Leza Wabikka Bubambe Bwakunununa Bantu

Leza wakasyomezya Abrahamu iwakajisi lusyomo kuti “lunyungu” lwakasinsimwa luyoozwa kuli umwi walunyungu lwa Abrahamu. Kwiinda muli yooyu, bantu ‘bazisi zyoonse’ bakali kuyoopegwa zilongezyo. (Matalikilo 22:18) Muzyukulu wa Abrahamu, Jakobo, wakazikulongela ku Egepita, kwalo mukwasyi wakwe nkowakakomena akuba cisi ca Israyeli wansiku.

Mukuya kwaciindi, kabali ku Egepita, Farao silunya wakabikka bana Israyeli mubuzike kusikila ciindi Leza naakabikka Musa kuba musinsimi. Ooyu Musa nguwakabasololela kuzwa mu Egepita akubazabusya mumaanzi aakaandanizyidwe camaleele mu Lwizi Lusalala. Kuzwa waawo, Leza wakabapa milawo bana Israyeli, kubikkilizya a Milawo iili Kkumi kuti ibasololele akubakwabilila. Milawo eeyo yakaamba kujatikizya zituuzyo zyakulekelelwa zibi. Kwiinda mukusololelwa amuuya wa Leza, Musa wakaambila bana Israyeli kuti Leza wakali kuyoobatumina musinsimi uumbi. Musinsimi ooyu ngowakali kuyooba “lunyungu” lwakasyomezyedwe.

Nokwakainda myaka iili 400, Leza wakasyomezya Mwami Davida kuti ooyo uuboola, nkokuti “lunyungu” lwakasyomezyegwa mu Edeni, wakali kuyooendelezya bwami butamani. Ooyu, wakali kuyooba Mesiya, Sikunununa wakabikkwa a Leza kuti afwutule bantu akubamba Paradaiso anyika.

Kwiinda muli Davida alimwi abasinsimi bambi, buce-buce Leza wakali kuyubununa makani aajatikizya Mesiya. Bakasinsima kuti wakali kuyooba muntu uulicesya alimwi siluzyalo, alimwi akuti mubweendelezi bwakwe takukabi nzala, kutalulama alimwi ankondo. Bantu boonse banoomvwana alimwi banooli muluumuno abanyama. Kuciswa, kupenga, alimwi alufwu—zyintu zyatakali makanze aa Leza aakusaanguna—ziyoomana, alimwi bantu bakafwa bayoobusyigwa anyika.

Leza wakasinsima kwiinda mumusinsimi Mika kuti Mesiya uyoozyalilwa ku Betelehemu, alimwi kwiinda mumusinsimi Daniele wakaamba kuti uyoojaigwa. Pele Leza wakali kuyoomubusya Mesiya akumubikka kuba Mwami kujulu. Daniele alimwi wakabona kuti Bwami bwa Mesiya buyoonjilila busena mfwulumende zyoonse. Sena ncobeni Mesiya wakaboola kweelana abusinsimi?

—Cibalo eeci ciyeeme aamagwalo aaya: Matalikilo caandaano 22-50, alimwi a Kulonga, Deuteronomo, 2 Samuele, Intembauzyo, Isaya, Daniele, Mika, Zekariya 9:9.

[Kabbokesi kali apeeji 5]

IZYINA LYA LEZA LISALALA

Izyina lyakuti Jehova lilajanika ciindi cakusaanguna mu Bbaibbele mulugwalo lwa Matalikilo 2:4. Izyina eeli lilibedelede lilajanika ziindi zibalilwa ku 7,000 mumabbuku aamumwaambo wakusaanguna mu Magwalo Aasalala. Bupanduluzi bwazyina eeli—“Upa Kuti Kube”—butusyomezya kuti Leza ulijisi nguzu zyakuzuzikizya zyintu zyoonse nzyakanzide kucita alimwi anzyatusyomezya.

[Cifwanikiso icili apeeji 5]