Ora bo wak rònt, bo wowo i bo selebro ta traha huntu pa kompilá informashon. Por ehèmpel, bo ta wak un fruta i bo ta disidí si bo ke kom’é òf nò. Bo ta wak shelu i bo ta pensa ku áwaseru no ta bai kai awe. Bo ta mira e palabranan ku bo ta lesando aworakí i bo ta komprondé kiko nan ke trese padilanti. En bèrdat, e kolónan ku bo ta mira tin efekto riba bo. Kon asina?

E koló di e fruta ta yuda bo determiná si e ta hechu i si e ta duna bo gana di kom’é. E koló di shelu i di nubia ta yuda bo saka afó kon e wer ta. E kontraste di koló den e artíkulo akí entre e teksto i su background ta permití bo wowonan les’é ku fasilidat i disfrutá di dje. Sí, tal bes sin ku bo ripará, tur ora bai bo ta usa koló pa yuda bo prosesá informashon tokante e mundu rònt di bo. I no esei so, koló tin su impakto riba bo emoshonnan tambe.

Ora bo ta kana den un supermerkado, bo ta rondoná pa un gran variedat di empake ku ta diseñá pa atraé bo bista. Sea ku bo ta realisá esei òf nò, kompanianan di publisidat ta skohe koló i kombinashon di koló kuidadosamente pa atraé hende segun nan gustu, sekso òf edat. Ekspertonan ku ta dekorá kas, diseñá paña i artistanan tambe sa ku koló por influensiá emoshon di hende.

Kada hende por wak koló na un manera diferente, dependiendo di su kultura i kustumbernan. Por ehèmpel, algun hende di Asia ta relashoná kòrá ku suerte i fiesta, pero den algun parti di Afrika, kòrá ta koló di luto. Pero tin sierto koló ku tin e mesun impakto emoshonal riba hende, sin importá na unda nan a lanta. Laga nos analisá tres ehèmpel.

KÒRÁ. E koló akí ta bibu. Hopi biaha nan ta relashon’é ku energia, guera i peliger. E ta un koló emoshonal intenso i por stimulá un hende su metabolismo, pone hala rosea mas lihé i subi su preshon.

Den Beibel, e palabra hebreo pa “kòrá” ta bini di un palabra ku ta nifiká “sanger.” Beibel ta usa kòrá bibu pa pinta un imágen impaktante di un prostituta asesino bistí na püs i kòrá ku ta kore riba “un bestia salbahe koló kòrá bibu . . . tur na nòmber ku ta blasfemá Dios.”—Revelashon 17:1-6.

BÈRDÈ. E koló akí ta produsí un reakshon kontrario na kòrá, ya ku e ta redusí e metabolismo i ta produsí un efekto kalmante. E ta un koló ku hende ta relashoná ku trankilidat. Ora nos mira un hòfi òf seru bèrdè, nos ta sinti nos relahá. E relato di kreashon den Génesis ta bisa ku Dios a duna humanidat yerba bèrdè i vegetashon.—Génesis 1:11, 12, 30.

BLANKU. Hopi hende ta relashoná blanku ku lus, siguridat i limpiesa. E ta ser asosiá tambe ku kualidatnan manera bondat, inosensia i puresa. Blanku ta e koló mas menshoná den Beibel. E Palabra di Dios ta deskribí hende i angel ku ta aparesé den vishon bistí na blanku, lokual ta enfatisá hustisia i limpiesa spiritual. (Huan 20:12; Revelashon  3:4; 7:9, 13, 14) Kabai blanku ku ginete bistí na blanku riba nan ta simbolisá guera hustu. (Revelashon 19:14) Dios ta usa koló blanku pa enfatisá ku e ta kla pa pordoná piká: “Maske boso pikánan ta manera skarlata [òf, kòrá bibu], nan lo bira blanku manera sneu.”—Isaías 1:18.

E uso ku Beibel ta duna koló ta demostrá kon bon Dios konosé e efekto ku koló tin riba nos emoshonnan. Por ehèmpel, e buki di Revelashon ta kontené un vishon di kosnan ku ta tumando lugá den nos tempu, manera guera, hamber i morto okashoná pa skarsedat di kuminda i enfermedat. Pa yuda nos kòrda esaki, un vishon ekstraordinario ta papia di ginetenan ku ta kore riba vários kabai, no di un koló so, sino di diferente koló.

Esun promé ta un kabai blanku, ku ta simbolisá e guera hustu di Kristu Hesus. Despues ta sigui un kabai kòrá bibu, ku ta representá guera entre e nashonnan. Siguientemente tin un kabai pretu spantoso, ku ta simbolisá hamber. Tras di dje ta sigui un “kabai blek; i esun sintá riba dje tabatin e nòmber Morto.” (Revelashon 6:1-8) Kada koló ta produsí un efekto riba nos emoshonnan, ku ta kuadra ku loke e kabai ta representá. Esei ta yuda nos kòrda e kabainan di koló akí fásilmente i loke nan ta siña nos enkuanto nos tempu.

Den Beibel tin hopi ehèmpel di uso di koló pa krea imágen mental bibu. Sí, e Kreador di lus, koló i wowo humano ta usa koló na un manera maestral pa graba imágen den nos mente ku ta fásil pa komprondé i keda kòrda. Koló ta yuda nos kompilá i prosesá informashon, e tin un efekto riba nos emoshonnan i e por yuda nos kòrda ideanan importante. Koló ta un regalo amoroso di nos Kreador pa yuda nos disfrutá di bida.