Kioso ki uia ni ku tala ioso ia ku kondoloka, o mesu mê ni uongo uê a kalakala kumoxi phala ku ku kuatekesa ku mona ioso. Eie u mona kibundu bhu mbandu iê, anga u banza se u kidia mba kana. Eie u tala ku diulu, u mona kuila lelu ki kua-nda noka kana. Eie u mona o izuelu i ua mu tanga kindala, anga u sota ku tendela se ihi ilombolola. Mu kidi, o jikolo ja mu tula ku muxima uê. O kuila kidi muene?

O kolo ia kibundu ki ua mono, i ku kuatekesa ku mona se o kibundu kiabhi kiá ni kuila se kia uabha phala ku kidia. O kolo ia diulu ni ia matuta, i tu kuatekesa kuijiia se kua-nda noka mba kana. Mu ku tanga o izuelu mu milongi íii, o mesu mê i sanguluka, mu ku mona kuila o kolo ia papela ki i difu ni kolo ia izuelu. Kienhiki, nange sé ku kijiia, eie ithangana ioso uene mu kalakala ni jikolo phala ku ku kuatekesa kuijiia ioso iala ku mundu. Maji o jikolo ji bhanga ué kima ku muxima uê.

Kioso ki u kuata o ku nhunga mu diloja, eie u mona ima iavulu jikolo phala ku ku uabhesa o mesu. Né muene se uene mu mona mba kana, o akua kulondekesa o ima ia ku sumbisa mu mutelembe ua izunzumbia, a sola jikolo ja uabha phala ku suínisa o vondadi iê ia ku i sumba, kolo ji uabhela o ahatu ni mala. O akua ku fuamesa o jinzo, o akua ku bhanga izuatu, ni akua ku pindala o ima, ejiia uá kuila o jikolo ji tena ku sangulukisa o muxima ua muthu.

O athu nange a mona o jikolo mu maukexilu avulu ki i difu, mukonda dia kididi, ijila ni ifua. Mu kifika, saí athu mu Azia, o kolo ia kusuka kilombolola jimbongo ni fesa, maji mu ididi ia mukuá mu África, kilombolola mukôndo. Maji sumbala kala muthu uala ni ukexilu uê, athu oso a uabhela ku mona kolo javulu. Tua-nda di longa kolo jitatu ni ihi i bhanga o kolo jiji ku athu.

O kolo ia KUSUKA i bhenha kiavulu. Saí bhabha, o kolo ia kusuka kilombolola nguzu, ita mba kiluezu. O kolo íii i tula kiavulu ku muxima uetu ni kuila i tena ku bhangesa o ji célula ku bhana nguzu ku mukutu uetu, o muthu u bhuima dingi, o manhinga a fuafua dingi ku mukutu kala menha.

Mu Bibidia, o kizuelu ia “kusuka” mu dimi dia Hebalaiku kia tundu mu kizuelu kilombolola “manhinga.” O Bibidia i tumbula o kizuelu kia kusuka, phala kulondekesa muhatu mukua munhungu, kijibhangânga ua zuata izuatu ia kusuka ua mondala ku “kiama [kia muxitu] ki kusuka . . . ni majina avulu a ku xonguena Nzambi.”—Dijingunuinu 17:1-6.

O kolo ia KIANGU KIA UISU ki i difu ni kolo ia kusuka, mukonda o kolo ia kiangu kia uísu ki i kuatekesa ku bhana nguzu ku mukutu maji i bhangesa o mukutu ku tululuka. O kolo ia kiangu kia uísu, kolo ia batama i bhekela ku tululuka. Etu tu tululuka kioso ki tu mona jaludim iezala ni iangu ia uísu. Kiebhi kia moneka o kolo íii i tululukisa? O musoso ua lungu ni ibhangelu i tu sanga mu divulu dia Dimatekenu, ulondekesa kuila Nzambi muéne ua bhange o iangu ia uísu phala o athu mu ixi.—Dimatekenu 1:11, 12, 30.

 O kolo ia ZELE ene mu i sokesa ni mukengeji, kilangidilu, ni ku zela. Ene mu ki sokesa ué ni kídifua kála, o mbote, ni ku iuka. O kolo ia zele iene ia beta o ku i tumbula mu Bibidia. Mu isuma, o athu ni ji-anju, ene mu a londekesa ni izuatu ia zele phala kulondekesa o ku iuka ni ku zela mu nzumbi. (Nzuá 20:12; Dijingunuinu 3:4; 7:9, 13, 14) O jikabalu ja zele ni athu a mondala-ku a zuata izuatu ia zele, ni linhu ia fina ia zele, alombolola ita ia iuka. (Dijingunuinu 19:14) Nzambi u tumbula o kolo ia zele phala kulondekesa kuila muéne ua mesena ku loloka o ituxi, mu kuzuela: “Né-mbé ituxi ienu ia kusuka kala husu, ia-ndu zela mukua ni neve.”—Izaia 1:18.

O ukexilu ua Bibidia ua ku tumbula o jikolo, ulondekesa kuila Nzambi uejiia kuila o jikolo ji tula ku mixima ia athu. Mu kifika, o divulu dia Dijingunuinu dia zuela o ima i tuene mu dibhana na-iu lelu kala o ita, nzala, kufuá mukonda dia nzala mba mabhebhu. Phala ku tu kuatekesa ku lembalala o izulukutu íii, o divulu dia Dijingunuinu di tu londekesa athu a mondala mu jikabalu—maji kala kabalu ni kolo iê.

Kia dianga, saí kabalu kazele, kilombolola o ita ia iuka ia Kristu Jezú. Kia kaiiadi, kabalu ka kusuka, kilombolola ita ia ifuxi ku mundu. O ka katatu, kabalu ka xiketela, kilombolola, nzala. O ka kauana, kabalu ‘kazeluluka o ua mondala-ku jina diê kufuá.’ (Dijingunuinu 6:1-8) O kolo ia jikabalu joso, i tena ku tu kuatekesa kuijiia o ilomboluelu ia jikabalu. Tu tena ku di lembalala o jikabalu jiji jala ni kolo javulu, ni kuijiia ihi ji tu longa ia lungu ni izuua ietu.

Mu Bibidia tu sanga-mu phangu javulu ja jikolo phala ku tu kuatekesa ku lembalala o ima. O Mubhangi ua mukengeji, ua jikolo, ni ua athu, ni uhete uoso u longa o athu bhu kaxi ka jikolo phala ku a kuatekesa ku tendela ni ku lembalala o ima. O jikolo ji tu kuatekesa ku tendela o milongi. O jikolo ji tula ku muxima uetu. O jikolo ji tena ku tu kuatekesa ku lembalala ima iavulu. O jikolo, ujitu ua henda ua tu bhana o Mubhangi uetu phala ku tu kuatekesa ku sanguluka ku muenhu.