Ua tǎpǔ te Atua ia Aberahama taiva ore e o ˈna te tupuna o tera “huaai” aore ra huero fafauhia. Na roto ia ˈna e haamaitaihia ˈi te mau “fenua atoa.” (Genese 22:18) Ua haere Iakoba, ta Aberahama mootua, i Aiphiti e i reira ua riro to ˈna utuafare te nunaa Iseraela i tahito.

I muri aˈe, ua faatîtî te arii o Aiphiti i te mau Iseraela e tae roa i te taime a maiti ai te Atua i te peropheta Mose no te aratai i te nunaa i rapae ia Aiphiti. No te na reira, ua faatupu te Atua i te hoê semeio ma te vahi i te miti Uteute. I muri aˈe, ua horoa ˈtu te Atua i te mau ture mai na Ture Ahuru no te aratai e paruru ia ratou. Te vai atoa ra te ture no te mau tusia faaoreraa hapa. Na roto ia Mose, ua faaite te Atua ia Iseraela e e tono atu oia i te tahi atu peropheta, o ˈna hoi te huero fafauhia.

Ua hau atu i te 400 matahiti i muri aˈe, ua fafau te Atua i te arii Davida e e riro te tae mai, te huero fafauhia i Edene, ei faatere no te tahi Basileia o te vai e a muri noa ˈtu. O ˈna ïa te Mesia, te Faaora maitihia e te Atua no te huitaata. Na ˈna atoa e faariro faahou i te fenua nei ei paradaiso.

Na roto ia Davida e tahi atu mau peropheta, ua faaite riirii te Atua e rave rahi atu â haamaramaramaraa no nia i te Mesia. Mea haehaa e mǎrû oia e i raro aˈe i ta ˈna faatereraa, e ore roa ïa te poia, te ohipa tia ore e te tamaˈi. E hau te taatoaraa, oia atoa te taata e te mau animara. I te mea e aita te maˈi, te mauiui e te pohe i roto i ta te Atua opuaraa, e faaorehia ïa te reira. E tia-faahou-mai atoa tei pohe no te ora i te fenua nei.

Na roto i te peropheta Mika, ua faaite te Atua e e fanauhia te Mesia i Betelehema. Na roto i te peropheta Daniela, e haapohehia ïa oia i muri aˈe. E faatia-faahou-mai râ te Atua i te Mesia mai te pohe mai a faariro atu ai ei Arii i te raˈi. Ua faaite atoa Daniela e e mono te Basileia o te Mesia i te mau faatereraa atoa e a muri noa ˈtu. Ua tae mai iho â anei te Mesia mai tei tohuhia?

—Faatiaraa o te Genese pene 22-50, oia atoa Exodo, Deuteronomi, Samuela 2, Salamo, Isaia, Daniela, Mika, Zekaria 9:9.