1. Ihi i tua tokala o ku bhanga phala ku kala ni kixikanu kia kidi?

ATHU avulu, a xikina ngó ku íii ia mona mi mesu mâ. Kiebhi ki tu tena o ku kuatekesa o athu iá, phala n’a kale ni kixikanu kua Jihova? Mukonda o Bibidia iamba kuila, ‘kiluua ku kala muthu ua mono Nzambi.’ (Nzuá 1:18) Kuma etu ué ki tu tena ku mu mona, kiebhi-phe ki tu tena o ku kala ni kixikanu kua Jihova, o “Nzambi ua kambe kumoneka ku mesu?” (Kol. 1:15) O kia dianga, o kuijiia o ilongesu ia makutu ia lungu ni Jihova. Tua tokala o kuijiia kiambote ihi i longa o Bibidia phala ku tolola o ibanzelu ‘i fidisa, kuehela athu ku’ijiia Nzambi.’—2 Kol. 10:4, 5.

2, 3. Milongi iahi i iiadi iene mu fidisa o athu o kuijiia o kidi kia Nzambi?

² O kilongesu kia makutu, kia di muange ku mundu uoso, o kilongesu kia kuila o ima ioso ia moneke ngó, se-ku Nzambi ua i bhange. O ibanzelu íii ia athu, ki iene i longa o Bibidia, o ilongesu íii i bhangesa o athu ku kala sé kidielelu. O ilongesu íii, iamba kuila o ima ioso ieze ngó, sé ku muthu ua i bhange; kiki, ki bhangesa ku banza kuila o muenhu ua muthu ki uala ni valolo.

³ Athu a mukuá mu Kidistandade a longa kuila o ngongo, ni ima ioso mu ixi, ia moneka ku tu mazunda tua mivu ku dima. O athu a longa o milongi ia makutu, a xila o izuelu ia Bibidia, maji amba kuila, o ima ioso Nzambi ua i bhange ngó mu izuua isamanu, kala kizuua 24 a ji ola. Mukonda dia ixinganeku iá, ene a dituna o ima ilondekesa o jingijiie. Mukonda dia ilongesu iá, saí athu ka xikina mu Mak’â Nzambi, a bhangesa akuâ ku kamba o ku xikina. O athu iá a longa o ilongesu íii, a tu lembalesa o athu ku hama ia dianga, a suínine mu bheza Nzambi, ‘maji o ku suína kuâ kua kambele o kuijiia kua kidi.’ (Loma 10:2) Kiebhi ki tu tena ku a kuatekesa bhu kaxi ka Mak’â Nzambi, phala ku tolola  o “ima ioso ia ukumbu ua xitu,” ia lungu ni milongi ia kuila o ima ioso ieze ngó, ni ilongesu ia mukuá ia makutu? * Tu tena ngó o ku bhanga kiki, se tuijiia ihi i longa o Bibidia.

4. O kixikanu kietu kijila bhu kaxi kahi?

⁴ O Bibidia i tu tendelesa phala ku kala ni kuijiia kua soko. (Jisa. 10:14) Jihova ua mesena tu kala ni kixikanu kilondekesa o kidi, mu íii i tu mona ia kidi, mu veji dia ku kaiela o milongi i bhana o athu mba o ijila ia jingeleja. (Tanga Jihebeleu 11:1.) Phala ku kala ni kixikanu kia suína kua Nzambi, kia dianga tua tokala tuijiia ni kidi kioso kuma Jihova muene o Nzambi ia kidi. (Tanga Jihebeleu 11:6.) Etu tuejiia kuma kuene Nzambi, ki mukonda dia ibanzelu ia athu, maji tua xikina bhu kaxi ka ku mona o ibhangelu ni ‘ku xinganeka kiambote.’—Loma 12:1.

5. Ihi i tena o ku tu kuatekesa phala tu xikine kuila kuene Nzambi?

⁵ Poxolo Phaulu ua tu londekesa mukonda diahi tua tokala ku xikina kuila kuene Nzambi ia kidi, né muene ki tuene ku mu mona. Phaulu ua soneka ia lungu ni Jihova: ‘Kuma tundé Nzambi kia bhange oxi, o ima iê muene ia kambe ku moneka ku mesu, ki tale o nguzu iê i nanga, uixi o Unzambi uê, ki i jimbi, mukonda ia di monekena. Kuma athu ia a jimbulukila mu imbamba ia bhange Nzambi.’ (Loma 1:20) Kiebhi ki u tena o ku kuatekesa o athu ala ni phata ia ku xikina kuila kuene Nzambi, o ku mona o kidi kiala mu izuelu ia soneka Phaulu? Eie u tena kuijiia o ibhangelu iala ni muenhu, ilondekesa o kutena ni unjimu ua Nzambi.

6, 7. Kiebhi o kutena kua Jihova, a kulondekesa mu ima iiadi i tu langa?

⁶ O ku tena kua Jihova tu ku mona ku ima iiadi i langa o muenhu uetu—o munza mu ixi u tu bhuima, ni dimbinza di langa o ixi ni ima iê. O munza, u bhanga dingi, o ku u bhuima ngó ndenge. Maji u tu langa ué ku matadi ene mu di loza ku diulu. O ibhasu ia matadi se ia laukile mu ixi, ieji jokotesa o ixi. Maji o dimbinza dia diulu, di jokotesa o matadi iá, mu kiki, ku kala mukengeji u bhenha mu dimbinza mu usuku u uabhesa o diulu.

⁷ O dimbinza dia ixi, di tu langa ué ku ima ia iibha. Moxi dia ixi, mu kaxi muala kima ki tu langa. O kima ki vungina o ixi i nhunga kála felu i bheka dimbinza dia nguzu di langa o ixi ioso, di di sanzumuna mu dimbinza. O dimbinza didi, kioso ki di di sanzumuna, di tu langa ku mukengeji ua muanha ni kioso ki baza o matadi ala mu ididi ia mukuá. Mukonda dia dimbinza dia ixi, kioso ki baza o nguzu ia mukengeji, o mienhu mu ixi ki u jokota. Mu veji dia kiki, o nguzu iê i texi o ima i tu bhanga kia iibha, mu ididi iengi. Tuene mu mona kiebhi kiene mu tu langa ku dimbinza, kioso ki tu mona o mukengeji ua mu nhunga ku diulu mu usuku, u tunda ku Thunda uia ku Luiji. Ki kuala phata, kuma Jihova “Ngungu-a-Nzumba.”—Tanga Izaia 40:26.

8, 9. Kiebhi ki tu tena ku mona o unjimu ua Jihova mu ima i bhangesa kuila mu ixi mu kala muenhu?

⁸ Tu tena ku di longa o unjimu ua Jihova, bhu kaxi ka ima ia bhange i tu kuatekesa ku kala ni muenhu mu ixi. Mu kifika, xinganeka kuma o mbanza mua tungu athu avulu, io kondoloke ni ilumbu, mua  kambe kudia ni menha, athu kejiia kuebhi kua tena o ku sumba o ima íii phala ku dikila o muenhu. O mbanza íii, ieji kala kála dixidixilu, ieji kala sé athu. O ixi ietu ia difuangana kála mbanza io kondoloke ku ilumbu. Maji o ixi ietu iezala ni menha avulu, tu tena ku sumba ima ia mukuá phala ku dikila o muenhu. O “mbanza íii io kondoloke,” muene mu tena ku tunga mazunda ni mazunda athu ni iama, ku tunda muijii kuiza muiji. Mukonda diahi? Mukonda o ixi, io bhange ni ukexilu ua ku lungulula o ima, ni ku di bhanga ia ubhe.

⁹ Xinganeka o munza u tuene mu bhuima. Mazunda athu ene mu bhuima o munza uambote ni ku katula o munza moxi dia thulu, o munza ua iibha, maji né kiki, o munza ki uene mu bhua, ki uene mu difunga ni munza ua íibha uene mu tunda mu thulu. Mukonda diahi? O kitambuijilu kiki, tu ki sanga mu mixi ni iangu. O mixi ni iangu ia uisu, i tambula o munza ua iibha uo bhuime kiá, menha, ni mukengeji ua muanha, u bhanga o munza uambote phala o muenhu mu ixi. Jihova u bhangesa o mixi ni iangu ia bhange, phala ku bhana “o muenhu ni ku bhuima.”(Ika. 17:25) Iú unjimu ua dikota!

10, 11. Kiebhi ki tu tena kuijiia o unjimu ua Jihova mu ibamba kála o kimbiambila ni kalumbuambua?

¹⁰ O unjimu ua Jihova tu u mona ué, mu ukexilu ua bhange o ima mu ixi. O jingijiie a di longo kuila, mu ixi muene mazunda 2 mba 100 a mazunda ndenge, a ima iene ni muenhu. (Tanga Jisálamu 104:24.) Tua-nda di longa dingi o unjimu ua Jihova, mu ima ia mukuá ia bhange.

¹¹ Mu kifika o kimbiambila kiala ni uongo ua sokela ngó ni mutue ua lapizela. Maji né kiki, o kiambimbila ki tuka 3.000 a ji kilómetulu, tundé ku ixi ia Canadá katé ku muxitu ua ixi ia Mexico, kiene ki bhanga kiki ni kikuatekesu kia muanha. Maji kiebhi ki ki tena ku bhanga kiki, se ku kamba muanha? Jihova ua bhange o kibamba kiki ni uongo u mu kuatekesa kuia bhu kididi kioso-kioso kiandala, se ku jimbidila. Xinganeka ué o mesu a kalumbuambua. O kibamba kiki, ki mona ni mesu aiiadi. Kala diesu diala ni 30.000 a ma lumuenu. O uongo ué, u tena ku kuatesa o kibamba kiki ku tonginina, bhu kaxi ka malumuenu ala mu mesu, ni kuijiia kuebhi kuala o dikumbi.

12, 13. Kixinganeku kiahi ki uala na-kiu, kia lungu ni Jihova o ku bhanga o ji célula phala ku bhanga o mukutu uê?

¹² Kiene ki moxi ué, Jihova ua bhange o ima bhu kaxi ka ji célula, phala i kale ku muenhu kála o athu. Mu kifika, o mukutu ué uala ni 100 ia mazunda a ji célula. Moxi dia célula imoxi, tu sanga-mu, kama a kexana DNA. Mu DNA tu sanga-mu o ilondekesu ioso ia tokala, phala o mukutu ku tenana.

¹³ Ilomboluelu i kuxi iala mu DNA?  O kama kofele-fele ka DNA, a tena ku ka sokesa ni dilonga (CD). O dilonga didi, di tena ku bhaka maka avulu, kála dicionário dia muvimba, kima kia ku diuana, mukonda o dilonga (CD), kama kofele ka palastiku. Mu kiki, o kama kofele ka DNA, ka tena ku bhaka dingi maka avulu, o mazunda ku mazunda a tatu ndenge a malonga (CDs)! Ku mbandu ia mukuá, o kanguto ka xá kezala ni DNA, ka tena ku bhaka itendelesu iavulu, i soka phala ku bhanga o athu oso ala ku muenhu lelu, mu 350 a ji veji!

14. Kiebhi ki tu divua, mu ku mona o ima ia tungununa o jingijiie ia lungu ni ibhangelu ia Jihova?

¹⁴ O izuelu ia Sobha Davidi, ia londekesa kála Jihova ua kexile ni divulu dia soneka o ima ia bhingi phala ku bhanga o mukutu ua muthu. Davidi uambe: ‘Mesu mê ma mono o mukutu uami, kioso kiluua u di umba; o idiandu iami ua i soneka mu divulu diê, ni izuua iami i nga kà bhanga, kala ki luua ngó ngi i mateka.’ (Jisá. 139:16) Tu tena kuijiia mukonda diahi Davidi, ua mesenene ku ximana Jihova kioso kia kexile mu xinganeka kiebhi kia mu bhange. O jingijiie a tungununa ima iavulu ia a bhangesa o ku di uana, ia lungu ni mukutu ua muthu. O ima íii ia tungununa, i tu xikinisa ia soneka o mukuá Jisalamu ia lungu ni Jihova. Muéne uambe: “Nga sakidila Ngana, kuma ki kôla ki ua ngi iudika, ki kuata uôma! Ikalakalu ié, Ngana, madiuanu! Kia ngi tetulukila muene kiambote.” (Jisá. 139:14) Kiebhi-phe o athu, ka tena ku mona kuila o ima ioso íii io bhange kua Nzambi ia Kidi?

15, 16. (a) Kiebhi o madivulu metu ene mu kuatekesa o athu o kuijiia ia lungu ni ibhangelu ia Nzambi? (b) Iebhi o milongi i ua uabhela dingi ku diambu Teve Um Projeto? Iene mu moneka mu Despertai! ia katunda?

¹⁵ Ku mivu iavulu o kadivulu Despertai!, kene mu kuatekesa mazunda athu kuijiia ilondekesa o ibhangelu ia Nzambi ietu ia kidi. Ku mbeji ia Katutu ka muvu ua 2006, o milongi i zuela: “Existe um Criador?” O milongi íii, a i bhange phala ku kuatekesa o athu a xikina kuila o ima ieze ngó, sé ku muthu ua i bhange. O phang’ietu ia muhatu, ua tumikisa, mukanda ku betele ia Estados Unidos ia América, uambe: “O kikalakalu ki tua bhange kia ku bhana o kadivulu kaka, kiende kiambote. Muhatu umoxi ua bhingi 20 a madivulu. Muéne uexile mulongexi ua biologia, iu ua mesenene kuila, o maxibulu mê a tambula ué kala muthu kadivulu kamoxi. Phang’ietu ia diiala ua soneka: “Eme ngene mu boka ni muanhu tundé ku muvu ua 1940, nga mu tenesa 75 a mivu, maji nuka nga sangulukile kiavulu kála o mbeji i nga bhanene o Despertai! didi.”

¹⁶ Tundé ku muvu ua 2008, o Despertai! diene mu bheka milongi iambe: “Teve Um Projeto?” O milongi íii, i tu longa ia lungu ni ibhangelu ia madiuanu, ni kiebhi o athu ene mu mesena ku fikisa o Mesene ia Katunda. Etu tua tambula tu madivulu ku muvu ua 2010, tuala ni dijina A Vida—Teve Um Criador? O jifikula ji moneka mu ka divulu kaka, ji tu kuatekesa mu ku sakidila Jihova mu ibhangelu iê. O ibhuidisu ku disukilu dia milongi ia kadivulu, i kuatekesa o atangi, o ku xinganeka ku milongi ia mu tanga. O kadivulu kaka, kambote phala o sidivisu ia kuboka mu inzo ni inzo ni mu ikoka.

17, 18. (a) Enu mu jitata, kikalakalu kiahi ki muala na-kiu? (b) O kuila muene mu longa o kadivulu kaka ku muiji uenu?

¹⁷ Enu mu jitata, o kuila mua mu di longa ni an’enu o kadivulu kaka, mu ubhezelu ku muiji? Se eie u bhanga kiki, ua-nda ku a kuatekesa o ku kala ni kixikanu kia kidi kua Nzambi. Nange eie uala hanji ni tuana a mu di longa mu xikola. O alongexi ene mu bhana milongi iamba kuila, o ima  ioso ia moneke ngó, seku mubhangi ua i bhange. O jingijie, alongexi, mitelembe ia izunzumbia, ilondekesa kuma o milongi ia kuila o ima ioso ia moneke ngó, kidi muene. Eie u tena ku kuatekesa o an’é phala kuidikisa o kidi mu ku bhana o kadivulu, A Origem da Vida​—Cinco Perguntas Que Merecem Resposta, ku tua tambula ku muvu ua 2010. O kadivulu ka mukuá, A Vida​—Teve um Criador?, o kadivulu kaka, ka kuatekesa o minzangala ku kala ni “kilunji kiambote.” (Jisa. 2:10, 11) O kilunji kiki, kia-nda kua kuatekesa phala kuijiia se o milongi ia xikola, ia kidi mba ia makutu.

¹⁸ O kadivulu A Origem da Vida, a ka bhange phala ku kuatekesa a mu di longa bhu xikola, phala ku tonginina kiambote o njimbu iene mu bhana a athu a zuela kuma o jingijiie, a sange ifuba ia iama, ilondekesa kuila o ima ia moneka ngó. Ia-nda ku a kuatekesa ué phala ku mona se ia mu zuela o jingijie kuila a tena ku bhanga mienhu mu jilabolatólio, kidi. Enu mu jitata, se enu mu longa ni kadivulu kaka, phala ku kuatekesa o anenu, ene ka-nda kala ni hele ia kulondekesa, mukonda diahi ene a xikina kuila, kuene mu bhangi ua kidi ua bhange ioso.—Tanga 1 Phetele 3:15.

19. Ujitu uahi u tuala nau?

¹⁹ O madivulu u tuene mu tambula mu kilunga kia Jihova, ene mu tu kuatekesa o kuijiia o ibhangelu ia iuka iala mu ngongo. O ima íii i tu mona, i tu kuatekesa o ku zukama kua Nzambi ni muxima uoso. (Jis 19:1, 2) Tuala ni ujitu ua dikota ua ku bhana kua Jihova, o Mubhangi ua ima ioso, o kijingu ni kiximanu kia mu tokala!—1 Tim. 1:17.