata ña pactachijushcata ricun carianchi” nishpa. Shinami jipamanga precursorcuna tucurca.

17. Precursor tucungapaj cambiocunata rurashpaca ¿ima bendiciongunatata charipashun?

¹⁷ Cunanbi na precursor tucui ushashpaca ashtahun villachingapaj esforzarishpami Jehovaman ashtahuan quimirina cangui. Jehová Diosta ayudahuai nishpami quiquinba causaipi aliguta pensarina cangui. Huaquinbica imapash cambiocunata rurashpaca precursor tucui ushashunmi. Precursor tucui ushashpaca, ima cambiocunata rurana cashca cashpapash cushillami sintiringui. Ñucanchi munaicunata huashaman saquishpa Diospa Reinota pundapi churashpaca ninandami cushijungui (Mat. 6:33). Shujcunata ayudashcamandapash alimi sintiringui. Ashtahuangarin, Jehovapi pensaringapaj, Jehovamanda parlangapaj, Jehovapaman quimiringapaj ashtahuan tiempota charishpami Jehovapa shungutapash cushichishun.