Loko hi feriwa hi munhu loyi hi n’wi rhandzaka, hi ntolovelo ha rila hikuva hi ta n’wi kumbuka. Hambileswi Yesu a a rhandza Lazaro, a nga humesanga mihloti hileswi Lazaro a file. U rile hikwalaho ko va twela vusiwana vandyangu ni vanghana va Lazaro hileswi a va feriwile, hilaha mongo lowu nga eka rungula ra Yohane wu swi kombiseke hakona.—Yoh. 11:36.

Loko Yesu a twe leswaku Lazaro wa vabya, a nga nambanga a tsutsumela ekaya ka va Lazaro leswaku a ya n’wi hanyisa. Rungula ra kona ri ri: ‘Loko Yesu a twe leswaku Lazaro wa vabya, kunene a tshama masiku mambirhi endhawini leyi a a ri eka yona.’ (Yoh. 11:6) Ha yini Yesu a hlwerile? U endle tano hi xikongomelo xo karhi. U te: “Xikongomelo xa vuvabyi [lebyi] a hi rifu kambe i ku vangamisa Xikwembu, leswaku N’wana wa Xikwembu a vangamisiwa ha swona.” (Yoh. 11:4) Rifu a ku nga ri “xikongomelo” kumbe makumu ya vuvabyi bya Lazaro. Yesu a a lava ku tirhisa rifu ra Lazaro leswaku a “vangamisa Xikwembu.” Njhani? Yesu a a lava ku endla singita ro hlamarisa hi ku va a pfuxa munghana wakwe loyi a a n’wi rhandza swinene esirheni.

Loko Yesu a vulavula ni vadyondzisiwa vakwe eka xiendlakalo lexi, u fanise rifu ni ku etlela. Hi yona mhaka a va byeleke leswaku ‘u ya eku pfuxeni ka Lazaro evurhongweni.’ (Yoh. 11:11) Eka Yesu, ku pfuxa Lazaro eku feni a swi ta fana ni loko mutswari a pfuxa n’wana wakwe evurhongweni. Hikwalaho a xi nga ri kona xivangelo xo va a twa ku vava hi rifu ra Lazaro.

Kutani, i yini lexi endleke leswaku Yesu a humesa mihloti? Nakambe rungula rero ri nyikela nhlamulo. Loko Yesu a hlangana na Mariya sesi wa Lazaro naswona a n’wi vona a rila swin’we ni vanhu van’wana, hiloko “a konya emoyeni, a karhateka.” Loko Yesu a vona ndlela leyi a va twa ku vava ha yona, u twe ku vava swinene lerova a kala a “konya emoyeni.” Hi swona leswi endleke leswaku “Yesu a humesa mihloti.” Yesu u twe ku vava swinene loko a vona vanghana vakwe lava a va rhandzaka va ri ni gome hikwalaho ko feriwa.—Yoh. 11:33, 35.

Rungula leri ri kombisa leswaku Yesu u ni matimba ni vuswikoti byo pfuxa varhandziwa va hina eku feni ni ku va endla va va lava hanyeke kahle emisaveni leyintshwa leyi taka. Ri tlhela ri hi kombisa leswaku Yesu wa va twela vanhu lava feriweke hi varhandziwa va vona hikwalaho ka rifu leri vangiweke hi Adamu. Xin’wana lexi hi nga xi dyondzaka eka rungula leri, hi leswaku hi fanele hi va twela vusiwana vanhu lava nga ni gome hikwalaho ko feriwa hi varhandziwa va vona.

Yesu a a swi tiva leswaku a a ta pfuxa Lazaro. Kambe, u humese mihloti hi leswi a a va rhandza swinene ni ku va twela vusiwana vanghana vakwe. Hilaha ku fanaka, ntwela-vusiwana wu nga ha hi susumetela ku “rila ni vanhu lava rilaka.” (Rhom. 12:15) Loko munhu a rila a swi vuli swona leswaku a nga na ntshembo wa leswaku vafi va ta pfuxiwa. Kutani, swa fanela hakunene leswi Yesu a vekeke xikombiso xo twela vanhu lava feriweke vusiwana hi ku va a ririle hambileswi a swi tiva leswaku a a ta pfuxa Lazaro.