Kioso kifua o muthu tua mu zolo, tu laula masoxi avulu mu kudila, mukonda ki tua-nda dimona-nê dingi. Né muene ua kexile ni ukamba uavulu ni Lázalu, maji Jezú ka tundu masoxi mukonda dia kufuá kué. Muéne ua tundu masoxi mukonda ua kexile ni henda ia jindandu ni makamba a Lázalu, kála kilondekesa o divulu dia Nzuá.—Nzuá 11:36.

Kioso Jezú kiévu kuma Lázalu ua mu kata, muéne ka sakamene phala kuia mu ku mu tala bhu mbandu ia hama ié phala ku mu saka. O Bibidia iambe: ‘Kievu [Jezú] kuma [Lázalu] ua mu kata, ua bhangele hanji izuua iiadi bhu kididi bhua kexile.’ (Nzuá 11:6) Mukonda diahi Jezú ua lalekele o kuia? Muéne ua bhangele kiki, mukonda uejidile kima. Muene uambe: “Kukata kuku, ki kukata kua Lázalu kúfua. Kuku kukata kua kufumanesa Nzambi, mbé Mon’a Nzambi n’a tambule-ku fuma.” (Nzuá 11:4) O ku kata kua Lázalu, ki “ku kata” kua kufuá. Jezú ua “kufumanesa Nzambi” bhu kaxi ka kufuá kua Lázalu. Kiebhi? Jezú ua kexile polondo phala ku bhanga madiuanu a dikota mu ku fukununa dingi kamba diê dia kazola mu mbila.

Mu kuzuela ni maxibulu mê mu kithangana kieniókio, Jezú ua sokesa o kufuá ni kilu. Mukonda muéne ua ambela kuila, “eme ngiia-phe ku mu phaphumuna.” (Nzuá 11:11) Jezú kia phaphumuna Lázalu ku kalunga, kia difu kala tat’a kia balumuna mon’ê uia ku kilu. Mu kiki, ki ki bhingile Jezú ku laula masoxi mukonda dia kufuá kua Lázalu.

Mukonda diahi-phe Jezú ua ndondo masoxi kioso kiafú Lázalu? Lua ka mukua, o ia soneka Nzuá ia bhana o kitambuijilu kiki. Kioso Jezú kia mono Madiia phange a Lázalu ua mu dila ni athu a mukua a mu dila, muéne “ukumba ku muxima uê, malamba a mu kuata.” Jezú ua luualele kiavulu kioso kia monene o makamba a zolele kiavulu Lázalu, ala ni kikote ku muxima.—Nzuá 11:33, 35.

Kia bhitile ni Lázalu, kilondekesa kuila Jezú uala ni kutena kua ku bhana o muenhu ku jindandu jetu afú ni ku bhana sauidi ia soko ku mundu uobhe. Ki tu kuatekesa ué kuijiia kuma Jezú u divua kia iibha mu ku mona athu a fundu a jindandu mukonda dia kituxi kia Adá. O disá dia mukua, di tu longa ué kuila etu tua tokala ku kala ni henda ia athu a funda o jindandu jâ.

Jezú ua kijidile kuila ueji ku fukununa Lázalu ku muenhu. Maji né muene kiki, ua ndondo masoxi mukonda dia kamba diê ni mukonda dia makamba mê akexile mu dila. Mu ku di tula bhu kididi ki akuetu a mu bhita mu malamba, ki tu bhekesa “kudila ni iá a mu dila.” (Lom. 12:15) O ku kala ni kikote ku muxima, ki ki lombolola kuila o muthu kala ni kixikanu mba ka dielela ku difukunukinu. Jezú ua xisa phangu ia ku di konda malamba ni ió a fundu, sumbala muéne uejidile kuila ueji bheka dingi Lázalu ku muenhu.