KANBIỌ LẸ SỌN WEHIATỌ LẸ DÈ

Naegbọn Jesu do viavi whẹpo do fọ́n Lazalọsi sọnku, dile e yin didohia to Johanu 11:35 mẹ do?

▪ Jọwamọnu wẹ e yin nado viavi to whenue mẹyiwanna mítọn de kú, na mí na jẹdò etọn wutu. Dile etlẹ yindọ Jesu yiwanna Lazalọsi, e ma yin okú etọn wẹ zọ́n bọ e viavi. Dile lẹdo kandai Johanu tọn dohia do, ewọ viavi na awuvẹmẹ he e tindo na mẹhe tin to awubla mẹ lẹ.—Joh. 11:36.

To whenue Jesu sè dọ Lazalọsi to azọ̀njẹ, ewọ ma yì to afọdopolọji nado hẹn azọ̀ngbọna ẹn. Kandai lọ dọmọ: “To whenue [Jesu] sè dọ [Lazalọsi] to azọ̀njẹ, e gbẹ́ gbọṣi fihe e te lọ na azán awe dogọ.” (Joh. 11:6) Naegbọn Jesu do dọngbàn? Lẹndai de wutu wẹ e do wàmọ. Ewọ dọmọ: “Azọ̀n ehe ma na dekọtọn do okú mẹ gba, ṣigba nado na gigo Jiwheyẹwhe wutu wẹ, na Visunnu Jiwheyẹwhe tọn nido sọgan yin gigopana gbọn ehe gblamẹ.” (Joh. 11:4) Okú ma na yin ‘kọdetọn’ kavi opodo azọ̀n he jẹ Lazalọsi te tọn gba. Jesu jlo na yí okú Lazalọsi tọn zan “nado na gigo Jiwheyẹwhe.” Gbọnna? Jesu jlo na wà azọ́njiawu huhlọnnọ de gbọn họntọn vivẹ́ etọn finfọn sọn yọdò mẹ dali.

To whenue Jesu to hodọ hẹ devi etọn lẹ gando nujijọ ehe go, e yí okú jlẹdo amlọn go. Enẹ wẹ zọ́n bọ e do dọna yé dọ emi “jei finẹ nado fọ́n [Lazalọsi] sọn amlọn mẹ.” (Joh. 11:11) Na Jesu, nado fọ́n Lazalọsi sọnku taidi lehe mẹjitọ de nọ fọ́n ovi etọn sọn amlọn mẹ do. Enẹwutu, whẹwhinwhẹ́n de ma tin dọ ewọ ni blawuna okú Lazalọsi tọn.

To whelọnu lo, naegbọn ewọ do viavi? Whladopo dogọ, lẹdo wefọ lọ tọn na gblọndo lọ. To whenue Jesu mọ nọviyọnnu Lazalọsi tọn Malia po mẹdevo lẹ po to avivi, ewọ “wẹnhun to ohò ede tọn mẹ bo biọ bẹwlu mẹ.” To whenue Jesu mọ awubla he mẹ yé tin te, ehe yinuwado e ji sọmọ bọ e “wẹnhun to ohò ede tọn mẹ.” Enẹwutu wẹ “Jesu kùn dasin.” E blawuna Jesu taun nado mọdọ họntọn yiwanna etọn lẹ to awufiẹsa mẹ.—Joh. 11:33, 35.

Kandai ehe dohia dọ Jesu tindo huhlọn po nugopipe lọ po nado hẹn mẹyiwanna mítọn he ko kú lẹ gọwá ogbẹ̀ to agbasalilo mẹ to aihọn yọyọ he ja mẹ. Ehe sọ gọalọna mí nado yọnẹn dọ Jesu nọ tindo numọtolanmẹ dopolọ na mẹhe hẹn mẹyiwanna yetọn lẹ bu to okú he mí dugu etọn sọn Adam dè mẹ. Onú devo he mí sọgan plọn sọn kandai ehe mẹ wẹ yindọ mí dona nọ tindo awuvẹmẹ na mẹhe to aluẹmẹ, na mẹyiwanna yetọn he kú lẹ wutu.

Jesu yọnẹn dọ emi na fọ́n Lazalọsi. Etomọṣo, ewọ viavi na owanyi sisosiso po awuvẹmẹ he e tindo na họntọn etọn lẹ po wutu. Mọdopolọ, awuvẹmẹ sọgan whàn mí nado nọ “viavi hẹ mẹhe to avivi lẹ.” (Lom. 12:15) Awubla mọnkọtọn ma dohia dọ mí ma tindo yise to todido fọnsọnku tọn mẹ gba. Enẹwutu, nuhe sọgbe wẹ Jesu wà nado ze apajlẹ dai na mí gando awuvẹmẹ didohia mẹhe tin to awubla mẹ lẹ go, to whenue e viavi nujọnu tọn dile etlẹ yindọ ewọ na fọ́n Lazalọsi sọnku.