1, 2. (a) Ano an mahimo magin resulta han paghunahuna ngan pag-istorya mahitungod han usa nga hinigugma? (Kitaa an retrato ha tinikangan hini nga artikulo.) (b) Ano nga mga pakiana an aton hihisgotan?

AN PAGHUNAHUNA ngan pag-istorya mahitungod han usa nga hinigugma mahimo magparig-on han aton relasyon ha iya. Ito liwat an kahimtang han aton relasyon kan Jehova nga Dios. Sugad nga paraataman hin karnero, hi David damu ka gab-i nga nagkinita ha langit nga puno hin mga bitoon ngan namalandong mahitungod han ira waray kapariho nga Maglalarang. Nagsurat hiya: “Kon gintatan-aw ko an imo kalangitan, nga amo an binuhat han imo mga tudlo, an bulan ngan an mga bitoon nga imo ginpahimutang; ano la an tawo nga basi mo hiya mahinumdoman? Ngan an anak han tawo, nga basi mo hiya maduaw?” (Sal. 8:3, 4) Ngan katapos hisgotan kon paonan-o an katuyoan ni Jehova may kalabotan ha espirituwal nga Israel natutuman ha urusahon nga paagi, hi apostol Pablo nagsiring: “An mga bendisyon han Dios abunda gud, ngan an iya kinaadman ngan kahibaro hilarom gud!”—Roma 11:17-26, 33.

² Samtang nakikigbahin kita ha ministeryo, naghuhunahuna ngan nakikiistorya kita mahitungod kan Jehova. Ito mismo may positibo nga mga epekto. Damu nga payunir an naabat nga nagtitikahilarom pa gud an ira gugma ha Dios kay mas daku nga panahon an ira ginagamit ha ministeryo. Payunir ka man yana o nangangalimbasog nga magin payunir, tagda ini: Paonan-o an pagpayunir makakaparig-on han imo relasyon kan Jehova? Kon payunir ka, pakianhi an imo kalugaringon, ‘Ano an mabulig ha akon nga makapadayon hinin makalilipay nga klase han pag-alagad?’ Kon diri ka pa payunir, pakianhi an imo kalugaringon, ‘Ano nga mga pagbag-o an mahimo ko buhaton basi makagpayunir?’ Aton hisgotan an mga paagi nga an pagpayunir makakaparig-on han aton relasyon ha Dios.

3. Ha ministeryo, ano an epekto ha aton han pakiistorya ha iba mahitungod han mga bendisyon han Ginhadian ha tidaraon?

³ An pakiistorya ha iba mahitungod han tidaraon nga mga bendisyon han Ginhadian nabulig ha aton nga magin mas duok kan Jehova. Ano nga teksto an paborito mo gamiton kon nagsasangyaw ka ha balay-balay? An Salmo 37:10, 11 ba; Daniel 2:44; Juan 5:28, 29; o Pahayag 21:3, 4? Ha kada panahon nga nakikiistorya kita ha iba mahitungod hito nga mga saad, napapahinumdoman kita nga an aton mahinatagon nga Dios amo gud an humaratag han “ngatanan nga maopay nga hatag ngan [han] ngatanan nga hingpit nga hatag.” Tungod hini nagigin mas duok kita ha iya.—San. 1:17.

4. Kay ano nga nadudugangan an aton apresasyon ha pagkamaopay han Dios kon aton nakikita an makalolooy nga kahimtang ha espirituwal han iba?

⁴ An pakakita han makalolooy nga kahimtang ha espirituwal han mga tawo nga aton ginsasangyawan nakakadugang han aton apresasyon ha kamatuoran. An mga tawo ha kalibotan waray masasarigan nga giya nga mabulig ha ira nga magin malampuson ngan malipayon. Kadam-an ha ira an nababaraka mahitungod han tidaraon ngan waray hira paglaom. Ginbibiling nira an katuyoan han kinabuhi. Bisan an kadam-an han mga relihiyoso gutiay la an kahibaro ha Kasuratan. Puropariho gud hira han mga tawo ha kadaan nga Ninibe. (Basaha an Jonas 4:11.) Kon mas daku nga panahon an aton igin-gagahin ha ministeryo, mas nakikita naton an kaibahan han kahimtang ha espirituwal han mga tawo nga aton ginsasangyawan ha aton kahimtang sugad nga katawohan ni Jehova. (Isa. 65:13) Napapahinumdoman kita han pagkamaopay ni Jehova tungod kay diri la hiya nagtatagana han aton espirituwal nga mga panginahanglan kondi gin-aaghat liwat niya an ngatanan nga kumarawat hin pagliaw ngan tinuod nga paglaom.—Pah. 22:17.

5. Paonan-o an pagbulig ha iba ha espirituwal nakakaapekto ha aton pagtagad ha aton mga problema?

⁵ An pagtutdo han kamatuoran ha iba nabulig ha aton nga diri sobra nga mabaraka ha aton mga problema. Napamatud-an ini han regular payunir nga hi Trisha han nagdiborsyo an iya mga kag-anak. Hiya nagsiring: “Ito an usa han pinakamakasurubo nga panhitabo ha akon kinabuhi.” Usa ka adlaw masurub-on gud hiya ngan karuyag niya mag-inukoy la ha balay, kondi kinadto gihapon hiya ha iya gindudumarahan hin pag-aram ha Biblia nga tulo nga kabataan nga damu an problema ha pamilya. Ginbayaan hira han ira tatay, ngan mapintas an pagtratar ha ira han ira magurang nga lalaki. Hi Trisha nagsiring: “An bisan ano nga problema o kasakit nga akon naieksperyensyahan gutiay gud la kon itanding ha ira kahimtang. Samtang nag-aaram kami, nakikita ha ira gudtiay nga mata an kahipausa ngan natawa hira tungod han kaeksayted ngan kalipay. Ito nga kabataan regalo tikang kan Jehova, labi na hito nga adlaw.”

6, 7. (a) Paonan-o napaparig-on an aton pagtoo kon igintututdo naton an mga kamatuoran ha Biblia? (b) Kon nakikita naton nga nagtitikaopay an pagkinabuhi han mga estudyante han Biblia pinaagi han pag-aplikar han mga prinsipyo ha Kasuratan, ano an epekto hito ha aton apresasyon ha kinaadman han Dios?

⁶ An pagtutdo han mga kamatuoran ha Biblia nagpaparig-on han aton pagtoo. Ini an iginsurat ni apostol Pablo mahitungod han pipira nga Judio ha iya panahon nga waray magbuhat han ira igintututdo ha iba: “Ikaw nga nagtututdo ha iba, gintututdoan mo ba an imo kalugaringon?” (Roma 2:21) Iba gud an mga payunir yana! Kasagaran na nga damu an ira higayon nga itutdo an kamatuoran ha iba ngan magdumara hin mga pag-aram ha Biblia. Basi magin epektibo ha pagbuhat hito, kinahanglan mag-andam hira para ha tagsa nga pag-aram ngan bangin magsaliksik basi makabaton ha mga pakiana. An payunir nga hi Janeen nagsiring: “Ha kada panahon nga nakakahigayon ako pagtutdo han kamatuoran ha iba, inaabat ko nga mas naisisilsil ito ha akon hunahuna ngan kasingkasing. Sugad nga resulta, mas nagigin marig-on an akon pagtoo.”

⁷ An pakakita nga nagtitikaopay an pagkinabuhi han mga estudyante han Biblia pinaagi han pag-aplikar han mga prinsipyo han Biblia nakakadugang han aton apresasyon ha kinaadman han Dios. (Isa. 48:17, 18) Nabulig ito ha aton nga magin mas determinado  nga padayon nga iaplikar ini nga mga prinsipyo ha aton kinabuhi. Hi Adrianna, nga payunir liwat, nagsiring: “An kinabuhi han mga tawo mahimo magin masamok kon nasarig hira ha ira kalugaringon nga kinaadman. Kondi kon magtikang hira sumarig ha kinaadman ni Jehova, nagpapahimulos dayon hira.” Ha pariho nga paagi, hi Phil nagsiring: “Imo nakikita kon paonan-o nababag-o ni Jehova an mga tawo nga napakyas ha pagbag-o ha ira kalugaringon nga pangalimbasog.”

8. Ano an epekto ha aton han pakig-upod ha aton kabugtoan ha ministeryo?

⁸ An pakig-upod ha aton kabugtoan ha ministeryo nagpaparig-on han aton espirituwalidad. (Prob. 13:20) Kadam-an han mga payunir an nagamit hin daku nga panahon ha ministeryo kaupod han kabugtoan. Naghahatag ini ha ira hin mas damu nga higayon para ha ‘pagdinasigay.’ (Roma 1:12; basaha an Proberbios 27:17.) An payunir nga hi Lisa nagsiring: “Ha trabaho, agsob nga may kompetisyon ngan kaawa. Kada adlaw makakabati ka hin tsismis ngan pamuyayaw. Bubuhaton nira an ngatanan basi malabwan an iba. May mga panahon nga gintatamay o ginyayaangyaangan ka tungod han imo Kristiano nga paggawi. Kondi an pakig-upod ha kabugtoan ha ministeryo makaparig-on gud. Ha kataposan han adlaw, nauli ako nga narepreskohan, bisan kon kapoy gud ako.”

9. Ano an mahimo magin epekto ha aton pag-asawa han pagpayunir upod han aton padis?

⁹ An pagpayunir upod han aton padis nagpaparig-on han aton pag-asawa. (Ekles. 4:12) Hi Madeline, nga nagpapayunir upod han iya bana, nagsiring: “Nakakagahin kami nga mag-asawa hin panahon ha pag-istorya mahitungod han amon magkulop nga pagministeryo o han amon nabasa ha Biblia nga puydi gamiton ha amon ministeryo. Ha kada tuig nga magkaupod kami nga nagpapayunir, nagigin mas duok kami.” Puropariho liwat hito an ginsiring ni Trisha: “Pariho kami nangangalimbasog nga diri makautang, salit diri kami nag-aaway mahitungod ha kwarta. Pariho an amon eskedyol ha ministeryo, salit magkaupod kami ha  amon mga pagbalik bisita ngan pagdumara hin pag-aram ha Biblia. Nakabulig ito nga magin mas marig-on an amon pag-asawa.”

10. Kon gin-uuna naton an Ginhadian ngan naieksperyensyahan an bulig han Dios, ano an epekto hito ha aton pagsarig kan Jehova?

¹⁰ Nadudugangan an aton pagsarig kan Jehova samtang gin-uuna naton an Ginhadian, naieksperyensyahan an iya bulig, ngan nakikita nga ginbabaton niya an aton mga pag-ampo. Oo, an ngatanan nga maunungon nga Kristiano nasarig kan Jehova. Kondi napamatud-an han mga payunir nga makakapabilin la hira nga payunir pinaagi han pagsarig kan Jehova. (Basaha an Mateo 6:30-34.) Hi Curt, nga payunir ngan kasaliwan nga paramangno han sirkito, sinugot nga bumisita ha usa nga kongregasyon nga duha ngan tunga ka oras an biyahe tikang ha ira balay. Payunir liwat an iya asawa. An gasolina ha ira awto igo la tipakadto ha kongregasyon nga ira bibisitahon pero kulang na ito pagtipabalik, ngan usa pa ka semana antes an iya sweldo. Hi Curt nagsiring, “Nagtikang ako pagruhaduha kon husto ba an akon nagin desisyon.” Katapos mag-ampo, nagdesisyon hira nga karawaton an toka, kay nasarig hira nga itatagana han Dios an ira ginkikinahanglan. Antes gud hira lumarga, usa nga sister an tinawag ngan nagsiring nga may regalo hiya ha ira. Kwarta ito nga an kantidad eksakto gud ha ira ginkikinahanglan ha pagbiyahe. Hi Curt nagsiring, “Kon pauroutro ka nga nakakaeksperyensya hin sugad hini, masayon mo makita nga hi Jehova an nagtatagana han aton ginkikinahanglan.”

11. Ano an pipira nga bendisyon nga nakakarawat han mga payunir?

¹¹ Oo, an mga payunir agsob magsiring nga samtang mas damu an ira ginbubuhat ha pag-alagad kan Jehova ngan nangangalimbasog hira nga magin duok ha iya, ‘nahiaabtan’ o nakakakarawat hira hin damu hinduro nga bendisyon. (Deut. 28:2) Kondi an pagpayunir diri pirme masayon. An ngatanan nga surugoon han Dios apektado han mga problema nga resulta han pagrebelde ni Adan. Bisan kon may mga payunir nga kinahanglan umundang anay hin pipira ka panahon, kasagaran na nga an mga problema masusolusyonan o malilikyan pa ngani. Ano an makakabulig ha mga payunir nga makapadayon ha ira pribilehiyo?

12, 13. (a) Kon an usa nga payunir nakukurian pag-abot han ginkikinahanglan nga oras, ano an sadang niya buhaton? (b) Kay ano nga importante gud an pagkaada eskedyol para ha pagbasa han Biblia kada adlaw, personal nga pag-aram, ngan pamalandong?

¹² Kadam-an nga payunir an okupado gud. Bangin makuri mahimo an ngatanan nga buruhaton, salit importante an pagin organisado. (1 Cor. 14:33, 40) Kon an usa nga payunir nakukurian pag-abot han ginkikinahanglan nga oras, bangin kinahanglan usisahon niya utro kon paonan-o niya ginagamit an iya panahon. (Efe. 5:15, 16) Mahimo hiya magpakiana: ‘Ano kadaku nga panahon an akon ginagamit ha kaliawan o pagpahalibway? Kinahanglan ba nga mas disiplinahon ko an akon kalugaringon? Puydi ko ba bag-uhon an akon eskedyol ha trabaho?’ An bisan hin-o nga Kristiano mauyon nga masayon magdugang hin mga buruhaton ha eskedyol; salit bangin kinahanglan regular nga usisahon ini han mga payunir ngan maghimo hin mga pagbag-o kon ginkikinahanglan.

¹³ An pagbasa han Biblia kada adlaw, personal nga pag-aram, ngan pamalandong sadang magin bahin han eskedyol han usa nga payunir. Salit an usa nga payunir kinahanglan may disiplina ha kalugaringon basi an panahon nga iya igin-gahin para hiton importante nga mga butang diri magamit ha diri sugad kaimportante nga mga buruhaton. (Fil. 1:10) Pananglitan, hunahunaa nga inuli hiya ha balay katapos han magkulop nga pagministeryo. Plano niya nga hito nga gab-i mag-aandam hiya para ha mga katirok. Kondi siyahan nagbasa hiya hin mga surat. Katapos gin-abrihan niya an kompyuter ngan nagbasa ngan nagbalos ha mga e-mail. Samtang nag-i-Internet hiya, iya ginkita an usa nga Web site basi hibaroan kon nagbarato na ba an usa nga butang nga iya karuyag paliton. Pakapanginano niya, haros duha ka oras na an linabay ngan waray pa hiya makagtikang ha  iya ginplano nga pag-aram hito nga gab-i. Kay ano nga problema ito? An propesyonal nga mga atleta kinahanglan regular nga kumaon hin masustansya nga pagkaon kon karuyag nira nga mag-iha ha pagin atleta. Ha pariho nga paagi, an mga payunir nagkikinahanglan hin regular nga personal nga pag-aram basi makapadayon ha pagpayunir.—1 Tim. 4:16.

14, 15. (a) Kay ano nga sadang tipigan han mga payunir nga simple an ira pagkinabuhi? (b) Kon an usa nga payunir makaeksperyensya hin mga kakurian, ano an sadang niya buhaton?

¹⁴ An malampuson nga mga payunir nangangalimbasog nga tipigan nga simple an ira pagkinabuhi. Gin-aghat ni Jesus an iya mga disipulo nga magkaada simple nga mata. (Mat. 6:22) Iya gintipigan nga simple an iya kinabuhi basi makapokus ha iya ministeryo. Makausa hiya nagsiring: “An mga garong may mga lungib ngan an katamsihan may mga salag, kondi an Anak han tawo waray kalugaringon nga urukyan nga makakaturogan.” (Mat. 8:20) Kon karuyag han usa nga payunir nga subaron an ehemplo ni Jesus, sadang niya hinumdoman nga kon mas damu an iya materyal nga butang, mas damu an kinahanglan niya mintinaron, aydon, o liwanan.

¹⁵ Maaram an mga payunir nga espesyal an ira pag-alagad, pero diri hira naghuhunahuna nga mas maopay hira ha iba. Lugod, anoman an aton pribilehiyo, tungod ito han diri-matupngan nga pagkabuotan han Dios. Salit basi makapadayon ha pagpayunir, an kada usa kinahanglan sumarig kan Jehova. (Fil. 4:13) Magkakaada mga problema ngan kakurian. (Sal. 34:19) Kon mahitabo ito, an mga payunir sadang mangaro han giya ni Jehova ngan tagan hiya hin higayon nga bumulig, imbes nga umundang dayon ha pagpayunir. (Basaha an Salmo 37:5.) Samtang naieksperyensyahan nira an mahigugmaon nga bulig han Dios, magigin mas duok hira ha iya sugad nga ira mahigugmaon nga langitnon nga Amay.—Isa. 41:10.

16. Kon karuyag mo magpayunir, ano an sadang mo buhaton?

¹⁶ Kon karuyag mo maeksperyensyahan an mga bendisyon nga pariho han naieksperyensyahan han mga payunir, ig-ampo ito kan Jehova. (1 Juan 5:14, 15) Pakiistorya ha mga payunir. Paghimo hin mga tumong nga mabulig ha imo nga magin payunir. Ito an ginbuhat nira Keith ngan Erika. Nagtatrabaho hira hin bug-os-panahon, ngan pariho han damu nga mag-asawa nga ira kaedad, pinalit hira hin balay ngan hin bag-o nga awto waray pag-iha katapos han ira kasal. Hira nagsiring: “Naghunahuna kami nga ito nga mga butang makakatagbaw ha amon—pero waray gud.” Han nawarayan hin trabaho hi Keith, nag-auxiliary payunir hiya. Nagsiring hiya: “An pagpayunir nagpahinumdom ha akon nga daku gud an kalipay han pagministeryo.” Nagin sangkay nira an usa nga mag-asawa nga payunir nga binulig ha ira nga masantop nga an pagpayunir ngan pagkinabuhi nga simple nagriresulta hin duro nga kalipay. Ano an ginbuhat nira Keith ngan Erika? “Naghimo kami hin listahan han amon espirituwal nga mga tumong, iginpaskin ito ha amon pridyeder, ngan gintsekan an tagsa nga tumong kon nakab-ot na namon ito.” Inabot an panahon nga nakagpayunir hira.

17. Kay ano nga maaramon nga pamurubuuton mo kon puydi mo bag-uhon an imo eskedyol o paagi han pagkinabuhi basi makagpayunir?

¹⁷ Mahimo ka ba magpayunir? Kon ha yana naabat ka nga diri pa ito posible ha imo kahimtang, buhata an ngatanan nga imo mahihimo nga magin mas duok kan Jehova pinaagi han pagbuhat han imo gimaopayi ha ministeryo. Katapos ig-ampo ngan pamurubuuton hin maopay an imo kahimtang, bangin masantop mo nga makakagpayunir ka kon maghihimo ka hin pipira nga pagbag-o ha imo eskedyol o paagi han pagkinabuhi. Kon makakagpayunir ka, an kalipay nga imo aabaton mas labaw gud kay han bisan ano nga imo isasakripisyo. Mas magigin malipayon ka tungod kay imo gin-uuna ha imo kinabuhi an Ginhadian. (Mat. 6:33) Maieksperyensyahan mo an mas daku nga kalipay nga resulta han pagbulig ha iba. Sugad man, magkakaada ka dugang nga mga higayon nga maghunahuna ngan mag-istorya mahitungod kan Jehova, ngan tungod hini maghihilarom an imo gugma ha iya ngan mapapalipay mo hiya.