Dioseʼ tu yaʼalaj tiʼ Abrahaneʼ ichil u paalal kun jóokʼol le «chʼiʼibal» u yaʼalmoʼ. Yoʼolal le «chʼiʼibal[aʼ]» yaan u kiʼikiʼtʼantaʼal «tuláakal xan u múuchʼ kaajiloʼob yóokʼol kaab» (Génesis 22:18). Ka máan kʼiineʼ Jacob, u yáabil Abrahaneʼ, bin kajtal Egipto; ka yaʼabchaj u chʼiʼibaleʼ kʼuch kʼaj óoltbiloʼob u kaajil Israel.

Teʼeloʼ palitsiltaʼaboʼob tumen juntúul kʼasaʼan faraón, baʼaleʼ túuxtaʼab Moisés utiaʼal u jáalkʼabtikoʼob. Dioseʼ yéetel u nojoch páajtalileʼ tu jatsaj le Chak Kʼáaʼnáaboʼ ka kʼáatmáanoʼobiʼ. Utiaʼal u kanáantkoʼob yéetel u nuʼuktikoʼobeʼ Dioseʼ tu tsʼáajtiʼob leyoʼob, jeʼex le Diez Mandamientosoʼ, tuʼux ku yaʼalik bix unaj u kʼubik u siibaloʼob utiaʼal u perdonartaʼal u kʼebanoʼob. Yéetel u nuʼuktaj Dioseʼ Moiseseʼ tu yaʼalaj tiʼ le israelitaʼoboʼ yaan u túuxtaʼaltiʼob uláakʼ juntúul profeta, le «chʼiʼibal» u yaʼalmaj Diosoʼ.

Ka máan maas tiʼ cuatrocientos jaʼaboʼobeʼ, Dioseʼ tu tsʼáaj u yojéelt rey Davideʼ le «chʼiʼibal» tu yaʼalaj teʼ Edenoʼ yaan u gobernar utiaʼal minaʼan u xuul. Le chʼiʼibalaʼ letiʼe Mesíasoʼ, le máax yéeyaʼan tumen Dios utiaʼal u salvartik wíinik yéetel u yutskíintik le Paraíso way Luʼumaʼ.

Jujunpʼíitileʼ Dioseʼ tu tsʼáaj ojéeltbil u maasil yoʼolal le Mesías tu chiʼ David yéetel uláakʼ profetaʼoboʼ. Letiʼobeʼ tu yaʼaloʼobeʼ le Mesíasoʼ kabal u yóol, jach uts, yéetel ken gobernarnakeʼ maʼ kun antal wiʼijil, kʼasaʼanil, mix baʼatelil. Yaan u yantal jeetsʼelil tiʼ le máakoʼoboʼ yéetel maʼ kun beetbil loob tiʼob tumen le baʼalcheʼoboʼ. Kʼeban, muʼyajil yéetel kíimil —baʼaloʼob maʼ tiʼ Dios u taaleʼ— yaan u xuʼululoʼob. Le kimenoʼob xanoʼ yaan u kaʼa kuxkíintaʼaloʼob way Luʼumeʼ.

Tu chiʼ le profeta Miqueasoʼ, Dioseʼ tu yaʼaleʼ Belén kun síijil le Mesíasoʼ, yéetel tu chiʼ le profeta Danieloʼ tu yaʼaleʼ yaan u kíimsaʼal. Baʼaleʼ aʼalaʼab yaan u kaʼa kuxkíintaʼal yéetel yaan u tsʼaʼabal u beet u reyil teʼ kaʼanoʼ. Danieleʼ tu tsʼíibtaj xaneʼ u reino le Mesíasoʼ yaan u láaj xuʼulsik tuláakal le uláakʼ gobiernoʼoboʼ. ¿Taal wa le Mesías jach jeʼex aʼalaʼabikoʼ?

(Jóoʼsaʼan tiʼ Génesis 22-50, bey xan tiʼ Éxodo, Deuteronomio, 2 Samuel, Salmos, Isaías, Daniel, Miqueas, Zacarías 9:9.)