Eci ekamba lietu li fa, tu sumua, momo tu kuata ongeva laye. Ndaño okuti Yesu wa kuatela ocikembe Lasaru, pole, kalilile omo liolofa viaye. Pole, wa lila omo lioku mola epata lia Lasaru kumue lakamba va kala oku lila, ndomo ci sangiwa vulandu welivulu lia Yoano.—Yoa. 11:36.

Eci Yesu a yeva okuti Lasaru wa kala oku vela, ka endele lonjanga konjo yaye oco o sakule. Ulandu waco u popia hati: “Eci a yeva okuti Lasaru o vela, wa amisapo vali oloneke vivali.” (Yoa. 11:6) Momo lie Yesu a ciluila? Eye wa kuata esunga lieci a ci lingila. Kuenje wa popia hati: “Okuvela oku hakuokufako puãi kulamba wa Suku okuti Mõla a Suku o muilako ulamba.” (Yoa. 11:4) Olofa via Lasaru, havioko via kala esulilo lioku vela kuaye. Yesu wa tukula olofa via Lasaru oco ‘a sivaye Suku.’ Ndamupi? Yesu wa linga ocikomo cimue oco a pindule ekamba liaye.

Eci Yesu a kala oku sapela lolondonge viaye, wa sokisa oku fa lotulo. Eli olio esunga lieci Yesu a sapuilila kolondonge viaye hati, ‘wenda oku ka pasula Lasaru kotulo.’ (Yoa. 11:11) Yesu oku pindula Lasaru, ci sokisiwa lonjali yimue yi pasula omõlaye kotulo. Eli olio esunga lieci Yesu ka lekisilile esakalalo, eci a yeva okuti Lasaru wa fa.

Nye ca vetiya Yesu oku lila? Ulandu waco weca etambululo kepulilo eli. Eci Yesu a lisanga la Maria manji ya Lasaru, kuenda omanu vakuavo va kala oku lila, ‘wa va kuatela ocikembe, kuenje, wa sumua.’ Pole, eci Yesu a limbuka okuti omanu va kala oku lila, co sumuisa calua. Eli olio esunga lieci ‘a lilila.’—Yoa. 11:33, 35.

Ulandu owu u lekisa okuti Yesu o kuete unene kuenda uloño woku pindula vakuepata lietu, oco va kuate uhayele voluali luokaliye. Ovina viaco vi tu kuatisa oku limbuka okuti, Yesu o sumuavo eci a mola akamba vaye va fa omo liekandu va piñala ku Adama. Ulandu waco u tu longisa okuti, tu sukilavo oku kuatela ocikembe lohenda omanu vana va kuete vangandiavo va fa.

Yesu wa kũlĩhĩle okuti, o ka pindula Lasaru. Pole, wa lila omo liocisola kuenda ocikembe a kuatela akamba vaye. Omo liaco, ocikembe ci tu vetiyavo oku ‘lila lava va lila.’ (Va Rom. 12:15) Nda omunu o sumua omo lia umue wa fa, ka ci lekisa okuti ka kuete ekolelo kelavoko liepinduko. Omo liaco, Yesu wa tu sila ongangu yiwa yoku lekisa ocikembe eci a lila, ndaño okuti wa kuata unene woku pindula Lasaru..