Kan dawtmi hna an thih tikah kan ṭahmi cu a phung a si ko. Zeicahtiah kan ngai hna lai. Jesuh nih Lazaruh kha a dawt ko nain a thih caah a ṭahmi a si lo. Johan ṭialmi a cungtang bia nih Jesuh a ṭahmi cu Lazaruh i a chungkhar le a hawile pawl kha a zaangfah hna caah a si ti a langhter.—Johan 11:36.

Jesuh nih Lazaruh a zaw ti thawng a theih tikah damter awkah a va kal colh lo. “Lazaruh a zaw ti thawng kha a thei nain a umnak hmun ah khan nihnih a cam rih” tiah Baibal ah kan hmuh. (Johan 11:6) Zeicah Jesuh cu a kal colh lo? Tinhmi a ngeih caah a si. Hitin a ti: “Hi zawtnak hi a donghnak cu thihnak a si lai lo, sihmanhsehlaw Pathian sunparnak langhternak caah a si lai i hi thawng hin Pathian Fapa zong nih sunparnak a hmuh lai.” (Johan 11:4) Lazaruh a zawtnak i “a donghnak” cu thihnak a si lai lo. Jesuh nih Lazaruh thihnak kha “Pathian sunparnak langhternak caah” hman a duh. Zeitin in dah? Jesuh nih a dawtmi a hawi kha a thawhter ṭhannak thawngin khuaruahhar thil a tuah lai.

A zultu pawl he Lazaruh thihnak kong an i ruah lioah Jesuh nih thihnak kha i hngilh he a tahchunh. Cucaah “ka va kal lai i [Lazaruh kha] ka va thawh lai” tiah a ti. (Johan 11:11) Jesuh caah Lazaruh kha thihnak in thawhter cu nulepa nih aa hngilhmi an fa an ṭhangh bantuk kha a si. Cucaah Lazaruh thihnak cu Jesuh caah ngaihchiat awk a sinak a ruang a um lo.

Cu a si ah Jesuh cu zeicah a ṭah? Johan ṭialmi a cungtang bia nih a phi a kan hngalhter. Jesuh nih Lazaruh a far Mari le midang an ṭahmi kha a hmuh hna tikah “a hnarno a ṭam i a lung a hno.” An ngaih a chiatmi nih amah zong a ngaih a chiatter ve. Cucaah “Jesuh cu a ṭap.” A dawtmi a hawile an ngaih a chiatmi a hmuh tikah a ngaih a chia ve.—Johan 11:33, 35.

Mah kong nih Jesuh cu kan dawtmi a thimi hna kha vawlei thar ah dam tein thawhter khawhnak ṭhawnnak a ngei ti a langhter. An dawtmi a thimi hna kha Jesuh nih a zaangfah hna ti zong a langhter. Mah lengah an dawtmi an thih ruangah a ngaih a chiami hna kha kan zaangfah hna awk a si ti zong a kan hngalhter.

Jesuh nih Lazaruh kha ka thawhter ṭhan lai ti a hngalh ko. Asinain a hawile kha a dawt tuk hna i a zaangfah hna caah a ṭap. Cu bantukin kannih zong ‘a ṭapmi sinah va ṭah ve’ awkah zaangfahnak nih a kan forh ve. (Rom 12:15) Cutin ngaihchiatnak langhter cu thawhṭhannak kan zumh lo a si lo. Jesuh nih Lazaruh kha a thawhter ṭhan hnik ko nain a ṭahnak thawngin Lazaruh i a chungkhar le a hawile pawl a zaangfah hna kha a langhter. Mah cu zohchunhawk tlak a si.