Ombimbiliya omukanda umwe uundapeswa unene mouye auho. Omokonda yatyi? Omokonda omukanda uhepuiya okunoñgonoka. Muna omahipululo otyotyili ovanthu vokualiko umwe, noñgeni ankho vakala navakuavo na Huku. Omahipululo oo etulongesa okuti tuesukisa okuundapesa onondaka mbapepuka no mbotyotyili mbupondola okupitiyua momalaka omanyingi nokunoñgonokwa novanthu aveho. Iya onondonga Mbombimbiliya apeho mbutukuatesako.

Tyakolela vali, Ombimbiliya hamukanda ko vala upopia konthele ya Huku, mahi omukanda wa Huku. Ipopia enyina lia Huku, novituwa viae, nehando liae etyi atunga ohi, novanthu. Tupu Ombimbiliya ipopia omokonda yatyi ovivi vikahiko omanima omanyingi, noñgeni ovivi ovio mavikamanuako. Okutanga Ombimbiliya monkhalelo yaviuka, tyikuatesako okukala nekolelo, nekevelelo.

Mombimbiliya, tuvasamo onondaka mbuhavasiwa momukanda nawike. Mongeleka, Ombimbiliya itupopila otyili konthele yononthele ombu:

• Opi tuatunda iya omokonda yatyi tumonena ononkhumbi

• Oityi Huku alinga opo ayovole ovanthu

• Etyi Jesus ekahi nokulinga pala onthue

• Oñgeni ohi novanthu mavakakala komutwe wandyila

Tala vali ononthele mbulandulako opo unoñgonoke etyi Ombimbiliya ipopia konthele yotyo.