TOHO YA TABA: KI LITABA MAÑI ZE FUMANEHA MWA BIBELE?

Ki Kabakalañi Bibele ha I Swanela ku mi Tabisa?

Bibele ki yona buka ye fumaneha kwa batu ba bañata hahulu mwa lifasi. Ki kabakalañi? Le liñwi la mabaka ki la kuli i bunolo ku i utwisisa. I na ni litaba za niti ze ne ezahezi luli mwa bupilo bwa batu ili ze bonisa mo batu bao ne ba swalisanela mwahalaa bona ni mo ne ba swalisanela ni Mulimu. Litaba zeo li luta lituto za butokwa ka ku itusisa manzwi a bunolo ku a utwisisa ili a kona ku tolokiwa mwa lipuo ze ñata-ñata ni ku utwisiswa ki batu ba ba pila mwa sibaka sifi kamba sifi ka nako ifi kamba ifi. Mi likuka ze mwa Bibele za tusanga kamita.

Sisupo sa butokwa ni ku fita ki sa kuli, Bibele ha i bonisi feela kuli ki buka ye bulela za Mulimu kono hape i bonisa kuli ki buka ye zwa ku Mulimu. Bibele i patulula libizo la Mulimu, tulemeno twa hae, ni mulelo wa hae o sa cinci wa naa bupezi lifasi ni batu. Hape Bibele i talusa za twaniso ye se bile teñi ka nako ye telele mwahalaa Mulimu ni libupiwa ze mu lwanisa: yona taba ye sweli ku ezahala mwa pupo kaufela ili ye ka fela ka nzila ye tabisa. Kamukwaocwalo, ku bala Bibele lu sa lumelezi mibonelo ya ba bañwi ku lu tahiseza ku kakanya litaba ze ku yona ku ka lu tusa ku ba ni tumelo ni sepo.

Mwa Bibele, lu fumana litaba ze lu sa koni ku fumana ko kuñwi. Ka mutala, Bibele i lu bulelela niti ka za litaba ze cwale ka ze:

▪ Mo lu simuluhezi ni libaka ha lu nyanda

▪ Za ezize Mulimu kuli a liulule batu

▪ Za lu ezelize Jesu

▪ Ze ka ezahala kwa lifasi ni batu kwapili

Mu ka eza hande ku nyakisisa litaba ze fa makepe a latelela kuli mu zibe litaba ze fumaneha mwa Bibele.

[Caption on page 3]

LITABA KA BUKUSWANI KA ZA BIBELE

Taba ye Tuna ye Taluswa: Ka mo Mubuso wa Mulimu wa kwa lihalimu u ka kutiseza kozo ni ku luka fa lifasi

Libuka ze ku Yona: I na ni libuka ze 39 za Siheberu (mi likalulo ze ñwi ku zona ki za Siarami) kona ku beya ze 27 za Sigerike

Ku Ñolwa Kwa Yona: Ne i ñozwi ki bañoli ba ba bato ba 40 mwa lilimo ze bato eza 1,600, ku kala ka 1513 B.C.E. ku isa ibato ba ka 98 C.E.

Lipuo: Ka nako ya cwale, Bibele mutumbi kamba likalulo za yona, li tolokiwa mwa lipuo ze fitelela 2,500