Ka watwa moro otho, kinde mang’eny waywak nikech koro ok wabi bedo kode kendo. Kata obedo ni Yesu nohero Lazaro, pi wang’e ok ne ochuer nikech Lazaro ne otho. Pi wang’e nochuer nikech lit ma ne oneno ne joma ne ywago Lazaro kaluwore gi kaka onyis e kwan motelo e bug Johana.—Joh. 11:36.

Kane Yesu owinjo ni Lazaro tuwo, ne ok odhi mapiyo mondo ochange. Muma wacho niya: “Ka nowinjo ni otuo, pod nobet ka ma ne entie ndalo ariyo.” (Joh. 11:6) Ang’o momiyo Yesu nodeko kapok odhi neno Lazaro? Ne nitie gimomiyo nodeko kamano. Nowacho niya: “Tuoni ok en mar tho, to obet mondo Nyasaye oyud duong’, mondo Wuod Nyasaye oyud duong’ kuom wachni.” (Joh. 11:4) Yesu ne dwaro ni “Nyasaye oyud duong’” kokalo kuom tho mar Lazaro. E yo mane? Yesu ne chiegni timo hono miwuoro mar chiero osiepne mondo oa e bur.

Kane Yesu wuoyo gi jopuonjrene e wi wachni, nopimo tho kod nindo. Mano emomiyo nonyisogi ni ‘odhi mondo ochiew’ Lazaro oa e nindo. (Joh. 11:11) Kuom Yesu, chiero Lazaro ne chalo mana gi janyuol ma chiewo nyathine ma nindo. Omiyo ne onge tiende mondo owinj malit ni Lazaro otho.

Kare, ang’o momiyo pi wang’ Yesu nochuer? Weche mayudore e Johana 11 chiwo dwoko. Kane Yesu oneno Mariam nyamin Lazaro kaachiel gi jomamoko ka ywak, “mirima nomake, kendo noneno lit.” Neno kaka jogo ne ywak malit nomiyo Yesu obedo gi “mirima” kendo winjo ‘malit’ e chunye. Mano emomiyo “pi wang’ Yesu nochuer.” Neno kaka osiepe Lazaro ne winjo malit nikech tho mare, nomiyo Yesu bende owinjo malit e chunye.—Joh. 11:33, 35.

Wachni konyowa neno ni Yesu nigi teko koda nyalo mar chiero wedewa duto mosetho kendo miyogi ngima maber e piny manyien. Wachno bende nyisowa maler ni Yesu ong’eyo lit ma wajabedogo sama ng’at ma wahero otho. Gimachielo ma wapuonjore en ni onego wabed mokuyo gi jogo mokuyo nikech watgi otho.

Yesu nong’eyo ni odhi chiero Lazaro. Kata kamano, pod pi wang’e nochuer nikech nohero osiepene ahinya kendo ne okechogi. Kamano bende, lit ma wawinjo e chunywa nyalo miyo ‘waywag gi joma ywak.’ (Rumi 12:15) Bedo gi lit ma kamano ok nyis ni koro ng’ato onge gi yie motegno kuom wach chier. Donge Yesu ketonwa ranyisi maber manyiso ni onego waku gi joma watgi otho kane pi wang’e ochuer kata obedo ni nong’eyo ni odhi chiero Lazaro?