Biblia kele mukanda yina bantu mingi kele ti yo kuluta mikanda yonso ya nkaka. Sambu na nki? Sambu yo ke vandaka mpasi ve na kuzaba yo. Yo kele ti masolo ya kieleka ya bantu yina vandaka kibeni na luzingu mpi yo ke tubilaka bangwisana yina bo vandaka ti yo na Nzambi mpi ti bantu ya nkaka. Masolo yina ke vandaka ti malongi ya mfunu na bangogo ya pete yina bo lenda balula na bandinga mingi kukonda mpasi, mpi yina bantu ya bisika yonso mpi ya bansungi yonso lenda bakisa. Diaka, minsiku ya Biblia ke vandaka ntangu yonso ya mfunu.

Diambu ya kuluta mfunu, Biblia kele kaka ve mukanda yina ke tubilaka mambu ya Nzambi kansi mpi mukanda yina me katuka na Nzambi. Yo ke monisa zina ya Nzambi, bikalulu na yandi mpi lukanu na yandi ya luyantiku ntangu yandi gangaka ntoto mpi bantu. Biblia ke monisa mpi mutindu tuka ntama, mambu ya mbote ti ya mbi ke wakanaka ve: disolo mosi ya kitoko ya ke tadila nsi-ntoto ya mvimba mpi mutindu yo ta suka na mutindu mosi ya kiese kibeni. Yo yina, kutanga Biblia ti mabanza ya mbote ke sadisaka muntu na kuvanda ti lukwikilu mpi kivuvu.

Biblia kele ti mambu yina beto lenda mona ve na mikanda ya nkaka. Mu mbandu, Biblia ke zabisa beto kieleka na mambu yai:

• Kisika beto me katukaka mpi kikuma yina beto ke niokwamaka

• Ngidika yina Nzambi me bakaka sambu na kusumba diaka bantu

• Mambu yina Yezu me salaka sambu na beto

• Mutindu ntoto mpi luzingu ya bantu ta vanda na makwisa

Sambu na nki ve kutadila mwa fioti balutiti yina me landa mpi kuzaba nsangu yina kele na Biblia?