1, 2. 1) ¿Baʼax ku yúuchul wa k-tuukul tiʼ juntúul máax k-yaabiltmaj yéetel k-tʼaan tu yoʼolal? (Ilawil le foto yaan tu káajbal le xookaʼ.) 2) ¿Baʼax kʼáatchiʼiloʼob ken k-xakʼalte?

WA K-TUUKUL tiʼ juntúul máax k-yaabiltmaj yéetel k-tʼaan tu yoʼolaleʼ ku maas muʼukʼaʼantal le bix k-bisikba tu yéeteloʼ. Bey u yúuchul xan yéetel le bix k-bisikba yéetel Jéeobaoʼ. Le táan kaʼach u kanáantik David u yalakʼ tamanoʼob de áakʼaboʼ yaʼab u téenel tu paktaj le kaʼanoʼ yéetel joʼopʼ u tuukul tiʼ le Máax beetmil tuláakal baʼaloʼ. Letiʼeʼ tu yaʼalaj: «Le ken in líiʼs in wich utiaʼal in paktik le kaʼan ta beetoʼ, bey xan le [luna] yéetel le eekʼoʼob ta tsʼáaj teʼeloʼ, kin kʼuchul in tukult: ¿Baʼax le máak utiaʼal ka a kʼaʼajsoʼ? ¿Baʼax le wíinik utiaʼal ka a táan óoltoʼ?» (Sal. 8:3, 4). Pablo xaneʼ ka tu yilaj bix u béeykuntik Jéeoba baʼax u yaʼalmaj yoʼolal u Israel Dioseʼ, tu yaʼalaj: «¡Bukaʼaj taamil u ayikʼalil Dios, u naʼat bey xan u kʼaj óolal!» (Rom. 11:17-26, 33).

² Ken jóokʼkoʼon kʼaʼaytajeʼ k-tuukul tiʼ Jéeoba yéetel k-tʼaan tiʼ letiʼ. Le baʼaloʼobaʼ jach ku yáantkoʼon. Yaʼab precursoroʼobeʼ tsʼoʼok u yilkoʼobeʼ ikil u maas tsʼáaik u yóol u kʼaʼaytoʼob le Reinooʼ ku maas yaabiltikoʼob Dios. Wa táan a beetik a precursoril bey xan wa taak a beetkeʼ jach tukult bix jeʼel u yáantkech utiaʼal a maas muʼukʼaʼankúuntik le bix a biskaba yéetel Jéeobaoʼ. Wa táan a beetik a precursorileʼ, tukle: «¿Baʼax jeʼel u yáantken utiaʼal maʼ u xuʼulul in beetik le jatsʼuts meyajaʼ?». Wa maʼatecheʼ, tukle: «¿Baʼax kʼaʼabéet utiaʼal in beetik in precursoril?». Koʼoneʼex ilik bix le u beetik máak u precursoriloʼ ku yáantaj utiaʼal u maas muʼukʼaʼantal bix u biskuba yéetel Dios.

3. ¿Baʼax ku yúuchul ken tʼaanakoʼon tiʼ le utsiloʼob ken u taas le Reinooʼ?

³ Ken tʼaanakoʼon tiʼ le utsiloʼob ken u taas le Reinooʼ k-maas náatsʼal tiʼ Jéeoba. ¿Baʼax teksto maas suuk u meyajtech ken jóokʼkech kʼaʼaytaj? Maʼ xaaneʼ jach ku meyajtech Salmo 37:10 yéetel 11; Daniel 2:44; Juan 5:28 yéetel 29 wa Apocalipsis 21:3 yéetel 4. Cada ken k-tsikbalt tiʼ uláakʼ máakoʼob le baʼax ku yaʼalik le tekstoʼobaʼ, ku kʼaʼajaltoʼon tiʼ Dios u taal «tuláakal baʼal maʼalob yéetel utsil chúukaʼan ku siʼibiltoʼon». Le oʼolal k-maas náatsʼal tiʼ letiʼ (Sant. 1:17).

4. ¿Baʼaxten k-maas yaabiltik u yutsil Jéeoba ken k-il bix yanil u máakiloʼob le yóokʼol kaabaʼ?

⁴ Ken k-il bix yanil u maas yaʼabil le máakoʼob way yóokʼol kaabeʼ k-maas yaabiltik u jaajil. Le máakoʼob way yóokʼol kaabeʼ minaʼan baʼax áantkoʼob utiaʼal u yantaltiʼob kiʼimak óolal yéetel u yuʼubikubaʼob maʼalobil. U maas yaʼabileʼ sajak tiʼ baʼax ku taal u kʼiin yéetel jach junpuliʼ minaʼan esperanza tiʼ. Taak u yojéeltikoʼob baʼax u biilal u kuxtaloʼob, baʼaleʼ tak le máaxoʼob jach u kʼubmaj u yóoloʼob tiʼ u religionoʼoboʼ óoliʼ mix baʼal u yojloʼob tiʼ le Bibliaoʼ. Jach beyoʼob jeʼex u kajnáaliloʼob Nínive úuchjeakileʼ (xok Jonás 4:11). Ken maas táakpajkoʼon teʼ kʼaʼaytajoʼ k-maas ilik bix u kanáantkoʼon Jéeoba (Isa. 65:13). Yéetel ku kʼaʼajsiktoʼon maʼ chéen ku tsʼáaik baʼax kʼaʼabéet tiʼ máaxoʼob meyajtikiʼ, baʼaxeʼ ku tsʼáaik u páajtalil tiʼ tuláakal máak u yantal kiʼimak óolal tiʼ bey xan esperanza (Apo. 22:17).

5. ¿Baʼax ku yúuchul ken k-kaʼans u jaajil tiʼ u maasil?

⁵ Ken k-kaʼans u jaajil tiʼ u maasileʼ ku tuʼubul tak baʼaxoʼob k-muʼyajtik. Juntúul precursora ku kʼaabaʼtik Trishaeʼ tu yilaj bey u yúuchloʼ. Letiʼeʼ ku yaʼalikeʼ ka tu divorciartuba u taataʼobeʼ jach yaj tu yilil. Junpʼéel kʼiineʼ kex jach lubaʼan u yóol yéetel taak u pʼáatal tu yotocheʼ, bin u tsʼáa xook tiʼ óoxtúul mejen paalal jach yaj baʼax ku muʼyajtikoʼob ichil u yotochoʼob. Pʼaʼatoʼob tumen u taata yéetel u sukuʼunoʼobeʼ jach ku beetik u kʼasaʼanil tiʼob. Trishaeʼ ku yaʼalik: «Le baʼaxoʼob kin muʼyajtikoʼ mix baʼal tu tséel le ku muʼyajtikoʼoboʼ. Le táan k-xookoʼ chíikpaj tu mejen ichoʼob kiʼimak u yóoloʼob ka joʼopʼ u cheʼejoʼob. Le mejen paalaloʼ tin wilaj bey junpʼéel u siibal Jéeoba, maases teʼ kʼiin jeʼeloʼ».

6, 7. 1) ¿Bix u maas muʼukʼaʼantal k-fe ken kaʼans baʼax ku yaʼalik le Bibliaoʼ? 2) ¿Baʼax ku yúuchul ken k-il bix u kʼexik u kuxtal le máakoʼob ku kaanbaloʼob tiʼ le Bibliaoʼ?

⁶ Ken k-kaʼans baʼax ku yaʼalik le Biblia tiʼ u maasiloʼ ku maas muʼukʼaʼantal k-fe. Yoʼolal jujuntúul judíoʼob maʼatech u tsʼáaik ichil u kuxtaloʼob baʼax ku kaʼanskoʼobeʼ, apóstol Pabloeʼ tu yaʼalaj: «Teech ka kaʼansik uláakʼoʼobeʼ, ¿maʼ ta kaʼanskaba teech?» (Rom. 2:21). Bejlaʼeʼ le precursoroʼoboʼ maʼatech u beetkoʼob jeʼex le judíoʼob úuchjeakiloʼ. Letiʼobeʼ jach ku kaʼanskoʼob u jaajil yéetel ku kaʼanskoʼob uláakʼ máakoʼob. Baʼaleʼ utiaʼal leloʼ unaj u líiʼskubaʼob cada ken xiʼikoʼob u tsʼáaʼob xook, yaan kʼiineʼ, kʼaʼabéet u kaxtikoʼob u núukil kʼáatchiʼob ku beetaʼaltiʼob. Juntúul precursora ku kʼaabaʼtik Janeeneʼ, ku yaʼalik: «Ken páajchajak in kaʼansik u jaajil tiʼ u maasileʼ ku maas pʼáatal tin tuukul yéetel tin puksiʼikʼal. Beyoʼ in fejeʼ ku maas muʼukʼaʼantal».

⁷ Ken k-il bix u kʼexik u kuxtal le máakoʼob ku kaanbaloʼob tiʼ le Bibliaoʼ k-maas yaabiltik le naʼat yaan tiʼ Diosoʼ (Isa. 48:17, 18). Leloʼ ku yáantkoʼon utiaʼal maʼ u xuʼulul k-tsʼáaik ichil k-kuxtal baʼax ku yaʼalik le Bibliaoʼ. Adrianna, juntúul precursoraeʼ, ku yaʼalik: «Ken u beet máak chéen baʼax ku tuklik maʼalobeʼ, jach jeʼel u bin kʼaasil tiʼeʼ, baʼaleʼ ken u kʼub u yóol tiʼ u naʼat Jéeobaeʼ, séeb u yilik u yutsil». Phil xaneʼ ku yaʼalik: «Ku yilik máak bix u kʼexik Jéeoba u kuxtal máakoʼob  maʼ béeychaj u kʼexkoʼob tu juunaloʼob ka tu yóotaj u beetoʼobiʼ».

8. ¿Baʼax ku yúuchul ken múul kʼaʼaytajnakoʼon yéetel le sukuʼunoʼoboʼ?

⁸ Ken múul jóokʼkoʼon kʼaʼaytaj yéetel le sukuʼunoʼoboʼ ku líikʼil k-óol (Pro. 13:20). U maas yaʼabil le precursoroʼoboʼ yaʼab u jóokʼloʼob kʼaʼaytaj yéetel uláakʼ sukuʼunoʼob, le oʼolal ku béeytal u ‹paklan líiʼsik u yóoloʼob› (Rom. 1:12; xok Proverbios 27:17). Juntúul precursora ku kʼaabaʼtik Lisaeʼ, ku yaʼalik: «Tuʼux ku meyaj máakeʼ mantatsʼ ku yantal ketlan meyaj yéetel kʼuuxil. Mantatsʼ k-uʼuyik bix u yaʼalaʼal baʼal yéetel u yaʼalaʼal tʼaanoʼob kʼaastak. Tuláakal máak u kʼáat ka tsʼaʼabak junpʼéel maʼalob meyaj tiʼ kex jeʼel baʼaxak ka kʼaʼabéetchajak u beetkeʼ. Yaan kʼiineʼ ku pʼatkoʼonoʼob kʼaasil wa ku pʼaʼastikoʼonoʼob tumen j-Jaajkunajoʼon. Baʼaleʼ ken múul kʼaʼaytajnakoʼon yéetel le sukuʼunoʼoboʼ ku líikʼil k-óol. Kex jach kaʼanaʼanen ken suunaken tin wotocheʼ jach kiʼimak in wóol».

9. ¿Baʼax ku yúuchul ken u múul beet u precursoril le tsʼokaʼan u beeloʼoboʼ?

⁹ Ken u múul beet u precursoril le tsʼokaʼan u beeloʼoboʼ ku maas pʼáatloʼob bey le suum óox chʼoot ku yaʼalik le Bibliaoʼ (Ecl. 4:12). Madeline, ku múul beetik u precursorail yéetel u yíichameʼ, ku yaʼalik: «Teen yéetel in wíichameʼ jeʼel u máan yaʼab tiempo táan k-tsikbaltik bix biniktoʼon teʼ kʼaʼaytajoʼ wa baʼax t-kanaj ikil k-xokik le Biblia jeʼel u meyajtoʼon teʼ kʼaʼaytajoʼ. Cada jaʼab ku máan táan k-múul beetik k-precursorileʼ k-uʼuyik k-maas yaabiltikba». Trisha xaneʼ ku yaʼalik: ‹Tu kaʼatúulal k-chʼaʼtukultmaj maʼ k-pʼaxikba, le oʼolal maʼatech k-baʼateʼel tʼaan yoʼolal taakʼin. Tumen k-múul jóokʼol kʼaʼaytajeʼ k-ojel bix u bin u revisitaʼob yéetel u j-xoknáaloʼob cada juntúul, leloʼ tsʼoʼok u beetik k-maas yaabiltikba›.

10. ¿Baʼax ku yúuchul ken k-il bix u yáantkoʼon Jéeoba ikil k-tsʼáaik táanil le Reinooʼ?

 ¹⁰ Ken k-il bix u yáantkoʼon Jéeoba yéetel bix u núukik k-payalchiʼob ikil k-tsʼáaik táanil le Reinooʼ k-maas kʼubik k-óol tiʼ letiʼ. U jaajileʼ bey u yúuchul yéetel tuláakal máaxoʼob chúukaʼan u yóol u meyajtoʼob Diosoʼ. Baʼaleʼ le precursoroʼoboʼ ku yilkoʼobeʼ chéen wa ku kʼubik u yóoloʼob tiʼ Jéeobaeʼ ku béeytal u seguer u beetkoʼob le jatsʼuts meyajoʼ (xok Mateo 6:30-34). Koʼox ilik baʼax úuch tiʼ Curt, juntúul precursor ku beetik u sustituto tiʼ circuitoil, tu yaʼalaj jeʼel u bin u xíimbalt junpʼéel múuchʼulil kex kaʼapʼéel hora y media yanil tu yotoch. Letiʼ yéetel u yatan, ku beetik xan u precursoraileʼ, chéen yaan gasolina tiʼob utiaʼal u binoʼob, tsʼoʼoleʼ junpʼéel semana u bin u kʼuchul u kʼiinil u boʼotaʼal tuʼux ku meyaj. Letiʼeʼ ku yaʼalikeʼ maʼ jach u yojel wa maʼalob baʼax tu chʼaʼtuklaj u beetkiʼ. Ka tsʼoʼok u payalchiʼobeʼ tu chʼaʼtuklaj u binoʼob, tu kʼubaj u yóoloʼob yaan u tsʼaʼabal baʼax kʼaʼabéettiʼob tumen Jéeoba. Jach taʼaytak u binoʼobeʼ ka tʼaʼanoʼob tumen juntúul kiik tumen yaan baʼax taak u tsʼaʼabaltiʼob: jach le bajux ku bineltiktiʼoboʼ. Curteʼ ku yaʼalik: «Ken úuchuk tiʼ máak yaʼab u téenel le baʼaloʼob beyaʼ, ku jach ilik máak u kʼab Jéeoba».

11. ¿Baʼax utsiloʼob ku kʼamik le precursoroʼoboʼ?

¹¹ Yaʼab u téeneleʼ le precursoroʼob ku xupkubaʼob utiaʼal u meyajtikoʼob Jéeoba yéetel ku maas biskubaʼob tu yéeteloʼ ku yilkoʼob bix u kʼáaxal u kiʼikiʼtʼaanoʼob Dios tu yóokʼoloʼob (Deu. 28:2). Kex beyoʼ yaan baʼax ku aktáantkoʼob. Tuláakal máax meyajtik Jéeobaeʼ ku muʼyaj yoʼolal baʼax tu beetaj Adán. Kex yaan máaxoʼob tsʼoʼok u xulik u beetik u precursoriloʼob junpʼíit tiempoeʼ, u suukileʼ ku béeytal u aktáantkoʼob le nukuch talamiloʼoboʼ wa ku jechikoʼob. ¿Baʼax jeʼel u yáantik le precursoroʼob utiaʼal maʼ u xuʼulul u beetkoʼob le jatsʼuts meyajaʼ?

12, 13. 1) ¿Baʼax unaj u beetik le precursor ku talamtal u kʼubik le bukaʼaj horas unajoʼ? 2) ¿Baʼaxten jach unaj u jóoʼsik máak tiempo u xokik sáamsamal le Biblia, u xakʼalxook yéetel u tuukul tiʼ baʼax ku xokik?

¹² U maas yaʼabil le precursoroʼoboʼ jach yaʼab baʼax kʼaʼabéet u beetkoʼob. Jeʼel u talamtal u beetkoʼob tuláakaleʼ, le oʼolal kʼaʼabéet u yilkoʼob baʼax maas kʼaʼanaʼan (1 Cor. 14:33, 40). Wa juntúul precursor ku talamtal u kʼubik le horas unajoʼ, maʼ xaaneʼ unaj u yilik baʼax ku sen beetik yéetel u tiempo (Efe. 5:15, 16). Maʼalob ka u tukle: «¿Bukaʼaj tiempo kin náaysik in wóol? ¿Kin beetik wa baʼaloʼob maʼ jach kʼaʼanaʼaniʼ? ¿Jeʼel wa u páajtal in kʼexik bukaʼaj tiempo kin meyajeʼ?». Tuláakal máax meyajtik Dioseʼ u yojel jeʼel u jáan káajal u beetik baʼaloʼob maʼ jach kʼaʼanaʼantakeʼ. Le oʼolaleʼ le precursoroʼoboʼ unaj u yilkoʼob cada wa baʼax kʼiin baʼax táan u beetkoʼob utiaʼal u kʼexkoʼob wa kʼaʼabéet.

¹³ Le precursoroʼoboʼ unaj u jóoʼskoʼob u tiempoil u xokikoʼob sáamsamal le Bibliaoʼ, u xakʼalxookoʼob yéetel u tuukuloʼob tiʼ baʼax ku xokikoʼob. Le oʼolaleʼ unaj u yilkoʼob maʼ u beetkoʼob baʼaloʼob maʼ jach kʼaʼanaʼantak teʼ tiempo u jóoʼsmoʼob utiaʼal le baʼaloʼob kʼaʼanaʼantakoʼ (Fili. 1:10). Tuukulnakoʼon tiʼ juntúul precursor tsʼoʼok u kʼaʼaytaj bul kʼiin ku suut tu yotoch yéetel ku chʼaʼtuklik u líiʼskuba yéetel le jaatsoʼob kun máansbil teʼ muchʼtáambaloʼ. Baʼaleʼ yáaxeʼ ku xokik cartaʼob túuxtaʼantiʼ. Tsʼoʼoleʼ ku tʼabik u computadora, ku xokik u correo yéetel ku núukik. Le tiaʼan teʼ Internetoʼ ku náayal u yóol yéetel uláakʼ baʼaloʼob. Ken u tsʼáa cuentaeʼ tsʼook u máan óoliʼ dos horas, maʼ u káajs u líiʼskuba jeʼex u tukultmoʼ. ¿Baʼaxten maʼ maʼalobiʼ? Juntúul deportista u kʼáat ka máanak yaʼab jaʼaboʼob táan u ketlaneʼ, mantatsʼ unaj u jaantik baʼaloʼob maʼalobtak. Le máaxoʼob xan  maʼ u kʼáat ka xuʼuluk u beetik u precursoriloʼoboʼ unaj u jóoʼskoʼob tiempo utiaʼal u xakʼalxookoʼob (1 Tim. 4:16).

14, 15. 1) ¿Baʼaxten unaj u kiʼimaktal u yóol le precursoroʼob chéen yéetel junpʼíit baʼaloʼoboʼ? 2) ¿Baʼax unaj u beetik juntúul precursor ken yanak talamiloʼob tiʼ?

¹⁴ Le maʼalob precursoroʼoboʼ kiʼimak u yóoloʼob yéetel junpʼíit baʼal. Tak Jesuseʼ bey tu yaʼalil unaj u kuxtal máaxoʼob tsaypachtikoʼ (Mat. 6:22). Letiʼeʼ kuxlaj chéen yéetel junpʼíit baʼal utiaʼal u beetik le meyaj kʼubéentaʼantiʼoʼ, maʼ náay u yóol yéetel uláakʼ baʼaloʼobiʼ. Le oʼolal tu yaʼalaj: «Le chʼomakoʼoboʼ yaan u sajkaboʼob, yéetel le chʼíichʼoʼob ku máanoʼob teʼ kaʼanoʼ yaan u kʼuʼob, baʼaleʼ u Paal máakeʼ minaʼan tuʼux u tʼalkúuntik u pool» (Mat. 8:20). Le precursor u kʼáat u beet jeʼex Jesuseʼ maʼ unaj u tuʼubultiʼeʼ le máax yaʼab baʼax yaantiʼeʼ, yaʼab baʼax unaj u kanáantik, u yutskíintik wa u manik u jeel.

¹⁵ Letiʼobeʼ u yojeloʼob wa ku beetkoʼob le meyajaʼ maʼ u kʼáat u yaʼal wa maas maʼaloboʼob tiʼ u maasiliʼ, baʼaxeʼ chéen tumen ku yáantaʼaloʼob tumen Jéeoba. Le oʼolal le precursoroʼoboʼ unaj u kʼubik u yóoloʼob tiʼ Jéeoba utiaʼal maʼ u xuʼulul u beetkoʼob le jatsʼuts meyajaʼ (Fili. 4:13). U jaajileʼ yaʼab talamiloʼob ken u aktáantoʼob (Sal. 34:19). Baʼaleʼ ken u aktáantoʼobeʼ maʼ unaj u jáan xuʼulul u beetik u precursoriloʼobiʼ, baʼaxeʼ unaj u kaxtikoʼob u nuʼuktaj Jéeoba yéetel u chaʼik u yáantaʼaloʼob (xok Salmo 37:5). Ken u yiloʼob bix u yáantaʼaloʼob tumen u Taataʼob yaan teʼ kaʼanoʼ, yaan u yuʼubikoʼob maas náatsʼ yaniloʼob tiʼ letiʼ (Isa. 41:10).

16. ¿Baʼax unaj a beetik wa taak a beetik a precursoril?

¹⁶ Wa a kʼáat a kʼam le utsiloʼob ku kʼamik le precursoroʼoboʼ, aʼal tiʼ Jéeoba (1 Juan 5:14, 15). Tsikbalnen yéetel jujuntúul precursoroʼob. Ilawil a beetik baʼaloʼob jeʼel u yáantkech a beet a precursorileʼ. Bey tu beetil Keith yéetel Erika. Jeʼex yaʼab máaxoʼob u yéet jaʼabiloʼobeʼ, tu kʼububaʼob kaʼach sen meyaj, tu manoʼob u yotochoʼob yéetel junpʼéel túumben coche le maʼ úuch tsʼoʼokok u beeloʼoboʼ. Letiʼobeʼ ku yaʼalikoʼob: «T-tukleʼ ken yanaktoʼon le baʼaloʼobaʼ yaan u kiʼimaktal k-óol, baʼaleʼ maʼ bey úuchikiʼ». Ka jóoʼsaʼab Keith tuʼux ku meyajeʼ, tu beetaj u precursor auxiliaril. Letiʼeʼ ku yaʼalik: «Tu kʼaʼajsajten le kiʼimak óolal ku yuʼubik máak ken jóokʼok kʼaʼaytajoʼ». Joʼopʼ u biskubaʼob yéetel juntúul sukuʼun yéetel u yatan, precursoroʼob. Le sukuʼun yéetel u yatanoʼ tu yáantoʼob Keith yéetel Erika u yiloʼob jach ku taasik kiʼimak óolal u beetik u precursoril máak kex maʼ yaʼab baʼaloʼob yaantiʼiʼ. ¿Baʼax túun tu beetaj Keith yéetel Erika? Letiʼobeʼ tu beetoʼob junpʼéel u listail baʼax taak u beetkoʼobeʼ ka tu takʼoʼob tu refrigeradoroʼob yéetel ku tachartikoʼob cada junpʼéel ku béeykuntkoʼob. Ka máan kʼiineʼ páajchaj u beetik u precursoriloʼob.

17. ¿Baʼax utsiloʼob jeʼel u taasiktech wa ka jach ilik baʼaxoʼob jeʼel u páajtal a kʼexik ichil a kuxtal utiaʼal a beetik a precursorileʼ?

¹⁷ ¿Jeʼel wa u páajtal a beetik a precursorileʼ? Wa ka tuklik maʼ tu páajtal a beetik beoraaʼ, ilawil a beetik tuláakal le ku páajtal teʼ kʼaʼaytajoʼ. Beyoʼ yaan a maas natsʼkaba tiʼ Jéeoba. Ken tsʼoʼokok a kʼáatik u yáantaj yéetel ken tsʼoʼokok a wilik bix a kuxtaleʼ, maʼ xaaneʼ yaan a wilik wa ka kanáantik tiʼ baʼax ka xupik a tiempo yéetel ka kʼexik jujunpʼéel baʼaloʼob ichil a kuxtaleʼ jeʼel u páajtal a beetik a precursorileʼ. Wa ku béeytaleʼ maas jach yaan u kiʼimakkúuntik a wóol ke le baʼaxoʼob ka beetik kaʼachoʼ. Yaan u kiʼimaktal a wóol tumen yaan a tsʼáaik táanil le Reinooʼ (Mat. 6:33). Yaan a wuʼuyik bix u kiʼimaktal u yóol máak ken u tsʼáa baʼax yaantiʼ. Maas yaan u béeytal a tuukul tiʼ Jéeoba, a tʼaan tu yoʼolal, yaan a maas yaabiltik yéetel a kiʼimakkúuntik u yóol.