AMEPUSHO UKUFUMA KU BABELENGA

Ukulingana na Yohane 11:35, mulandu nshi Yesu aponeshe ifilamba ilyo ashilabuusha Lasaro?

▪ Umuntu uo twatemwa nga afwa, tulalila pantu tukalamufuluka. Nangu ca kuti Yesu alitemenwe Lasaro, ico alilile ifilamba te pa mulandu wa kuti Lasaro alifwile. Lelo mulandu wa kuti alyumfwilile abaleloosha inkumbu, nga filya amashiwi yaba muli Yohane yalangilila.—Yoh. 11:36.

Ilyo Yesu aumfwile ukuti Lasaro nalwala, taile ilyo line ku ng’anda ya kwa Lasaro pa kuti ayemuposha. Baibolo itila: “Ilyo [Yesu] aumfwile ukuti Lasaro nalwala, aikele inshiku na shimbi shibili uko ali.” (Yoh. 11:6) Mulandu nshi Yesu ashailile bwangu? Alishibe umwine. Atile: “Ubu bulwele te bwa kutwala ku mfwa, lelo bwa kucindikilamo Lesa, pa kuti Umwana wa kwa Lesa acindikilwemo.” (Yoh. 11:4) Ubulwele Lasaro alwele tabwali bwa ‘kumutwala’ ku mfwa. Yesu alefwaya ‘Lesa acindikilwe’ mu mfwa ya kwa Lasaro. Ali no kumucindika shani? Yesu ali no kucita icipesha mano ica kubuusha cibusa wakwe.

Ilyo Yesu alelanda na basambi bakwe pa mfwa ya kwa Lasaro, alingenye imfwa ku kulaala utulo. E mulandu wine abebele ukuti “ndeya mu kumubuusha.” (Yoh. 11:11) Yesu ali no kubuusha Lasaro kwati ni filya umufyashi engabuusha umwana wakwe uulele. Kanshi Yesu taumfwile ubulanda pa mfwa ya kwa Lasaro.

Nomba cinshi calengele ukuti Yesu alile? Baibolo yalilanda icalengele. Ilyo Yesu amwene Maria nkashi ya kwa Lasaro na bambi baleloosha, “aumfwile ubulanda nga nshi, kabili alyumfwile ububi.” Ilyo Yesu amwene ifyo bali no bulanda, na o ‘alyumfwile ubulanda nga nshi.’ E calengele ukuti ‘aponye ifilamba.’ Yesu alyumfwile ubulanda nga nshi ilyo amwene abanankwe abo atemenwe sana baleloosha.—Yoh. 11:33, 35.

Ili lyashi liletusambilisha ukuti Yesu alikwata amaka ya kubuusha abatemwikwa besu abafwa no kubapeela ubumi busuma mu calo cipya. Kabili liletusambilisha ukuti Yesu alalangulukilako abafwilwa abatemwikwa babo. Tulesambililako no kuti tufwile ukuba ne nkumbu ku baleloosha abatemwikwa babo.

Yesu alishibe ukuti alabuusha Lasaro. Na lyo line, alililile pantu alitemenwe ifibusa fyakwe kabili alibomfwilile uluse. Na ifwe nga tuleumfwila bambi uluse ‘tukalalilila pamo na balelila.’ (Rom. 12:15) Umuntu nga aleloosha tacipilibula ukuti tacetekela ukuti abafwa bakabuuka. Nangu ca kutila Yesu alishibe ukuti alabuusha Lasaro, alililile, ifi acitile fitulanga ukuti na ifwe tufwile ukumfwila abaleloosha uluse no kulilila pamo nabo.

[Icikope pe bula 32]