Bíbülia tuguya líburu to subudiwatimaboun lidan sun ubóu. Ka uagu? Furumiñe, ladüga sun katei burí le uágubei tayanuha susereti giñe woun, abahüdaguati hawagu gürigia ha inarünitiña luma luagu hóuserun luma Bungiu luma hama amu gürigia. Arufudahati abahüdaguni burí ligía saragu katei súdiniti woun. Abürühóuati lau dimurei sensiyuti ani furanguti le gayarati lásügürawagüdün lidoun saragu amu iñeñein, ani adügati le lun gayara lan gunfuranda hamanu gürigia ha lídangiñetiña furumiñeguarügü fulasu hama ha awinwandutiña lidan furumiñeguarügü dan. Ani huuti giñe lúrudu burí le tídanbei súnwandan.

Le súdinitimabei, ariñagatu Bíbülia mama tan ábanrügü líburu to ayanuhaboun luagu Bungiu, aban tan líburu lúmagiñetu Bungiu. Subudigüda tumuti liri, ligaburi luma isuuni masansiraditi le unbei ladügei Ubóu hama gürigia. Ayanuhatu giñe luagu limigifen ageindaguni le adügǘbei, buiti kóntüra wuribati: aban lubuidun abahüdaguni le agumuchubei lidan ugundani. Waliihanu Bíbülia lau aban lubuidun igaburi líderagubadiwa lun wibihin afiñeni luma emenigini.

Tidan líburu to anihein ariñahani le siñati wadariruni lidan amu fulasu. Kei hénpulu, ariñaga tumuti inarüni woun luagu tema burí le:

• Halíagiñe wayabin ani ka uagu wasufurira?

• Le meha ladügübei Bungiu lun lesefuruniña gürigia

• Le meha ladügübei Hesusu wawagu

• Le lunbei lasuseredun lun Ubóu luma houn gürigia ámuñegü

Akutiha huméi arütíkulu burí le lun harihini ka burí lan katei uágubei tayanuha Bíbülia.