Huku walaele omulume wekolelo Abraiau okuti “ombuto” maituku momona wae. Menyina liombuto oyo, ovanthu “vomalongo aeho” mavakakala nononkhano onongwa. (Gênesis 22:18) Jako, omutekula wa Abraiau, konyima ailukila ko Egitu, oku ombunga yae yeliyauisa aikala elongo lio Isilayeli.

Konyima, omukalavi Farao womo Egitu, apake ova Isilayeli moupika alo Huku aholovona omuuli Moisesi, wahongolela elongo opo vatunde motyilongo avakuate pokati Kelunga Enkhuhu monkhalelo imwe ihuvisa. Konyima yotyo, Huku aavela ova Isilayeli ovitumino, okukutikinyamo Ovitumino Ekwi, opo evehongolele nokuveyakulila. Ovitumino ovio ankho vipopia nawa ovilikutila vilingwa pala okuevela ononkhali. Huku watumine Moisesi apopile ova Isilayeli okuti meveavela omuuli omukuavo. Omuuli oo ankho “ombuto” yalaelwe.

Etyi palamba omanima 400, Huku walaele Ohamba David okuti “ombuto” yapopilwe mo Endene, ankho maikatumina mouhamba umwe maukalako apeho. Ombuto oyo o Mesiya, Omuyovoli waholovonwa na Huku opo ayovole ovanthu nokueta vali Omphangu Yombembwa pano pohi.

Menyina lia David novauli ovakuavo, Huku katutu-katutu wahololola vali konthele ya Mesiya. Vaulile okuti Mesiya makala nomutima weliola, noluembia iya moutumini wae kamamukakala vali ondyala, novivi, novita. Ovanthu aveho mavakala nombembwa navakuavo novinyama. Omauvela, nononkhumbi, nononkhia, kamavikakalako vali, mokonda hatyoko Huku ahandele ponthyimbi, iya vokuankhia mavakatutiliswa.

Huku watumine omuuli Mikeia okuula okuti Mesiya matyitilwa mo Mbelei, iya menyina liomuuli Daniele wapopile okuti konyima Mesiya maipawa. Mahi, Huku ankho matutilisa Mesiya emuvialeka opo akale Ohamba keulu. Tupu Daniele wamuene okuti Ouhamba wa Mesiya maukapingako omautumini aeho. Okuti Mesiya tyilityili weile umwe ngetyi tyaulilwe?

​—Yapolwa mu Gênesis ovikapitulu 22-50, Êxodo, Deuteronômio, 2 Samuel, Salmos, Isaias, Daniel, Miquéias, Zacarias 9:9.