Nüküjüin Maleiwa niiʼiyataainjachin suuʼuliwoʼu tü jietkat sünainjee nuuʼuliwoʼu Abraham. Anakuwaʼipaliinjana napüshuaʼa na wayuukana nünainjee chi suuʼuliwoʼukai tü jietkat (Génesis 22:18, NM). Jacob, chi nülüinkai Abraham, akolojooshi mapa chaa Egipto. Akooʼomüinraasü tü nüpüshikat chaʼayaa otta Israel münüshii naya.

Achepchieeshii na israeliitakana chaa Egipto nutuma wanee faraón mojulaashi. Akaisaʼa aluwataanüin Moisés nutuma Maleiwa süpüla nujuʼitirüinjanain naya chejee. ¿Kasa naainjaka Maleiwa napüleerua? Akumajaasü nutuma wanee wopu pasanain sünain tü palaa Ishosükat. Naapüin namüin waneeirua pütchi süpüla nuʼunirüinjatüin nakuwaʼipa otta naaʼinmajüin naya. Süpüshi tia pütchikalüirua, eejatü tü Poloosü Pütchi aapünakat nümüin Moisés otta tü pütchi sümaajatkat tü naaʼinrajatkat süpüla sülatinnüinjatüin naainjala noulia. Nüküjüin Moisés namüin na israeliitakana nuluwataainjachin Maleiwa wanee nünüikimaajachi. Nia chi suuʼuliwoʼukai tü jietkat, aküjünakai achiki paala.

400 juya süchikijee tia, nüküjüin Maleiwa nümüin chi aluwataashikai David nuluwataainjachin waneepia chi suuʼuliwoʼukai tü jietkat. Chia, nia chi Mesíaskai, chi nüneekakai Maleiwa süpüla nuʼtteʼerüinjanain na wayuukana otta paʼaraiisüinjatüin tü Mmakat nutuma.

Nüküjüin Maleiwa nükajee David otta waneeinnua nünüikimaajana tü nukuwaʼipainjatkat chi Mesíaskai. Nüküjüin nnojoleerüin yaletayaain naaʼin otta anamiainjachin nia. Nuluwataapa nnojoleerü eein atkawaa, jamü, nnojoleerü eʼnnüin amüin wayuu, anajiraajeena na wayuukana otta maüseerü tü mürütkalüirua. Najaʼttireerü tü ayuuliikat, tü müliaakat otta tü ouktaakat. Na wayuu ouktüinnapakana, wayuujeena nachikuaʼa süpüla kepiainjanain naya yaa saaʼu tü Mmakat.

Nüküjatüjülia Maleiwa nükajee Miqueas joʼuuinjachin chi Mesíaskai chaa Belén otta nükajee Daniel nüküjüin nuʼutünajachin aaʼin. Asoʼireʼennajatü naaʼin nutuma Maleiwa otta Aluwataainjachi nia nutuma chaa iipünaa. Nüküjüin Daniel shiainjatüin tü nuluwataayakat chi Mesíaskai shiiʼirakaka tü suluwataayakat wayuu. ¿Eeʼiyataashiche chi Mesías aküjünakai achiki paala?

(Suluʼujeejatü Génesis 22-50, Éxodo, Deuteronomio, 2 Samuel, Salmos, Isaías, Daniel, Miqueas otta Zacarías 9:9.)