Tiʼ tuláakal yóokʼol kaabeʼ le Bibliaoʼ letiʼe libro maas kʼaj óolaʼanoʼ. ¿Baʼaxten? Tumen jeʼel máaxak ka u xokeʼ ku yuʼubik bey utiaʼal letiʼ ka tsʼíibtaʼabeʼ. Ku tʼaan tiʼ máakoʼob jach tu jaajil anchajoʼob, ku tsikbaltik bix tu bisilubaʼob tu baatsiloʼob bey xan yéetel Dios. Le tsikbaloʼobaʼ ku kaʼanskoʼob baʼaloʼob maʼalobtak. Tsʼoʼoleʼ tumen séebaʼan u naʼataʼaloʼobeʼ ku páajtal u suʼutul ichil u cientosil idiomaʼob utiaʼal ka naʼataʼak tumen jeʼel máaxakeʼ yéetel kex ka máanak kʼiin. Le baʼax ku yaʼalik le Bibliaoʼ mantatsʼ ku taasik utsil.

U maas kʼaʼanaʼanileʼ, le Bibliaoʼ maʼ chéen ku tʼaan tiʼ Diosiʼ baʼaxeʼ ku yaʼalikeʼ tiʼ Dios u taal. Ku yaʼalik bix u kʼaabaʼ Dios, bix u modos yéetel baʼax oʼolal tu beetaj Luʼum yéetel wíinik. Ku tsikbaltik bix u baʼateʼel le uts tu contra le kʼaasoʼ: junpʼéel nojoch baʼateʼel ku taasik kiʼimak óolal ken tsʼoʼokok. A xokik le Biblia yéetel maʼalob tuukuleʼ yaan u yáantkech utiaʼal ka yanaktech fe yéetel kiʼimak óolal yoʼolal baʼax ku taal u kʼiin.

Le Bibliaoʼ ku yaʼalik u jaajil yoʼolal baʼaloʼob mix tuʼux uláakʼ jeʼel u páajtal k-kanikeʼ. Baʼaloʼob jeʼex leloʼobaʼ:

• Bix anchajik wíinik yéetel baʼaxten k-muʼyaj

• Baʼax u beetmaj Dios utiaʼal u salvartik wíinik

• Baʼax u beetmaj Jesús t-oʼolal

• Baʼax kun úuchul tiʼ wíinik yéetel tiʼ le Luʼumaʼ

Máans a wich teʼ xookoʼob ku segueroʼ utiaʼal a wilik baʼax tiʼ ku tʼaan le Bibliaoʼ.