1. Ia aha no te papu e te puai noa ra to tatou faaroo?

 MEA rahi te taata e tiaturi noa ra i ta ratou e ite ra. E nafea ia tauturu ia ratou ia faatupu i te faaroo ia Iehova? Te na ô ra hoi te Bibilia e “aore e taata i ite i te Atua.” (Ioa. 1:18) E nafea ïa ia papu e te puai noa ra to tatou faaroo i “te Atua hiˈo-ore-hia” ra o Iehova? (Kol. 1:15) Mea faufaa ia ite na mua eaha te mau haapiiraa e tahuna ra i te parau mau no nia ia Iehova. Ia oti, e mea tia ia haapii i te faaohipa maitai i te Bibilia no te faaite e te patoi ra tera mau haapiiraa i “te ite i te Atua.”—Kor. 2, 10:4, 5.

2, 3. Eaha na haapiiraa e haapoiri nei i te taata ia ite i te parau mau no nia i te Atua?

² Teie te tahi haapiiraa hape e haapoiri nei i te taata ia ite i te parau mau no nia i te Atua: te haapiiraa o te tauiuiraa o te mau mea ora. Te patoi ra te reira i te Bibilia e aita atoa e horoa ra i te tiaturiraa i te taata. Ia au i teie haapiiraa, ua fa noa mai te ora mai tera. Te auraa ïa e aita e nehenehe e faataa no te aha tatou e ora ˈi.

³ Area te tahi mau taata faaroo, te haapii atu nei ïa e e tau tausani matahiti noa to te ao nui, oia atoa to tatou paraneta e te oraraa i nia iho. Te faatura nei ratou i te Bibilia, te parau nei râ ratou e ua titauhia i te Atua e ono mahana e 24 hora no te hamani i te mau mea atoa. Te patoi nei teie mau taata i te mau haapapuraa a te aivanaa o te ore e tu ra i ta ratou tiaturiraa. Te faahapa nei ïa tera haapiiraa i te Bibilia mai te huru ra e mea tano ore te reira. Te haamanaˈo maira ratou i te tahi mau taata o te senekele matamua o tei faaite i te itoito no te Atua, eiaha râ ia au i te ite mau. (Roma 10:2) E nafea ia faaite e mea hape teie na haapiiraa tei au i “te mau pare”? Maoti noa te faaitoitoraa i te noaa i te ite mau o ta te Bibilia e haapii ra.

4. Ia niuhia to tatou faaroo i nia i te aha?

⁴ Te haapii maira te Bibilia ia haafaufaa i te ite. (Mas. 10:14) Te hinaaro ra Iehova ia niuhia to tatou faaroo i nia i te haapapuraa e te haaferuriraa, eiaha râ i nia i te manaˈo taata aore ra te peu faaroo. (A taio i te Hebera 11:1.) Ia puai to tatou faaroo i te Atua, e mea tia ia papu ia tatou iho e te vai mau ra o ˈna. (A taio i te Hebera 11:6.) E tae tatou i tera faaotiraa a hiˈopoa ˈi i te mau haapapuraa e a faaohipa ˈi i to tatou aravihi i te feruri.

5. Eaha te tahi tumu e papu ai ia tatou e te vai mau ra te Atua?

⁵ Te horoa ra te aposetolo Paulo i te tahi tumu e papu ai ia tatou e te vai mau ra te Atua noa ˈtu eita e nehenehe e ite ia ˈNa. Ua papai Paulo: “Te mau mea hoi no ˈna e ore e tia ia hiˈo ra, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ˈna ra mana hope ra e te Atuaraa.” (Roma 1:20) E nafea ia tauturu i te hoê taata e feaa nei i te vai-mau-raa o te Atua ia tiaturi i ta Paulo i parau? E nehenehe oe e faaohipa i te tahi o te mau haapapuraa i muri nei no nia i ta te Atua i poiete o te faaite ra i to ˈna puai e paari.

6, 7. I roto i teihea na mea e piti e itehia ˈi to Iehova puai?

⁶ E itehia te puai o Iehova maoti e piti mea e paruru ra ia tatou: te reva mataˈi e te puai itea ore o te fenua. * Eita te reva mataˈi e horoa noa mai i te aho ta tatou e huti ra. Te paruru atoa maira te reira i te mau huˈahuˈa na te reva teitei o te nehenehe e tuino mau i te fenua. E pinepine te mau ofai rahi i te ura a ô mai ai i roto i te reva mataˈi. O te mau fetia pao ïa te nehenehe e itehia i te po.

⁷ Te paruru atoa maira te puai itea ore o te fenua. Te vai ra i ropu roa i te fenua te auri veavea tei tahe. E faatupu te reira i te hoê puai e ati aˈe te fenua e o te haere roa i roto i te reva teitei. E paruru mai tera puai i te mahana e i te mau paainaraa e tupu ra i nia iho o te faatupu i te mau hihi atâta mau no te fenua. I te mea râ e ua paruruhia to tatou paraneta, aita tera mau hihi e faaore ra i te ora i nia iho. Te rave nei hoi te puai itea ore o te fenua i tera mau hihi atâta mau aore ra te faahoˈi atu nei i te reira i roto i te reva teitei. O te mau ǔ rau nehenehe ïa e hautiuti ra i roto i te raˈi i pihaiiho i te mau Poro apatoerau e apatoa. E Atua “puai rahi e te mana rahi” iho â o Iehova.—A taio i te Isaia 40:26.

8, 9. (a) E nafea Iehova e aupuru ai i te ora i nia i te fenua? (b) Eaha ta te reira e haapii maira no nia i te paari o Iehova?

⁸ E Atua î i te paari Iehova. Tei itehia ïa i roto i ta ˈna i faanaho no te aupuru i te ora i nia i te fenua. A feruri na e te ora ra oe i roto i te hoê oire e mirioni taata. Ua haaatihia tera oire e te hoê patu. Eita e nehenehe e afai mai i te pape mâ i roto e e hopoi i te pehu e i te pape viivii i rapaeau. E hairiiri oioi mai tera oire a ore atu ai e nehenehe e ora faahou i roto. E au to tatou fenua i tera oire. Ua taotiahia te pape mâ e mea fifi ia afai i te mau pehu na te reva teitei. E nehenehe râ ta te fenua e horoa i tei hinaarohia no te ora, eita te reira e mou. No te aha? E nehenehe hoi ta te fenua  e faaohipa faahou i te mau mea atoa tei titauhia no te ora. Mea faahiahia mau!

⁹ A hiˈo na e nafea te fenua e horoa mai ai i te mataˈi ora. E miria taata e animara te huti ra i te mataˈi ora a faarue ai i te mataˈi ino. Noa ˈtu râ, te navai noa ra te mataˈi ora e eita e pau. No te aha? E faaohipa te mau raau tupu i te mataˈi ino, te pape, te hihi mahana e te mau mea maitatai no te horoa mai i te mau ito tihota e i te mataˈi ora. E parauhia te reira te photosynthèse. Ia oti, e huti mai tatou i te mataˈi ora a faarue atu ai i te mataˈi ino o te faaapî-faahou-hia aita e hopea. Te faaohipa ra Iehova i te mau raau tupu ta ˈna i hamani no te “horoa mai i te ora, e te aho.” (Ohi. 17:25) Auê ïa paari maere mau!

10, 11. E nafea te tahi pěpě e te vivi pape e faaite ai i to Iehova paari?

¹⁰ E itehia te paari o Iehova i nia i te animara e rave rahi ta ˈna i hamani. Ia au i te hoê maimiraa, te vai ra fatata e 2 mirioni tae atu i te 100 mirioni huru animara. (A taio i te Salamo 104:24.) E haapii oe no nia i to Iehova paari a hiˈopoa ˈi mea nafea vetahi o ratou i te hamaniraahia.

¹¹ A rave na i te pěpě parauhia monarque. Ua tia te faito o to ˈna roro i te faito o te periota i te hopea o teie pereota. Noa ˈtu râ, e nehenehe ta ˈna e rere i nia fatata e 3 000 kilometera mai Kanada ˈtu i te hoê uru raau taa ê i Mehiko. Maoti te mahana e ite ai ia ˈna te aveia tano e rave. I te mea e e tere te mahana, e nafea ïa o ˈna? Ua hamani Iehova i te roro nainai o tera pěpě ia ite o ˈna nahea ia haere noa ˈtu e e tere te mahana. A feruri atoa na i te vivi pape. Fatata e 30 000 hiˈo haihai to nia iho i to ˈna na mata taitahi. E taa i to ˈna roro te mau tapao ta tera mau hiˈo haihai e afai atu e te mau hautiutiraa iti roa e haaati ra ia ˈna.

12, 13. Eaha te mea faahiahia no nia i te hamaniraahia to tatou mau taoˈa tahi ora?

¹² Mea faahiahia ˈtu â ia ite mea nafea Iehova i te hamaniraa i te mau taoˈa tahi ora o te taata, te animara e te raau tupu. Ei hiˈoraa, fatata 100 tausani miria taoˈa tahi ora to to oe tino. E i roto i te taoˈa tahi ora taitahi, e itehia te tahi mea parauhia te ADN (acide désoxyribonucléique). Tei roto i te ADN te rahiraa o te mau haamaramaramaraa no te hamani i to oe tino taatoa.

¹³ Ehia rahiraa haamaramaramaraa to roto i te ADN? E faaau anaˈe i te haamaramaramaraa e vai ra i roto hoê tarama ADN i tera i nia i te hoê CD. E nehenehe te hoê titionare taatoa e tuuhia i nia i te hoê CD. Mea faahiahia mau, mea rairai roa hoi te CD! Mea rahi aˈe râ haamaramaramaraa i roto hoê tarama ADN i tera e tuuhia i nia hoê tausani miria CD!  Aore ra ia rave tatou i te hoê punu taipu nainai î i te ADN mǎrô, e nehenehe e hamanihia fatata e 2 500 miria taata maoti te mau haamaramaramaraa e vai ra i roto!

14. Eaha to manaˈo no nia ia Iehova a itea ˈi i te aivanaa te mau mea apî?

¹⁴ No te arii Davida, e au ra e ua papai Iehova i roto i te hoê buka te mau haamaramaramaraa atoa titauhia no te hamani i te tino taata. Ua parau oia: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe; i te mau mahana atoa te raveraahia, e aore roa te hoê i toe.” (Sal. 139:16) Ua arue Davida ia Iehova a feruri ai mea nafea to ˈna tino i te hamaniraahia. Te faahiahia ˈtu â nei tatou i te reira a itea ˈi i te aivanaa te mau mea apî no nia i te tino taata. E farii atu â ïa tatou i ta te papai salamo i parau: “E haamaitai au ia oe, ua taa ê hoi to ˈu hamaniraahia: e mea maerehia ta oe mau ohipa, e Iehova, eita hoi e moe ia ˈu.” (Sal. 139:14) E nafea ïa te taata e ore ai e ite i te Atua ora i ta ˈna i hamani?

15, 16. (a) Mea nafea ta tatou mau papai i te tautururaa i te taata ia haapii no nia i ta te Atua i poiete? (b) Eaha te tumu parau ta oe i au i roto “Mea poietehia anei?”

¹⁵ E rave rahi matahiti i teie nei te vea A ara mai na! i te tautururaa e mirioni taata ia haapii no nia i te Atua maoti ta ˈna i poiete. Ei hiˈoraa, teie te upoo parau o te vea reo Farani no Tetepa 2006 “E Atua Poiete anei?” Ua piahia teie vea no te tauturu i te taata e tiaturi ra i te haapiiraa o te tauiuiraa o te mau mea ora e i te tahi atu mau haapiiraa hape. Teie ta te hoê tuahine i papai i te Betela i Marite no nia i tera vea: “Mea au mau te opereraa o tera vea taa ê. Ua ani mai te hoê orometua e haapii nei i te ihiora e 20 vea ia fanaˈo ta ˈna mau piahi i te tahi.” Ua papai te hoê taeae: “Te poro nei au mai te hopea o te mau matahiti 1940 e fatata to ˈu e 75 matahiti. Ua au roa ˈtu â vau i ta ˈu taviniraa i teie avaˈe a pûpû ai i te vea taa ê o te A ara mai na!”

¹⁶ E itehia i roto e rave rahi A ara mai na! te tumu parau “Mea poietehia anei?” Te faataa nei teie mau tumu parau poto i te faahiahiaraa o te mau mea i poietehia e mea nafea te taata i te tamataraa i te hamani i te mau mea tei au i ta te Atua i poiete. I 2010, ua fanaˈo atoa tatou i te buka rairai La vie a-t-elle été créée? E tauturu mai te mau hohoˈa ia mauruuru atu â ia Iehova no ta ˈna i poiete. E tauturu te mau uiraa i te hopea o te tuhaa taitahi i te taata ia feruri no nia i ta ˈna i taio iho nei. Mea au roa ia faaohipa i teie buka rairai i roto i te pororaa.

17, 18. (a) Eaha te hopoia a te mau metua? (b) Mea nafea outou i te faaohiparaa i na buka rairai aore ra i te tahi atu mau papai no nia i te mau mea poietehia i roto i ta outou haamoriraa utuafare?

¹⁷ E te mau metua, ua hiˈopoa anei outou i teie buka rairai e ta outou tamarii i roto i ta outou haamoriraa utuafare? A na reira ˈi, e tauturu outou ia ratou ia tiaturi atu â i te Atua ora. E tamarii taurearea anei ta outou o te haere ra i te haapiiraa tuarua? Te hinaaro ra te feia e haapii ra i te tauiuiraa o te mau mea ora ia tiaturi ratou e aita e Atua Poiete. Te haapii nei te mau aivanaa, orometua, te porotarama afata teata no nia i te natura e te hohoˈa teata e e haapiiraa te reira niuhia i nia i te mau haapapuraa. E nehenehe outou e tauturu i ta outou tamarii ia paturu i te parau mau ma te faaohipa i te buka rairai Cinq questions à se poser sur l’origine de la vie tei matara mai i 2010. E tauturu atoa ˈtu te buka rairai La vie a-t-elle été créée? ia faaohipa atu â i to ratou feruriraa. (Mas.  2:10, 11) Aita tera na buka rairai na roto i te reo Tahiti, te vai ra râ na roto i te reo Farani. Mea maitai ia taio i te reira, e nehenehe ïa outou e tauturu i ta outou mau tamarii ia patoi i te haapiiraa hape o te tauiuiraa o te mau mea ora. E haapii teie na buka rairai ia ratou e nafea ia ite e ua tano anei tei haapiihia ra e te mau orometua. *

¹⁸ I te tahi taime, e faaite te mau parau apî e ua itea i te mau aivanaa te mau huˈahuˈa o te haapapu ra e mea mau te haapiiraa o te tauiuiraa o te mau mea ora. Aore ra ua itea ia ratou i roto i ta ratou piha maimiraa e ua fa noa mai te ora. Ua papaihia te buka rairai Origine de la vie no te tauturu i te mau piahi ia feruri e mea mau anei tera mau parau apî. E te mau metua, a faaohipa i teie na buka rairai no te tauturu i ta outou tamarii ia faataa ma te papu atu â no te aha ratou e tiaturi ai i te hoê Atua Poiete.—A taio i te Petero 1, 3:15.

19. Eaha ta tatou fanaˈoraa taa ê?

¹⁹ Mea rahi te nehenehe e haapii mai no nia i to Iehova mau huru maitatai nehenehe mau a taio ai i te mau papai a ta ˈna faanahonahoraa no nia i ta ˈna i hamani. E turai mai tera mau haapapuraa ia arue ia Iehova ma te aau atoa. (Sal. 19:1, 2) Auê ïa fanaˈoraa taa ê ia faahanahana ia Iehova, na ˈna hoi i hamani i te mau mea atoa!—Tim. 1, 1:17.