Sano walay inad-aro tayon naandid bilay, normal labat ya onakis tayo ta nailiw tayo. Inar-aro nen Jesus si Lazaro, balet aliwan say impatey to so inakisan nen Jesus. Inmakis lapud naabagey to ra may inateyan, ya singa nanengneng ed konteksto na salaysay nen Juan.—Juan 11:36.

Nen abalitaan nen Jesus ya mansasakit si Lazaro, agto nilan tampol pian paabigen. Ibabaga na salaysay: “Sanen nadngel to a mansasakit si Lazaro, sikatoy nansiansia nin duay agew diman ed kawalaan to.” (Juan 11:6) Akin? Walay gagala nen Jesus. Imbaga to: “Sayan sakit et agmansumpal ed ipapatey, noagta diad kigloriaan na Dios, ta pian nigloria so Anak na Dios diad panamegley na satan.” (Juan 11:4) Akin et “agmansumpal ed ipapatey” so sakit nen Lazaro? Usaren nen Jesus so ipatey nen Lazaro “diad kigloriaan na Dios.” Panon? Sikatoy manggawa na makapakelaw ya milagro diad pamaoli tod pinabpabli ton kaaro.

Sanen katongtong nen Jesus iray disipulo to nipaakar ed saya, inkompara toy patey ed ugip. Kanian imbaga tod sikara ya sikatoy ‘onla diman pian bangoney Lazaro ed ugip to.’ (Juan 11:11) Parad si Jesus, say pamaolid si Lazaro et singa labat pamangon na ateng ed anak ton nanaugip. Kanian anggapoy rason ya panermenan nen Jesus so impatey nen Lazaro.

No ontan, akin et akaakis si Jesus? Singa nikuan la, walad konteksto so ebat. Sanen anengneng nen Jesus ya manak-akis si Maria ya agi nen Lazaro tan arum nin inmabet ed sikato, “naermenan si Jesus diad puso to tan agonigon.” Anengneng nen Jesus so graben paneermen da kanian pati sikato et ‘naermenan diad puso to.’ Satan so rason kanian “akalua si Jesus.” Ansakisakit so liknaan tod pannangis na saray pinabpabli ton kaaro.—Juan 11:33, 35.

Papaneknekan na sayan salaysay ya walay pakayari nen Jesus ya bilayen lamet iray inatey ya inad-aro tayo diad balon mundo ya ditan et anggapo lay sakit. Nanengneng tayo met ya mililikna si Jesus ed saray inateyan. Naaralan tayod sayan salaysay ya miambegya tayo ed saray maneermen ed impatey na inad-aro da.

Amta nen Jesus ya paolien to lanlamang si Lazaro. Balet siansia nin akalua lapud agaylan panangaro tan pangabagey tod saray kakaaro to. Ontan met so gawaen tayo, milikna tan ‘miakis tayo ed saray totoon onaakis.’ (Roma 12:15) Aglabay ya ibaga na satan ya kulang so pananisia tayod kikioli. Balibali impanengneng ya alimbawa nen Jesus ed impiambegya tod saray inateyan diad inyakis to anggano paolien to lanlamang si Lazaro.