Ora gatiʼ ti binni ni nadxiinu, rúʼnanu purtiʼ ribánanu laabe. Nánnanu nabé gunnaxhii Jesús Lázaro, peru qué ñuunadibe pur guti, sínuque biinabe pur biabe ca binnilidxi ne ca xhamigu, casi na xcaadxi versículo ra zeeda relatu riʼ (Juan 11:36).

Ora gunna Jesús huará Lázaro, qué ñedibe ralidxi nagueendaca para nusiándabe laa. Relatu ca na: «Ora gunna [Jesús] huará Lázaro, biaana be xhupa gubidxa ra nuu be que» (Juan 11:6). Xiñee qué ñebe nagueendaca yaʼ. Nuu xi pur bíʼnibe ni. Sicaríʼ guníʼ Jesús: «Enda huará ni napa be ca la? cadi para guuti, sínuque para ihuinni enda nandxóʼ sti Dios ne sti Xiiñiʼ» (Juan 11:4). Nga runi, bidii Jesús lugar gatiʼ Lázaro «para ihuinni enda nandxóʼ sti Dios» ra gúnibe ti milagru para guindísabe xhamígube de lade gueʼtuʼ.

Dxi bizaaca nga gudxi Jesús ca discípulo stiʼ zeeda gaca guendaguti casi ora nisiaasiʼ tuuxa. Ngue runi gúdxibe laacaʼ: «Nisiaasi Lázaro xhamigu nu peru ma chaaʼ, chi ucuaane laa» (Juan 11:11). Milagru ni biʼniʼ Jesús ora gundisaʼ Lázaro que zeeda gaca ni casi runi binni ora rucuaaniʼ xiiñiʼ. Ngue runi, qué ñuube triste pur guti Lázaro.

Yanna, xiñee biinaʼ Jesús yaʼ. Ca diidxaʼ ni cá ra zeeda relatu riʼ cacabi ni gunabadiidxanu ca. Dxi yeganna Jesús María, bizaʼnaʼ Lázaro, biiyaʼ cayuunabe ne zaqueca xcaadxi binni nuu raqué, ngue runi «uyuu yuuba ladxidóʼ [Jesús] dede uca diti». Ora biʼyaʼ Jesús pabiáʼ naná yuubaʼ ni cayuni sentir ca xhamigu, laaca gucaná dede guyuu yuubaʼ ladxidóʼ. Ngue runi «biina Jesús óraque» (Juan 11:33, 35).

Relatu riʼ rusihuínnini napa Jesús poder para guindisaʼ ca binni ni nadxiinu de lade gueʼtuʼ ne zanda gusiándabe laacaʼ lu guidxilayú cubi stiʼ Dios. Laaca rusihuínnini riá Jesús ca binni ni guti binnilidxi. Laaca rusiidiʼ relatu riʼ laanu naquiiñeʼ guianu cani cayuubaʼ ladxidóʼ pur guti binnilídxicaʼ o xhamígucaʼ.

Jesús nanna zandisaʼ Lázaro de lade gueʼtuʼ. Neca zaqué, biinabe purtiʼ nabé nadxiibe ca xhamígube ne riabe laacaʼ. Zacaca nga naquiiñeʼ gúninu, pa guni sentirnu ni cayuni sentir sti binni la? zúninu ni na ca diidxaʼ riʼ: «Laguuna né cani cayuunaʼ» (Rom. 12:15). Ora gusihuinni ti binni cayuubaʼ ladxidóʼ la? qué riníʼ diʼ nga qué runi crebe ziuu dxi ziasa ca gueʼtuʼ ca. Nga runi, biáʼsipeʼ nga ejemplu bisaanané Jesús laanu ora biʼnaʼ neca nanna zandisaʼ Lázaro de lade gueʼtuʼ, purtiʼ zaqué bisiidibe laanu guianu cani gatiʼ binnilídxicaʼ o xhamígucaʼ.