Ora un ser keri di nos muri, ta normal cu nos ta yora pasobra nos lo sinti su falta. Pero den caso di Hesus, aunke e tabatin cariño pa Lazaro, e no a yora pasobra Lazaro a muri. Mas bien, awa a basha for di su wowo pasobra el a sinti duele di esnan cu a perde nan ser keri, manera e contexto di e relato di Juan ta mustra.—Juan 11:36.

Ora Hesus a tende cu Lazaro tabata malo, e no a bay di biaha cerca dje pa cur’e. E relato ta bisa: “Ora [Hesus] a tende cu Lazaro tabata malo, toch el a keda dos dia mas caminda e tabata.” (Juan 11:6) Dicon Hesus no a bay mesora? E tabatin un motibo. El a bisa: “E maleza aki no ta hiba finalmente na morto, ma na e gloria di Dios, pa e Yiu di Dios por ser glorifica pa medio di dje.” (Juan 11:4) Pues, Hesus su meta tabata pa uza e morto di Lazaro pa “e gloria di Dios.” Con? Hesus tabata a punto di bay haci un milager espectacular: E tabata bay lanta su amigo stima for di morto.

Ora Hesus tabata papia cu su discipelnan na e ocasion ey, el a compara morto cu soño. Ta pesey mes el a bisa nan cu e tabata ‘bay eynan pa lanta Lazaro.’ (Juan 11:11) Pa Hesus, lanta Lazaro for di morto tabata manera ora un mayor ta lanta su yiu for di soño. Pesey, Hesus no tabatin motibo pa sintie tristo pasobra Lazaro a muri.

Dicon Hesus a yora anto? Atrobe, e contexto ta duna nos e contesta. Ora cu Hesus a topa Maria, ruman muher di Lazaro, y a mira con e y e otro hendenan tabata yora, “el a suspira profundamente y a keda masha conmovi.” Si, ora Hesus a mira con tristo nan tabata, el a sinti asina tanto duele di nan cu el a cuminsa “suspira profundamente.” Ta pesey ‘awa tabata basha for di su wowo.’ Hesus a bira masha tristo mes ora el a mira con su amigonan stima tabata sufri.—Juan 11:33, 35.

E relato aki ta mustra nos cu Hesus tin poder pa duna bida y salud na nos sernan keri atrobe den e binidero mundo nobo. Ademas, e ta laga nos mira cu Hesus tin compasion cu esnan cu perde nan sernan keri pa motibo di e morto hereda for di Adam. Un otro les cu nos por siña for di e relato aki ta cu nos mester tene compasion cu esnan cu ta tristo pa motibo di morto di nan ser keri.

Hesus tabata sa cu e ta bay resucita Lazaro. Pero su amor y compasion profundo pa su amigonan a pone cu awa a basha for di su wowo. Di mes manera, nos compasion por motiva nos pa “yora cu esnan cu ta yora.” (Rom. 12:15) E echo cu un persona ta yora pasobra e ta tristo pa motibo di morto di un ser keri, no ta nifica cu e no tin fe den e speransa di resureccion. Pesey, ora Hesus a yora, aunke e tabata sa cu lo el a bay resucita Lazaro, el a pone un bon ehempel: El a mustra con nos por mustra compasion pa hende cu ta tristo pa motibo di morto di nan ser keri.