Bible mmukanda udi kudi bantu ba bungi pa buloba bujima kupita mikanda mikuabu. Bua tshinyi? Bualu mbipepele bua muntu kupetamu bualu budi bumutangila. Bible udi wakula bua miyuki milelela ya nsombelu wa bantu ne bua malanda avuabu nawu munkatshi muabu ne avuabu nawu ne Nzambi. Miyuki eyi idi ne malongesha mimpe adi ne miaku mipepele idibu mua kukudimuna mu miakulu ya bungi ne kumvua kudi bantu ba miaba yonso anyi ba bikondo bionso. Misangu yonso mêyi a mu Bible adi anu ambuluisha.

Bualu bukuabu bua mushinga mbua ne: Bible ki mmukanda udi wakula anu bua Nzambi, kadi mmukanda udi kabidi mufume kudi Nzambi. Udi utuleja Dîna dia Nzambi, bumuntu buende ne disua diende didi kadiyi dishintuluka pa bidi bitangila difuka dia buloba ne bantu. Bible udi wakula kabidi bua mvita idi pankatshi pa malu mimpe ne malu mabi ivua mituadije ku kale ne mutshidiyiku too ne lelu eu pa buloba bujima, ne muikalayi mua kujika ne tshikondo tshia disanka. Kubala Bible ne lungenyi lua kumumvua kudi kutupetesha ditabuja dilelela ne ditekemena.

Mu Bible mudi malu atudi katuyi mua kupeta muaba mukuabu to. Tshilejilu, Bible udi utuambila bulelela pa bidi bitangila malu adi alonda aa:

• Kutudi bafumine ne bua tshinyi tudi tukenga

• Tshivua Nzambi muenze bua kupikula bantu

• Tshidi Yezu muenze bua bualu buetu

• Muikala buloba ne bantu mu matuku atshilualua

Bua tshinyi kuenaku mua kubala biena-bualu bidi bilonda ebi bua kumanya mukenji udi mu Bible?