Beibele ke puku e tsebjago kudu lefaseng. Ka baka la’ng? Ka mohlala, go bonolo go e kwešiša. E na le diphihlelo tša kgonthe tša batho ba kgonthe le tsela yeo ka yona ba bego ba dirišana seng sa bona le go dirišana le Modimo. Dikanegelo tše di ruta dithuto tše di šomago ka go diriša mantšu a bonolo le a lebanyago ao a ka fetolelwago ka maleme a makgolo le go kwešišwa ke batho bao ba phelago lefelong le ge e le lefe goba ka nako le ge e le efe. Le gona melao ya motheo ya Beibele e šoma ka dinako tšohle.

Sa bohlokwa kudu ke gore Beibele ga e fo ipolela gore ke puku yeo e bolelago ka Modimo eupša gape e ipolela gore ke puku e tšwago go Modimo. E utolla leina la Modimo, semelo sa gagwe le morero wa gagwe wo o sa fetogego wa ge a be a bopa lefase le batho. Beibele gape e anega ka ntwa ya kgale kudu ya magareng ga botse le bobe: kanegelo e kgahlišago le ya legohle yeo e nago le mafelelo a mabotse. Ka go re’alo, go bala Beibele ka monagano o bulegilego go thea motheo wa go ba le tumelo le kholofelo.

Ka Beibeleng, re hwetša tsebišo yeo e ka se hwetšwego le ge e le kae. Ka mohlala, Beibele e re botša therešo ka ditaba tše bjalo ka:

• Moo re tšwago gona le lebaka leo ka lona re tlaišegago

• Thulaganyo ya Modimo ya go lopolla batho

• Seo Jesu a re diretšego sona

• Bokamoso bja lefase le batho

Ke ka baka la’ng o sa hlahlobe ka boripana matlakala a latelago gomme o bone gore Beibele e bolela ka eng?