Öni Edward Herbert ekö, atre Agele ka hape, “ame la atr ka thatreine kö nue la ngazo i itre xan, tre kösë lo atr ka thë la pont hnei angeice hna troa trongën.” Nyidrë la ketre atr ka thele troa atrepengöne la aqane trongene la mele ne la atr, nge hnei nyidrë hna qaja la ketre kepine matre loi e tro sa nue la ngazo i itre xan; öni nyidrë: Ke ame kö ngöne la ketre ijin, tre easë hmaca pena la ka troa sipo itre xan troa nue la ngazo së. (Mataio 7:12) Ngo hetre ketre kepine ka sisitria catre kö, ka upi së troa nue la ngazo i itre xan. Kolo hna qaja hnei Paulo aposetolo ngöne Kolose 3:13.—E jë.

Itre atr ka ngazo së; celë hi kepine matre easa aelëhnin, maine akötrë itre xan ngöne la itre xa ijin, nge ketre tui angatre fe. (Roma 3:23) Nemene la aqane tro sa lapa tingetinge memine la itre atr ka tha pexeje kö? Hnei Akötresie hna aijijë Paulo troa thuecatre së troa loi thiina, me nue la ngazo i itre xan. Ka hetre thangane ka loi pala hi la eamo celë kowe la atre trongën ej ngöne la hnedrai së. Celë hi matre, epi tro sa pane thele troa trotrohnine hnyawane la aliene la trenge ewekë i Paulo.

“Loi e ixomi hninekeune . . . nyipunie.” Ame la “ixomi hninekeune” qene heleni, tre hnaithanata lai nyine qaja la atr ka menyik, nge tha ka canga elëhni kö. Kola qaja hnene la ketre itus ka hape, kola mama lai thiina cili thene la itre Keresiano, ke “angatr a xomihnine la itre tria i itre xan, maine la thiina ne la itre atr cili, nge ka aelëhni angatr.” Nge ame lai hna hape, “ixomi hninekeun,” tre nyine amamane ka hape, maine lue atr, tha ala casi kö la ka loi thiina koi ketre, ngo nyidroti asë hi. Haawe, maine atrehmekune hi së ka hape, hetrenyi së la itre thiina ka hane aelëhni itre xan, tha tro kö sa nue la itre tria i angatr troa angazone la aqane ce mele së me angatr. Ngo tune kaa e ngazo ju la ketre koi së?

“Loi e . . . inuekeune nyipunie.” Önine la ketre atr ka inamacane göne la qene heleni ne lai hna hape “nue,” ka hape, tha kolo kö lo hnaewekë hna lapaa majemine qaja, ngo ketre kö, ka qaja la nyipi aqane troa nue la ngazo i ketre. Önine la ketre itus ka hape, ame lai hnaewekë cili, tre kola qaja ka hape, troa nualoine hnyawane lai atr ka ngazo koi së. “Maine hete gele i kete ate koi kete,” ngo hna nue hnyawane la ngazo i angeice hnene lai hna akötrën, troa mama e cili ka hape, hnei angeice hna nualoine la atre iakötrë. Ngo pine nemene matre nyipi ewekë tro sa ujë tune lai? Pine laka, ame hë e ketre ijin, ma easë pena lai ka troa sipo ketre troa nualoinyi së.

“Hna nue nyipunie hnei [Iehova, MN], kete tro nyipunie a tun.” Celë hi kepine matre loi e tro sa nue la ngazo i itre xan: hnei Iehova hna nue la itre ngazo së. (Mika 7:18) Pane mekune ju së la aqane hnime gufane Iehova la itre atr ka nyipi ietra. Ame pena Iehova, tre tha ka hane kö Nyidrëti ngazo. Ngo ka hmala la hni Nyidrë troa nue hnyawane la ngazo ne la itre atr ka ietra, ngacama atre hi Nyidrëti laka, pë fe kö hnei Nyidrëti hna troa hane ngazo koi angatr. Iehova hi la tulu ka sisitria, ke Nyidrëti a nualoine la itre atr ka nyipi ietra!

Kola upi së hnene la utipine i Iehova troa easenyi Nyidrë, me nyitipu Nyidrë. (Efeso 4:32–5:1) Haawe isa hnyingëne jë pe së ka hape, ‘Hnauëne pena la tro ni a tha nue la ngazo ne la ketre atr ka tha pexeje kö tunge hi, nge hnei Iehova pe hna nualoinyi ni?’—Luka 17:3, 4.