Kan enn dimoune ki nou content trouve lamor, li normal ki nou ploré parski li pou mank nou beaucoup. Mem si Jésus ti ena enn grand l’affection pou Lazare, li pa ti ploré parski Lazare ti mor. Li ti ploré parski li ti ena compassion pou bann famille ek bann camarade Lazare. C’est seki nou trouvé kan nou lire contexte sa recit-la dan l’Evangile Jean.​—Jean 11:36.

Kan premier fois Jésus ti tann dire ki Lazare ti malade, li pa ti degazé al kot Lazare pou gueri li. La Bible dire: “Kan [Jésus] ti aprann ki Lazare ti malade, lerla li ti reste deux jour dan l’endroit kot li ti été.” (Jean 11:6) Kifer Jésus pa ti al desuite? Parski li ti ena enn raison. Li ti dire: “L’objectif sa maladie-la, c’est pa lamor, mais pou donne la gloire Bondié, pou ki, grace a sa, Garson Bondié kapav gagne la gloire.” (Jean 11:4) Alors, Jésus ti ena l’intention pou servi lamor Lazare “pou donne la gloire Bondié.” Couma? Jésus ti pou faire enn mirak extraordinaire: li ti pou ressuscite so bon camarade.

Dan sa moment-la, kan Jésus ti koz avek so bann disciple, li ti compare lamor ar enn sommeil. C’est a cause sa ki li ti dire zot ki li ti “pé al laba pou leve [Lazare] dan so sommeil.” (Jean 11:11) Pou Jésus, ressuscite Lazare, li pareil couma enn parent ki pé leve so zenfant ki pé faire enn ti sommeil. Alors, Jésus pa ti ena okenn raison pou li chagrin ki Lazare inn mor.

Kifer, alors, Jésus ti ploré? Ankor enn fois, contexte sa recit-la faire nou koné. Kan Jésus ti zwenn Marie, soeur Lazare ek ti trouve li ek lezot pé ploré, li “ti pousse enn soupir en li-mem ek li ti troublé.” Kan Jésus ti trouve zot douleur, sa ti faire li tellement chagrin ki li ti “pousse enn soupir en li-mem.” C’est a cause sa ki “Jésus pa ti kapav tini, so larme ti coulé.” Sa ti faire Jésus bien chagrin pou trouve so bann bon camarade souffert sa quantité-la.​—Jean 11:33, 35.

Sa recit-la montré ki Jésus ena pouvoir ek capacité pou ressuscite bann dimoune mor ek ré-donne zot enn bon la santé dan le monde nouveau ki pré pou vini. Sa montré nou aussi ki Jésus comprend sentiment bann ki’nn perdi enn dimoune ki zot content dan lamor. Enn lot leson ki nou kapav aprann dan sa recit-la c’est ki nou bizin ena compassion pou bann ki pé souffert parski zot inn perdi enn kikenn dan lamor.

Jésus ti koné ki li ti pou ressuscite Lazare. Kan-mem, li ti ploré, parski li ti ena enn grand lamour ek enn grand compassion pou so bann camarade. Li pareil aussi pou nou, kan nou mette-nou dan place lezot, sa kapav pousse nou pou “ploré avek bann ki ploré.” (Rom. 12:15) Kan enn dimoune ploré sa pa vedir ki li pena la foi dan l’esperance resurrection. Alors, Jésus inn laisse nou enn l’exemple kan li ti montré ki li ti comprend sentiment bann dimoune ki’nn perdi enn kikenn dan lamor: li ti ploré mem si li ti koné ki li ti pou ressuscite Lazare.