Ge motho yo re mo ratago a e hwa, ke ga tlhago gore re lle ka ge re tla mo gopola. Le ge Jesu a be a rata Latsaro, ga se a ntšha megokgo ka gobane Latsaro a hwile. Go etša ge taba yeo e dikologilego pego yeo ya Johane e bontšha, o ile a llišwa ke bohloko bja go bona manyami a ba leloko la Latsaro le bagwera ba gagwe.—Joh. 11:36.

Ge Jesu a ekwa ka lekga la pele gore Latsaro o a babja, ga se a ka a kitimela go fodiša Latsaro. Pego e re: “Ge [Jesu] a kwele gore [Latsaro] o a babja, a dula matšatši a mabedi lefelong leo a bego a le go lona.” (Joh. 11:6) Ke ka baka la’ng Jesu a ile a diega? O be a na le morero wa go dira seo. O itše: “Bolwetši bjo ga se bjo bo išago lehung, eupša ke bja gore Modimo a newe letago, e le gore Morwa wa Modimo a tagafatšwe ka bjona.” (Joh. 11:4) Bolwetši bja Latsaro e be e se bjo bo “išago lehung.” Jesu o be a ikemišeditše go diriša lehu la Latsaro “gore Modimo a newe letago.” Bjang? Jesu o be a le kgauswi le go dira mohlolo o makatšago ka go tsoša mogwera wa gagwe yo a mo ratago mabitleng.

Ge Jesu a be a boledišana le barutiwa ba gagwe ka se, o ile a swantšha lehu le boroko. Ke ka baka leo a ilego a ba botša gore ‘o be a eya moo go yo tsoša Latsaro.’ (Joh. 11:11) Go ya ka Jesu, go tsoša Latsaro bahung go be go swana le ge motswadi a tsoša ngwana wa gagwe yo a bego a no bo re šwaa. Ka gona, o be a se na lebaka la go kwa bohloko ka baka la lehu la Latsaro ka bolona.

Ka gona, ke’ng seo se dirilego gore Jesu a ntšhe megokgo? Taba yeo e dikologilego pego ye e sa dutše e re nea karabo. Ge Jesu a be a kopana le Maria kgaetšedi ya Latsaro ke moka a bona yena le ba bangwe ba lla gabohloko, o ile “a tsetsela moyeng gomme a huduega.” Ge Jesu a bona kamoo ba bego ba kwele bohloko ka gona o ile a nyama kudu go fihla bokgoleng bja gore a ‘tsetsele moyeng.’ Ke lona lebaka leo le ilego la dira gore ‘Jesu a ntšhe megokgo.’ Jesu o ile a nyamišwa kudu ke go bona bagwera ba gagwe ba rategago ba kwele bohloko bjo bogolo.—Joh. 11:33, 35.

Pego ye e bontšha gore Jesu o na le matla a go dira gore baratiwa ba rena ba boele ba phele lefaseng le lefsa le tlago e bile ba phetše gabotse. Le gona se se re bontšha kamoo Jesu a ikwago ka gona ka bao ba lahlegetšwego ke baratiwa ba bona lehung leo le bakilwego ke sebe sa Adama. Se sengwe seo re ithutago sona pegong ye ke gore re swanetše go bontšha kwelobohloko go bao ba nyamišitšwego ke lehu la baratiwa ba bona.

Jesu o be a tseba gore o tlo tsoša Latsaro. Lega go le bjalo, o ile a ntšha megokgo a šušumetšwa ke go rata bagwera ba gagwe kudu le go ba kwela bohloko. Ka mo go swanago, go kwela ga rena ba bangwe bohloko go ka dira gore re ‘lle le bao ba llago.’ (Baroma 12:15) Go nyama ka tsela yeo ga go bolele gore motho ga a na kholofelo ya tsogo. Ka gona, ke mo go swanetšego gore Jesu o re beetše mohlala wa go bontšha kwelobohloko go bao ba nyamilego ka go lla e le ka kgonthe le ge a be a tseba gore o be a tlo tsoša Latsaro.