Ti Biblia ti kalatakan a libro iti intero a lubong. Apay? Gapu ta nalaka a tarusan. Naglaon dayta iti pakasaritaan ti biag dagiti pudno a tattao ken ti pannakilangenda iti maysa ken maysa ken iti Dios. Addaan dayta iti praktikal a balakad a naisurat kadagiti nalawag ken prangka a sasao. Naipatarus met iti adu a lengguahe a maawatan dagiti tattao a nagbiag iti aniaman a lugar ken panawen. Kanayon a makatulong dagiti prinsipio a linaonna.

Kangrunaanna, ti Biblia ket saan laeng a libro maipapan iti Dios no di ket naggapu iti Dios. Ipakaammona ti nagan ti Dios, galad, ken ti di agbalbaliw a panggepna no apay a pinarsuana ti daga ken dagiti tattao. Ipakaammo met ti Biblia ti maipapan iti nabayagen a dangadang ti naimbag ken dakes: nakaskasdaaw nga unibersal a salaysay a naragsak ti pagtungpalanna. No patientayo ti ibaga ti Biblia, maaddaantayo iti pammati ken namnama.

Ti Biblia laeng ti mangibaga kadatayo iti kinapudno maipapan kadagiti topiko a kas iti:

• Nagtaudantayo ken apay nga agsagabatayo

• Inaramid ti Dios tapno masubbot ti tao

• Inaramid ni Jesus para kadatayo

• Masakbayan ti daga ken dagiti tattao

Basaem dagiti sumaganad a panid ken ammuem no ania ti mensahe ti Biblia.