Kuom buge duto, Muma e buk mong’ere moloyo e piny ngima. Nikech ang’o? Nikech en buk mawuoyo kuom gik ma timore e ngima dhano. Oting’o sigendni mag ji kendo onyisowa kaka jogo ne odak gi jowetegi kod winjruok ma ne gin-go gi Nyasaye. Sigendnigi oting’o puonj ma konyo kendo moler e yo mayot. Nikech mano, inyalo lokgi e dhok mang’eny ma kata ka ng’ato odak kanye kata odak e kinde mage, onyalo winjo tiendgi. Kendo puonj mag Muma tiyo kinde duto.

To moloyo duto, weche mayudore e Muma ok nyis mana ni en buk mawuoyo e wi Nyasaye, to bende nyiso ni en buk mowuok kuom Nyasaye. Muma nyisowa nying Nyasaye, kite, koda dwache mar chweyo piny koda dhano mondo osik nyaka chieng’. Muma bende nyiso kaka ber oseyware gi rach kuom kinde malach kendo kaka ywaruokno mulo chwech mariek mag Nyasaye, to gikone ywaruokno biro rumo e yo makelo mor ne dhano. Omiyo, somo Muma gi chuny moyangore biro miyo wabed gi yie kod geno.

Muma wuoyo e wi weche moko maok wanyal yudo kamoro amora. Kuom ranyisi, Muma nyisowa adiera e wi weche kaka:

• Ng’ama ne ochweyowa koda gimomiyo wachandore

• Chenro mar Nyasaye mar reso oganda dhano

• Gima Yesu osetimonwa

• Gima Nyasaye biro timo ne piny koda ne dhano kinde mabiro

Donge nyalo bedo maber kisomo gasedni mondo ing’e weche manie Muma?