CHE túva ha che sy ojokuaa 1919-pe peteĩ aty guasúpe ojapo vaʼekue umi Estudiánte Internasionál de la Biblia Cedar Póintpe (Ohio, Estados Unidos), ha upe áñope voi omenda hikuái. Che anase 1922-pe, ha che ermáno Paul dos áño upe rire. Che rembireko Grace onase 1930-pe ha hógape enterovéva oservi Jehovápe. Itúva Roy Howell ha isy Ruth, oservíma vaʼekue Jehovápe ituvakuérandi voi. Hiʼarive, Grace avuelokuéra ermáno Charles T. Russell amígo vaʼekue.

Grace ha che rojokuaa 1947-pe ha romenda el 16 de julio de 1949. Roĩ aja de nóvio roñemongeta porã vaʼekue umi mbaʼe rohupytysévare Jehová servísiope. Rodesidi naorefamiliamoʼãiha ha roservitaha de tiémpo kompléto. El 1 de octubre de 1950 rojagarra ore prekursorádo ha 1952-pe roñeinvita roservi hag̃ua sirkuítope.

Grace ha che ropensa noroĩriha preparádo rokumpli hag̃ua ore asignasión. Añehaʼã aaprende umi ermáno iñexperiensiavévagui ha avei aheka oipytyvõ vaʼerã che rembirekópe. Upémarõ adesidi añemongeta Marvin Holien ndive. Haʼe ningo are guivéma ore família amigoite ha heta tiémporema oservi de superintendénte viahánte. Haʼe ermáno Hólienpe: “Grace ningo imitã ha ndoikuaái gueteri heta mbaʼe, ¿oĩne piko ikatu vaʼerã oipytyvõ chupe?”. Haʼe heʼi chéve: “Si, oĩ, ermána Edna Winkle ikatu oipytyvõ chupe. Haʼe heta áñorema oservi de prekursóra, hendive oaprendéta heta mbaʼe”. Añetehápe, heta mbaʼe oaprende ko ermána ndive. Upe rire Grace omombeʼu chéve: “Edna oĩ rupi chendive nachenerviósai apredika hag̃ua umi ogahárupi. Haʼe oikuaa mbaʼéichapa ombohováita umi hénte oporandúva, ha chemboʼe iñimportanteha ahendu chupekuéra aikuaa hag̃ua mbaʼépa haʼéta. ¡Añetehápe chepytyvõ aikotevẽ hagueichaite!”.

Roñeasigna mokõi sirkuítope oĩva estádo de Iówape, ha ore sirkuíto ojagarraʼimi avei estádo  de Minnesota ha Dakota del Sur. Upe rire rojeguerova Sirkuíto 1 Nueva Yórkpe, otokahápe avei Brooklyn ha Queens. Siémpre oremanduʼa mbaʼeichaitépa rokyhyje upe asignasióngui. Upérõ rovisita kuri kongregasión Brooklyn Heights, oñerreuníva pe Salón del Reino oĩvape Betélpe. Upépe oho heta ermáno oservímava heta áño Betélpe. Ajapopa rire pe primer diskúrso, ermáno Nathan Knorr ou cherendápe ha heʼi chéve: “Malcolm, nde ningo remeʼẽ oréve konsého roservi porãve hag̃ua Jehovápe, ha upéva iporãiterei. Aníke nderesarái, naorepytyvõiramo ne konsého rupive, saʼi ndedeprovéchota Jehová organisasiónpe. Rejapo porã hína nde traváho, esegíkena upéicha”. Opa rire pe rreunión amombeʼu Grácepe ermáno Knorr heʼi vaʼekue chéve. Grace ha che ningo orenerviosoiterei roikóvo kuri ore asignasiónpe, ha rog̃uahẽvo Betélpe pe koty rojospedahápe, hetaiterei orerasẽ.

Mése riremi, rorresivi peteĩ kárta roñeinvitahápe roho hag̃ua Eskuéla de Galaádpe kláse 24, oñemohuʼãtava febrero 1955-pe. Roho mboyve, ojeʼe oréve ko eskuéla ndahaʼéi orepreparátava katuete oiko hag̃ua orehegui misionéro, síno rokumpli porãve hag̃ua ore asignasión. Añetehápe rovyʼaiterei upépe, péro avei oremboʼe iñimportanteha ñanderekomirĩ.

Romohuʼã rire ko eskuéla, oremondo hikuái roservi hag̃ua distrítope. Ore territóriope oike Indiana, Michigan ha Ohio. Péro diciembre 1955-pe ermáno Knorr ogueruka oréve peteĩ kárta. Upépe heʼi: “Aipota peje porã chéve mbaʼépa pepensa. Aikuaase peservisépa Betélpe [...], térãpa peservise koʼápe peteĩ tiémpore ha upe rire peho ótro tetãme, térã pepytasénte pene asignasiónpe”. Ore rombohovái pe kárta ha roʼe chupe roservitaha oimehaichagua asignasiónpe. Ha sapyʼaitérõ g̃uarã orerenoikáma hikuái roho hag̃ua Betélpe.

Roservi aja Betélpe ajapo diskúrso heta kongregasiónpe ha umi asambleahápe ko tetã tuichakuére. Avei aipytyvõ umi ermáno imitãvévape ikatu hag̃uáicha upe rire oñemeʼẽve chupekuéra rresponsavilida Jehová organisasiónpe. Avei ambaʼapo ermáno Knorr sekretárioramo, pe ofisína oñeorganisahápe pe predikasión mundiál.

Chemanduʼa ningo heta avyʼa hague ambaʼapórõ guare Departaménto de Servísiope. Upépe ambaʼapo Thomas “Bud” Sullivan ndive, oĩ vaʼekue heta áñore de superintendénte upe departaméntope. Avei aaprende heta ermánogui, por  ehémplo Fred Rusk. Chupe oñenkarga vaʼekue chembokatupyry hag̃ua. Chemanduʼa gueteri aporandúrõ guare chupe: “Fred, ¿mbaʼére piko rekorrehieterei umi kárta askrivíva?”. Haʼe opuka ha heʼi chéve peteĩ mbaʼe chemopensáva: “Malcolm, ñañeʼẽ jave ñande rapichándi ikatu ñamyesakã chupe heta hendáicha upe jaʼeséva, péro jaskrivi jave, koʼýte ñamondóramo koʼágui, oñentende porã vaʼerã”. Ha upéi heʼi porãnte chéve: “¡Ani rejepyʼapy! Rejapo porã hína ne rembiapo ha rejapo porãvéta rehóvo”.

Roĩ aja Betélpe, Grace ombaʼapo heta hendápe, por ehémplo limpiésape, ha ogustaiterei chupe upéva. Koʼág̃arupi, rojotopa jave umi ermáno upérõ imitã vaʼekue ndive, pukahápe heʼi hikuái Grácepe: “Ermána, nde chepytyvõ vaʼekue aarreglakuaa hag̃ua che rupa, ha che sy ovyʼaiterei oikuaárõ guare upéva”. Grace ombaʼapo avei ótro departaméntope, por ehémplo Korréo, Rrevísta ha Produksión de Síntape. Koʼã traváho oipytyvõ chupe ohechakuaa hag̃ua tuicha mbaʼeha ñambaʼapo Jehová organisasiónpe, tahaʼe haʼéva upe asignasión jarekóva, ha haʼeha peteĩ vendisión. Koʼag̃aite peve Grace opensa upéicha.

Áño 1975 rupi, ore tuvakuéra ijedáma ohóvo ha oikotevẽma hikuái roñangareko hesekuéra. Rojecha peteĩ situasión ijetuʼuetereívape ha rodesidi vaʼerã mbaʼépa rojapóta. Ndorohejaseieterei ningo Betel ni ore amigokuéra oĩvape upépe, péro roñatendémante vaʼerã ore tuvakuérare, upéva ore rresponsavilida. Upémarõ rosẽ Betélgui ha ropensa ikatuha roju jey upe rire okambiáramo ore situasión.

Roñemantene hag̃ua añepyrũ avende segúro umi ogahárupi. Ndacheresaráiri voi peteĩ supervisór heʼírõ guare chéve aĩrõ guare de pruéva: “Ko negósio odepende umi visíta ojejapóvare kaʼaruete. Upe órape jajuhuve umi héntere. Ha upe jave ñaime vaʼerã hogakuérape, ndaipóri mbaʼeve iñimportantevéva upévagui”. Upémarõ haʼe chupe: “Aikuaa ningo nde reguerekoha experiénsia koʼã mbaʼépe, ha arrespeta upéva. Péro areko avei rresponsavilida Ñandejára renondépe arakaʼeve namboykéiva, ha nañepyrũséi ajapo upéva koʼág̃a. Oĩ pyhare ikatutahápe ambaʼapo, péro martekue ha juevekue areko rreunión iñimportantetereíva”. Jehová tuicha chevendesi ndafaltái haguére rreunionhápe che traváho káusare.

Che sy omano julio 1987-pe peteĩ lugár oñeñangarekohápe umi ijedávare. Ore roĩ kuri hendive upérõ guare. Umi enferméra héfa oñemboja Grace rendápe ha heʼi chupe: “Ña Allen, terehóna nde rógape ha epytuʼuʼimi. Enterovéva ningo roikuaa nde siémpre reime hague nde suégra ndive  oikotevẽ jave. Ani rejepyʼapy, nde ningo rejapo kuri ikatumíva entéro”.

Upe áñope voi, diciémbrepe romyenyhẽ pe solisitu roho jey hag̃ua pe lugár rohayhuetévape, Betélpe. Péro upe riremínte, umi doktór heʼi Grace orekoha kánser de kólon. Upémarõ ojopera, ha ojerrekupera rire iñoperasióngui, ojeʼe oréve okueraha pe kánsergui. Upe aja og̃uahẽ peteĩ kárta sukursálgui ojeʼehápe oréve rosegínte hag̃ua roservi ore kongregasiónpe. Ore rodesidi roiporupaitetaha ore tiémpo predikasiónpe.

Tiémpo riremi oñepresenta chéve peteĩ traváho Téxaspe. Upépe ningo hakumie ha ou porãta oréve, upémarõ rodesidi rova. Koʼág̃a ojapóma 25 áñorupi roservi hague koʼápe. Umi ermáno imbaʼeporãiterei orendive ha hetáma oreamígo.

Grace oreko kuri kánser de kólon, kánser de tiróides ha ramove katu kánser de máma. Péro arakaʼeve ndojekehái oiko haguére hese koʼã mbaʼe. Haʼe ningo peteĩ tembireko iguápava ha siémpre chepytyvõ ipyʼaite guive. Heta vése, oñeporandu jave chupe mbaʼéicha rupípa rovyʼaiterei oñondive ha rojogueraha porã, haʼe heʼi cuatro mbaʼe: “Malcolm cheamigoite, roñemongeta meme, rohasa tiémpo oñondive, ha roiko vai jave, rosolusiona ore provléma roke mboyve”. Sapyʼánte ningo roiko vaiʼi mimi, péro roñehaʼãmbaite roñoperdona ha oreresarái upe oiko vaʼekuégui. Upéva orepytyvõiterei.

Koʼã mbaʼe roaprende rombohováivo umi provléma:

1. Ani jajerovia ñandejehe, síno jajerovia vaʼerã Jehováre ha jaasepta umi mbaʼe haʼe ohejáva jahasa (Prov. 3:5, 6; Jer. 17:7).

2. Tekotevẽterei jasegi la Biblia heʼíva ha ñaneñeʼẽrendu Jehovápe, tahaʼe haʼéva la situasión. Jajedesidi vaʼerã: ñaneñeʼẽrendútapa Ñandejárape térã nahániri (Rom. 6:16; Heb. 4:12).

3. Ñañemoĩ porã vaʼerã Ñandejára ndive, ndaipóri mbaʼeve iñimportantevéva upévagui. Ñamotenonde vaʼerã Irréino, ani umi mbaʼerepy (Prov. 28:20; Ecl. 7:1; Mat. 6:33, 34).

4. Jajerure vaʼerã Ñandejárape tañanepytyvõ ñambaʼapo meme hag̃ua iservísiope. Jajesareko vaʼerã umi mbaʼe ikatúvare jajapo koʼág̃a, ani ñañekevranta umi mbaʼe ndaikatúivare jajapo (Mat. 22:37; 2 Tim. 4:2).

5. Ndaipóri ótra organisasión Jehová oguerohory ha ovendesíva (Juan 6:68).

Grace ha che aréma roservi hague Jehovápe, ojapóma 75 áño rasa káda uno. Ha haimetéma 65 áño roserviha oñondive Jehovápe. ¡Añetehápe koʼã tiémpo ohasa vaʼekue ndaijojahái! Roñemboʼe ningo ore ermanokuérare oĩva ko múndo tuichakuére ikatu hag̃uáicha ohupyty avei heta mbaʼe porã ojerovia rupi Jehováre.