Te wan lobiwan fu wi dede, dan wi gwenti krei fu di wi o misi en. Yesus ben lobi Lasarus. Toku a no krei fu di Lasarus dede, ma fu di a ben firi sari gi den famiriman nanga mati fu Lasarus, soleki fa a tori na ini a buku Yohanes e sori.—Yoh. 11:36.

Di Yesus yere taki Lasarus siki, a no go na Lasarus oso wantewante fu meki a kon betre. A tori e taki: „Di [Yesus] yere taki Lasarus siki, a tan tu dei na a presi pe a ben de” (Yoh. 11:6). Fu san ede Yesus no go wantewante? Fu di a ben sabi san a ben o du. A taki: „A siki disi . . . o meki Gado kisi glori, èn na so a Manpikin fu Gado o kisi glori tu” (Yoh. 11:4). Sobun, Yesus ben o gebroiki a dede fu Lasarus fu „meki Gado kisi glori”. Fa so? A ben o du wan bigi wondru fu di a ben o gi en lobi mati wan opobaka.

Di Yesus taki fu a tori disi nanga den disipel fu en, a agersi dede nanga a sribi di wan sma e sribi. Dati meki a taigi den taki a ben „e go drape fu wiki” Lasarus (Yoh. 11:11). Te Yesus ben o gi Lasarus wan opobaka, dan gi en, dati ben o de leki fa wan papa noso wan mama e wiki en pikin di e sribi. Sobun, a no fu di Lasarus dede, meki Yesus sari.

We dan, san meki Yesus bigin krei? Den tekst na ini Yohanes kapitel 11 e gi wi a piki. Di Yesus si taki Lasarus sisa Maria nanga tra sma ben e krei, ’a soktu dipi èn a kon hebi gi en trutru’. Yesus si fa den ben e sari èn disi ben hati en so te taki „a soktu dipi”. Dati meki „Yesus bigin krei”. A ben hati Yesus trutru di a si taki den mati fu en ben e sari so.—Yoh. 11:33, 35.

A tori disi e sori taki na ini a nyun grontapu Yesus o man gi den lobiwan fu wi di dede wan opobaka èn taki a o meki den kon betre. A tori disi e sori tu taki Yesus e firi gi sma di lasi lobiwan na ini dede. Wan tra sani di wi kan leri fu a tori disi na taki wi musu firi tu gi sma di e sari fu di wan lobiwan fu den dede.

Yesus ben sabi taki a ben o gi Lasarus wan opobaka. Ma toku a krei fu di a ben lobi den mati fu en èn fu di a ben firi sari gi den. Na so a de tu taki te wi e firi gi sma, dan dati kan meki taki wi e „krei nanga sma di e krei” (Rom. 12:15). Te wan sma e sari na a fasi disi, dan a no wani taki dati a no e bribi na ini na opobaka. Yesus gi wi wan moi eksempre. Fu di a ben e firi gi den sma di lasi wan lobiwan na ini dede, meki a ben e krei aladi a ben sabi taki a ben o gi Lasarus wan opobaka.