Asasavut toqukkut qimaguttut soorunami maqaasissagatsigit qiasarpugut. Jiisusip Lazarusi asavaa, taamaakkaluartorli taassuma toqunera qissasissutiginagu qimagaasunik misiginneqatiginninnini qissasissutigigaa Johannesip oqaluttuaata ataqatigiinneranit erserpoq. — Joh 11:36.

Jiisusip tusaramiuk Lazarusi napparsimalersimasoq taassuma angerlarsimaffianukapallanngilaq. Biibilimi ima allassimavoq: “Lazarusi napparsimasoq tusareerlugu Jiisusi suli ullut marluk uninngavimminiiginnarallarpoq.” (Joh 11:6) Sooq Jiisusi utaqqeqqaarpa? Taama iliornissaminut pissutissaqarami. Ima oqarpoq: “Nappaataa toqussutissaanngilaq, Guutimulli naalannaatissaavoq, tamatumuunakkut Guutip ernera naalannarsisitaaqqullugu.” (Joh 11:4) Lazarusip nappaataa toqumik kinguneqarnani ‘Guutimik naalannarsisitsinermik’ kinguneqartussaavoq. Qanoq? Tupinnartuliornikkut ikinngutini ilivermit makitinneratigut.

Jiisusip pisumi tamatumani ajoqersukkani oqaloqatigigamigit toqu sininnermut assersuuppaa. Taamaattumik taakku oqarfigai ‘Lazarusi itersariartorniarlugu’. (Joh 11:11) Angajoqqaap qitornaminik sinngusaartumik itersaasarneratut ajornanngitsigisumik Jiisusip Lazarusi toqusunit makitissinnaavaa. Taamaattumik Lazarusip toqusimaneranik aliasuutiginninnissaminut pissutissaqanngilaq.

Taavami suna pissutigalugu Jiisusi qissaserpa? Allassimaffiit ataqatigiinnerini tamatuma akissutaa erserpoq. Lazarusip qatanngutaa Maria allallu qiasut Jiisusip takugamigit “kamaammerpoq [qamuuna nimaarpoq, NW] assullu ilungersuummerluni”. Jiisusip taakku aliasungaartut takugamigit ‘qamuuna nimaalerpoq’. Tamanna pissutigalugu “Jiisusi qissaserpoq”. Ikinngutini asasani taama naalliutsigisut takugamigit Jiisusi aliasungaalerpoq. — Joh 11:33, 35.

Oqaluttuamit erserpoq Jiisusi silarsuassami nutaami asasatsinnik makititsinissaminut peqqissunngortitseqqinnissaminullu pissaaneqartoq. Aamma toqu Adamimit kingornussaq pissutigalugu asasaminnik toqukkut annaasaqarsimasunik Jiisusip misiginneqatiginninneranik oqaluttuaq ersersitsivoq. Asasaminnik toqukkut annaasaqarsimanerminnik qissatiginnittunik misiginneqatiginnittarnissatsinnik oqaluttuaq aamma ilinniarfigisinnaavarput.

Jiisusip Lazarusi makitingajalerlugu nalunngilaa. Taamaakkaluartoq ikinngutiminik asanningaarnini misiginneqatiginningaarninilu pissutigalugit qissaserpoq. Taamatuttaaq misiginneqatiginninnerput ‘qiasunik qiaqatiginninnissatsinnut’ kajumississutigisariaqarparput. (Rom 12:15) Taamatut qianeq makititsisoqarumaarneranik upperinninnginnermik ersersitsinerunngilaq. Taamaattumik Jiisusip Lazarusimik makititsingajaleraluarluni qiassasernermigut qimagaasunik misiginneqatiginninnera ilinniarfigingaarsinnaavarput.