MIBUZYO YABASIKUBALA

Ncinzi Jesu ncaakalilila katanamubusya Lazaro kweelana ambokupanduludwe mulugwalo lwa Johane 11:35?

▪ Ikuti muyandwa wafwa, ncilengwa buya kulila mbwaanga watusiya. Nokuba kuti Jesu wakali kumuyanda Lazaro, Jesu tanaakalila akaambo kakuti Lazaro wakalifwide. Wakalila akaambo kakufwida luzyalo banamukwasyi abalongwe kweelana ambokutondezyedwe mucibalo ca Johane.—Joh. 11:36.

Ciindi Jesu naakamvwa kuti Lazaro ulicisidwe, tanaakaunka mpoonya-mpoonya kuŋanda nkwaakali kukkala Lazaro kuti akamusilike. Cibalo citwaambila kuti: ‘Jesu naakamvwa kuti Lazaro wakali kuciswa, wakakkala mazuba ambi obilo kubusena ooko nkwaakabede.’ (Joh. 11:6) Nkaambo nzi Jesu ncaakamuka? Wakalijisi makanze ncaakali kucitila boobo. Wakaamba kuti: “Bulwazi oobu tabuli bwalufwu pe, pele mbwabulemu bwa Leza ikutegwa Mwana wa Leza alemekwe kwiinda muli mbubo.” (Joh. 11:4) Kuciswa kwa Lazaro tiikwakali kwalufwu pe. Jesu wakali kuyanda kuti ‘alemeke Leza’ kwiinda mulufwu lwa Lazaro. Munzila nzi? Jesu wakali kuyanda kucita maleele agambya kwiinda mukubusya mulongwe wakwe uuyandwa kuzwa mucuumbwe.

Mumubandi wakwe abasikwiiya bakwe ciindi cimwi, Jesu wakakozyanisya lufwu kuciimo camuntu woona. Nkakaambo kaako wakabaambila kuti: ‘Ndilaunka kuyoomubusya Lazaro.’ (Joh. 11:11) Kuli Jesu, kubusya Lazaro kuzwa kulufwu cakali buyo mbuli muzyali mbwabusya mwanaakwe woona. Aboobo, kwakanyina kaambo ikakali kukonzya kumupa kulimvwa kuusa kujatikizya lufwu kulugama.

Aboobo, ncinzi cakapa Jesu kulila? Cibalo cilakonzya kutugwasya alimwi kujana bwiinguzi. Ciindi Jesu naakaswaanganya mucizyi wa Lazaro, Mariya, abamwi kabalila, “wakanyongana kapati mumoyo alimwi wakapenga.” Kuusa kwabo kwakapa kuti Jesu cimucise kusikila mane ‘wakanyongana kapati mumoyo.’ Nkakaambo kako “Jesu yakamweenda misozi.”Cakamucisa kapati Jesu kubona balongwe bakwe kabali mubuumba.—Joh. 11:33, 35.

Cibalo eeci citondezya kuti Jesu ulijisi nguzu zyakubusya bayandwa besu akuba aabuumi buli kabotu munyika mpya iiboola. Alimwi cilatugwasya kubona kuti Jesu ulabafwida luse aabo ibakasweekelwa bayandwa babo mulufwu. Ciiyo acimbi ncotwiiya kuzwa mucibalo eeci ncakuti tweelede kubafwida luzyalo aabo ibakafwidwa bayandwa babo.

Jesu wakalizyi kuti wakali kuyakumubusya Lazaro. Nokuba boobo, wakalila, akaambo kaluyando lupati alimwi aluzyalo ndwaakajisi kubalongwe bakwe. Mbubwenya buyo, luzyalo ndotujisi lulakonzya kupa kuti ‘tulile abaabo balila.’ (Lom. 12:15) Kulimvwa boobo tacaambi kuti muntu ooyo tajisi lusyomo mubulangizi bwabubuke. Eelo kaka cileelela kuti Jesu wakapa cikozyanyo cakufwida luzyalo aabo ibali mubuumba kwiinda mukutalicengeezya kulila nokuba kuti wakali kuyanda kumubusya Lazaro!

[Cifwanikiso icili apeeji 32]