Ka mate e fakahele, ko e aga mau ki a tautolu ke tagi ha ko e mena to galo e tautolu a ia. Pete ne fakaalofa hofihofi a Iesu ki a Lasalo, ne nakai tagi a ia ha kua mate a Lasalo. Ne tagi a ia he fakaalofa hofihofi ha ko e momoko ke he magafaoa, tuga ne fakakite he tala he tohi ha Ioane.​​—Ioane 11:36.

He logona fakamua e Iesu kua gagao a Lasalo, ne nakai fina atu mafiti a ia ke he kaina ha Lasalo ke fakamaulu a ia. Pehē e tala: “Kua fanogonogo a [Iesu] kua gagao a [Lasalo], ati nofo mau ai a ia ke he ua e aho ke he mena ne nofo ai.” (Ioane 11:6) Ko e ha ne mule a Iesu? Fai kakano ne taute pihia e ia. Pehē a ia: “Ko e gagao nai nakai fakahiku ke he mate, ka ko e fakahekeaga he Atua, kia fakaheke ai ke he Tama he Atua.” (Ioane 11:4) Nakai ko e “fakahiku” po ke fua he gagao e mate ha Lasalo. Ne foli a Iesu ke fakaaoga e mate ha Lasalo ma e “fakahekeaga he Atua.” Fēfē? Kua amanaki a Iesu ke fakakite e mana ofoofogia he fakaliu tu mai e kapitiga fakahele haana mai he tukuaga.

He fakatutalaaga haana mo e tau tutaki he magaaho nei, ne fakatatai e Iesu e mate ke he tuaga he mohe. Ko e mena haia ne tala age a ia ki a lautolu ne ‘fano a ia ke fafagu a Lasalo.’ (Ioane 11:11) Ki a Iesu, ko e fakaliu tu hake a Lasalo mai he mate to tuga e matua ne fafagu e tama he mohe kū. Ti nakai fai kakano ma haana ke momoko ha ko e mate ha Lasalo.

Ti ko e heigoa mogoia ne taute a Iesu ke tagi? Kua foaki foki he vala tala e tali. Magaaho ne feleveia a Iesu mo e mahakitaga ha Lasalo ko Maria ti kitia a ia mo e falu hane tagi, “ati mamahi ai hana finagalo, mo e fakaatukehe.” He kitia e momoko ha lautolu ne omoomoi e logonaaga ha Iesu ke hokotia ke he ‘mamahi e finagalo.’ Ko e kakano haia ne “tagi a Iesu.” Kua mua atu e momoko ha Iesu ke kitia e tau kapitiga fakahele haana ne lauia he mamahi lahi.​​—Ioane 11:33, 35.

Kua fakatātā he tala nei kua ha ha ia Iesu e malolō mo e lotomatala ke liuaki mai e tau fakahele ha tautolu ke he moui mo e tino malolō he lalolagi foou hane hau. Kua lagomatai foki a tautolu ke loto fakaaue ke he logonaaga mafanatia ha Iesu ma lautolu kua mamate e tau fakahele ke he mate faka-Atamu. Ko e taha fakaakoaga foki ka fakaako mai e tautolu he tala nei kua lata ia tautolu ke fakaalofa hofihofi ki a lautolu kua maanu ha ko e mate he ha lautolu a tau fakahele.

Ne iloa e Iesu to fakaliu tu mai e ia a Lasalo. Ka e tagi agaia a ia, he omoomoi he fakaalofa hokulo mo e fakaalofa hofihofi noa haana ma e tau kapitiga haana. Pihia foki, liga omoomoi he momoko ha tautolu a tautolu ke “tagi fakalataha mo lautolu kua tagi.” (Roma 12:15) He fakakite e tautolu e maanu pihia kua nakai kakano kua tote e tua he tagata ke he amaamanakiaga he liu tu mai. Latatonu ai mogoia kua fakatoka e Iesu e fakafifitakiaga he fakakite e fakaalofa hofihofi ma lautolu ne maanu he tagi mooli pete kua amanaki a ia ke fakaliu tu hake a Lasalo.