Baibel em nambawan buk planti man i laikim. Bilong wanem i olsem? Wanpela as em olsem yumi inap kliagut long ol tok bilong en. Baibel i gat ol stori tru bilong ol man i bin stap tru na ol stori bilong pasin ol i mekim long ol narapela na long God. Ol dispela stori i kamapim ol skultok i stret na i klia tru na i isi long ol man inap tanim ol tok bilong en i go long planti handret tokples na ol manmeri i stap long wanem ples o long wanem haptaim, ol inap kliagut long ol dispela tok. Na ol stiatok bilong Baibel i save wok gut long olgeta taim.

Tasol bikpela samting em olsem, Baibel i no stori tasol long God, nogat, em wanpela buk i kam long God. Em i kamapim nem bilong God, ol pasin bilong em, na ol samting em i tingting pinis long mekim long graun na long ol manmeri. Baibel i stori tu olsem kirap long bipo yet na i kam, gutpela pasin na pasin nogut i pait wantaim, em wanpela stori we olgeta manmeri i insait long en na long pinis bilong en gutpela samting bai kamap. Sapos yu ritim Baibel wantaim gutpela bel na tingting, dispela bai strongim bilip bilong yu na helpim yu long wetim gutpela samting i kamap bihain.

Baibel i kamapim ol tok we yumi no inap painim long ol narapela buk samting. Olsem, Baibel i kamapim ol tok i tru long ol kain samting olsem:

• Yumi kamap olsem wanem, na as na yumi karim ol pen na hevi

• Samting God i mekim bilong baim bek ol man

• Samting Jisas i mekim bilong helpim yumi

• Samting bai painim dispela graun na ol manmeri long bihain

I gutpela yu lusim liklik haptaim long lukim ol pes i kam bihain na skelim ol tok Baibel i kamapim.