Mä munat familiarasajj jiwi ukhajja, jachaqtʼasipuntanwa, kunattejj janiw jupar uñj-jjañäniti. Jesusajj Lazaror wals munaskchïnjja, janiw jiwatap laykojj jachkänti, jan ukasti Lazaron familiapata ukat amigonakapat sinttʼasisaw jachaqtʼasïna, kunjamtï ukjjar jiskʼa tʼaqajj siski ukhama (Juan 11:36).

Lazaron usutätap yatisajja, Jesusajj janiw ukspach jupar qollañatak sarkänti. Qellqatajj akham siwa: “Kunapachatejj [Jesusar] yatiyapjjäna: ‘Lazarojj usutaw’ siri, ukkhajja pä urumpiw qheparäna kawkhankkäntejj ukkhana” sasa (Juan 11:6). ¿Kunatsa jan jankʼak sarkpachäna? Jupajj mä amtanïnwa. Jesusajj akham sänwa: “Aka usojj janiw jiwañatakïkiti, ukampis akajj Diosan jachʼa chʼamapa uñachtʼayañatakiwa, ukhamarak uka usu toqet Diosan Yoqapan jachʼa chʼamapajj uñachtʼayasiñapatakiraki” sasa (Juan 11:4). Ukhamasti, uka toqew Jesusajj Jehová Diosan “jachʼa chʼamapa” uñachtʼayañ munäna. ¿Kunjamsa? Jupajj wali muspharkañ mä milagro toqew amigopar jaktayañapäna.

Jesusajj arkirinakapamp parlkäna ukhajja, jiwañajj ikimp sasiwa sänwa. Ukatwa jupanakarojj “Lázaro amigosajj ikiskiwa, ukampis nayajj sartayanïwa” sasin säna (Juan 11:11). Jesusatakejj Lazaror jiwatat jaktayañajja, kunjamtï mä awkejj wawapar ikit sartaykejj ukar uñtasitarakïnwa. Ukatwa Lazaron jiwatapat jan llakisiñapäkänti.

Ukhamajja, ¿kunatsa Jesusajj jachaqtʼasïna? Kunjamtï sisktanjja, ukjjar siski uka arunakaw uka jisktʼar qhanañchi. Jesusajj Lazaron María kullakapar visittʼkäna ukhajja, juparu ukat yaqhanakar jachaskir uñjasajja, “llakitaw uñjasïna, chuymapsti chʼalljjtayasirakïnwa”. Ukhamajja, Jesusajj mayninakar wali llakita uñjasaw chuymap chʼalljjtayasïna, ukat ‘jachaqtʼasïna’ (Juan 11:33, 35).

Jesusajja, munat masinakasar jaktayañatakisa ukat jutïr pachan kʼumara jakasiñ churañatakis chʼamaniwa, ukwa Lazaror jaktayatapajj uñachtʼayistu. Ukat khitinakatï mä munat masipan jiwatapat jachapki ukanakatsa wal sinttʼasitapwa uñachtʼayarakistu. Ukat familiapan jiwatapat jachapki ukanakat sinttʼasiñsa yaticharakistuwa.

Jesusajj Lazaror jaktayañapjja yatïnwa. Ukampis amigonakapar wal munasitapata ukat sinttʼasitapatwa jachaqtʼasïna. Ukhamarakiw jiwasajj sinttʼasitas laykojj ‘jachapki ukanakampi jachañasa’ (Rom. 12:15). Maynin jiwatapat maynejj jachaqtʼasi ukhajja, jaktañ suytʼäwir janis iyawskaspa ukham janiw sañ munkiti. Ukhamajja, Lazaror niy jaktayañampïskchïnsa, Jesusan jachaqtʼasitapat janiw mayjtʼasiñasäkiti. Cheqansa, khitinakatï munat familiarapan jiwatapat jachapki ukanakat sinttʼasiñatakiw Jesusajj mä uñachtʼäwi jaytawayistu.