ICIPANDE ICIKALAMBA: BUKOMBE NSHI UBWABA MU BAIBOLO?

Mulandu Nshi Mulingile Ukubelengela Baibolo?

Abantu abengi mwi sonde lyonse balitemwa sana Baibolo. Mulandu nshi? Pantu abengi balisumina ukuti ifyabamo fya cine. Baibolo ilanda pa fintu ifya cine ifyacitikiile abantu ne fyo baleumfwana na bantu banabo e lyo na Lesa. Abantu abengi abakwata inkulilo shalekanalekana ababelenga ifyaba mu Baibolo, balasambililamo ifingi pantu Baibolo yalembwa mu mashiwi aya-anguka kabili ayashakolobana, ne ci calilenga ukuti ipilibulwe mu ndimi ishingi isho abantu abengi balanda. Kabili ifyaba mu Baibolo filafwa abantu.

Ne cacindamisha ca kuti, Baibolo tailanda fye pali Lesa lelo ilalanda no kuti yafuma kuli Lesa. Ilatweba ishina lya kwa Lesa, imibele yakwe e lyo ne co apangiile icalo na bantunse. Baibolo na kabili ilalanda pa fyo Satana alengele ifintu ukubipa e lyo ne fyo Yehova akawamya ifintu ku ntanshi. Kanshi uulebelenga Baibolo, afwile ukuba no mutima wa kufwaya ukusambililia. Nga acita ifi, akaba ne citetekelo e lyo ne subilo.

Ni mu Baibolo fye e mo twingasanga ifyebo ifyo ifitabo fimbi fishalandapo. Ku ca kumwenako, Baibolo ilatweba icine pa malyashi pamo nga:

▪ Ifyo twaishilebako e lyo no mulandu tuculila

▪ Ifyo Lesa acita pa kulubula abantunse

▪ Ifyo Yesu atucitila

▪ Ifyo Lesa akawamya icalo ne fyo akacitila abantunse

Tulemukoselesha ukubelenga ifipande fikonkelepo pa kuti mumone ifyo Baibolo ilandapo.

[Akabokoshi pe bula 3]

IFYO MUFWILE UKWISHIBA PALI BAIBOLO

Umutwe: Ifyo Ubufumu bwa kwa Lesa bukalenga pa calo ukuti pakabe ubulungami no mutende

Ifyabamo: Amabuuku 39 mu ciHebere (e lyo ne fiputulwa ifinono mu ciAramaiki) na yambi 27 mu ciGriki

Ukulembwa: Abalembele bantu 40 pa myaka nalimo ukucila pali 1,600, ukutendeka mu 1513 B.C.E. ukufika nalimo mu 98 C.E.

Indimi: Pali ino inshita, yalipilibulwa yonse nelyo ukupilibulwa fye mu mu Malembo ya ciGriki mu ndimi ukucila pali 2,500