WUONWA noromo gi minwa e higa 1919 e chokruok mar Joneno mag Jehova ma noriwo pinje e dala mar Cedar Point, Ohio, e piny Amerka. Mano e higa ma ne gikendoree. An ne onyuola e higa 1922, to Paul owadwa ne onyuol higini ariyo bang’e. Grace jaoda ne onyuol e higa 1930. Jonyuol Grace, Roy kod Ruth Howell, nodongo ka gin Jopuonjre mag Muma, kendo dane gi kwargi bende ne gin Jopuonjre mag Muma kendo osiepe Owadwa Charles Taze Russell.

Naromo gi Grace e higa 1947, kae to wakendore Julai 16, 1949. Kane pok wakendore, ne wabet piny gi Grace ma wawuoyo adimba kuom ngimawa ma kinde mabiro. Ne wang’ado mar tiyo ne Nyasaye gi thuolowa duto kendo bedo maonge nyithindo. Ka nochopo Oktoba 1, 1950, nwachako lendo ka wan jopainia mapile. Ka nochopo higa 1952, noketa jarit-alwora.

Waduto ne wafwenyo ni ber ka okonywa mondo watim migawo marwa manyienni. Sama ne amanyo kony kowuok kuom owete molony, ne amanyo kaka ne inyalo kony Grace bende. Nawuoyo gi Marvin Holien, ma ne en osiepna chakre chon kendo mosebedo jarit-alwora kuom higini mang’eny, ma apenje kama: “Grace pod tin kendo oonge gi lony. Be inyalo manyonee ng’at ma ginyalo tiyogo kanyachiel kuom kinde moko mondo otiegre? ” Marvin nodwoko ni “Ee, Edna Winkle jatimo painia kinde ka kinde kendo nyalo konye ahinya.” Bang’e Grace nowacho kama e wi Edna: “Edna ne miyo abedo maonge gi luoro kawachopo e dhoot, nong’eyo wuoyo gi joma kwedo, kendo nopuonja kaka anyalo chiko ita malong’o ne wuon ot mondo ang’e kaka anyalo konye. Ka kuom adier, nokonya ndi! ”

An gi Grace ne watiyo e alwora ariyo mayudore Iowa, kaachiel gi bath Minnesota kod South Dakota. Bang’e ne omiwa migawo e alwora mar New York Circuit 1, ma noriwo gwenge mag Brooklyn kod Queens. Wiwa ok nowil gi  kaka ne wawinjo e chunywa ni onge gima wang’eyo e migawono. Alworano noriwo Kanyakla mar Brooklyn Heights, ma ne timo chokruoge e Od Romo man Bethel kendo noting’o jood Bethel mathoth ma nigi lony. Bang’ golo twak mokwongo e juma mar limbe e kanyaklano, Owadwa Nathan Knorr nobiro ira mowachona niya: “Owadwa Malcolm, imiyowa puonj mowinjore ahinya kuom gima onego watimie lokruok. Ng’e ni kapo ni ok imiyowa siem kata paronwa kuonde monego watimie lokruok, to kare ok ikony riwruogni kaka owinjore. Dhi nyime gi tich maberno.” Bang’ chokruok nanyiso Grace wachnno. Bang’e ne wadhi e ot ma nomiwa e wi gorofa e Bethel. To nikech kibaji mang’eny ma ne wan-go, ne waywak.

Bang’ dweche matin, ne wayudo barua magwelowa mondo wadhi e Skund Gilead e klas mar 24, ma ne idhi tiek Februar 1955. Ne onyiswa motelo ni tiegruok ma ne wadhi yudo e skundno ne ok en mar ikowa ne tij bedo jomisonari. Kar mano, ne idhi tiegowa mondo wabed jorit-alwora ma nigi nyak maber. Dhi e skundno nomorowa ahinya, kata kamano nomiyo wabolore ahinya.

Bang’ tieko tiegruokno, ne omiwa migawo mar bedo jorit-distrikt. Distrikt marwa noriwo Indiana, Michigan, kod Ohio. Kae to gima ne wamedo wuoro en ni ka nochopo Desemba 1955 ne wayudo barua mowuok kuom Owadwa Knorr mawacho niya: “Akwayou mondo unyisa adier mowuok e chunyu. Duher biro kendo dong’ Bethel kae. . . koso duher ni bang’ bet matin e Bethel to udhi e migawo e piny machielo? To bende ka duher dong’ e tij distrikt, kata bedo jarit alwora, daher ng’eyo.” Ne wadwoke ni dwaher timo migawo moro amora ma ne idhi miwa. Mapiyo bang’ mano, nonyiswa ni wadhi Bethel!

Migepe ma ne mora ahinya ka an Bethel noriwo golo twege e kanyakla, golo twege e chokruoge mag distrikt koda mag alwora kuonde duto e Amerka. Nakonyo tiego rowere mang’eny machwo, ma bang’e notimo migepe mamoko madongo e riwruok mar Jehova. Gikone ne abedo jagoro mar Owadwa Knorr e ofise ma ne ichanoe weche duto motudore gi tij lendo e piny mangima.

Tich ma ne omora moloyo ne en tiyo e Migawo Mochung’ne Tije Lendo. Kane an e migawono, ne watiyo gi Owadwa T. J. (Bud) Sullivan. Owadwa Sullivan noyudo osetiyo kuom higini mang’eny kaka jarit matayo migawono. Kata kamano nitie jomoko bende ma ne apuonjora mathoth kuomgi. Achiel kuomgi ne en Owadwa Fred Rusk, ma ne  omi migawo mar tiega. Anyalo paro ni napenje kama kinde moro: “Fred, ang’o momiyo ijaloko weche moko manie barupe masendiko? ” Nonyiera, kae to owacho wach moro ma noyawo pacha. Nowacho niya: “Malcolm, sama iwacho gimoro gi dhogi, wachno inyalo lero gi weche mamoko. To sama indiko wach moro, to ahinya wuon kowuok e migawowani, onego owinjre maler kendo oting’ weche duto madwarore.” Kae to nowachona e yo mang’won niya: “Kik iluor, tiji ler kendo bang’ ndalo, ibiro dhi maber.”

Kuom higini mang’eny ma Grace nobedogo e Bethel, noyudo migepe mopogore opogore, moriwo timo ler e udi mag jood Bethel. Nohero tijeno ahinya. Kata mana sani, ka waromo gi owete ma ne pod rowere e higinigo, pod ginyisoga Grace gi ilo niya: “Nipuonja pedho otanda kendo mamana mor sidang’ kuom gima ne itimonano.” Grace bende notiyo e migepe mag Gasede, Barupe, koda e migawo maloso tep miwinjo (Tape Duplicating Department). Tiyo e migepego duto nokonye neno ni kare migawo moro amora ma watimo e riwruok mar oganda Jehova, en gweth. Grace pod winjo kamano e chunye.

E higini mag 1970, ne wafwenyo ni jonyuolwa makoro oseti, ne dwarore omi rit. Gikone, nochuno ni nyaka watim yiero moro mapek. Ok ne wadwar wuok Bethel ka waweyo owete gi nyiminewa ma ne wahero ahinya. Kata kamano pod nawinjo e chunya ni ber mondo wadhi warit jonyuolwa. Kuom mano bang’ kinde, ne wawuok Bethel ka wan gi geno ni chieng’ moro dipo ka waduogo.

Mondo omi wayud kaka ne wanyalo konyore e weche mag pesa, nachako tich gi jo Insuarans. Wiya ok nowil gi gima maneja moro nonyisa sama pod ne gitiega niya: “Tijni ber ahinya kitime seche mag odhiambo. Mago e seche minyalo yudoe ji. Gimaduong’ en ni nyaka imany ji odhiambo kodhiambo.” Nadwoke niya, “Gima iwachono en adier nikech in gi lony e tijni. Kata kamano, an bende an gi ting’ moro kaluwore gi weche mag lamo, mapok najwang’oga nyaka nene, to ok daher ni achak jwang’e sani. Abiroga dhi manyo ji godhiambo, to mak mana ni chieng’ Tich Ariyo gi Tich Ang’wen, to an gi chokruoge moko madwarore ni nyaka adhie.” Adier, Jehova nogwedha ahinya nikech kinda mar dhi e chokruoge maok abara.

Mamana ne otho e osiptal e dwe mar abiriyo higa 1987 kane warite. Jatelo ma ne ochung’ne kar rito jotuwono nonyiso Grace kama: “Mikayi Allen, yie idhi dala koro idhi iywe. Wang’eyo kaka isekedo matek ka irito dau. Yie ibed gi paro mokuwe kendo ing’e ni ne isetimo duto minyalo.”

Ka nochopo Desemba higa 1987, ne wapong’o fom mar dok tiyo Bethel. Kata kamano, bang’ odiechienge moko matin, ne ofweny ni Grace  nigi tuo mar kansa. Bang’ ka nosetimne yeng’o ma ochango maber, kansano norumo chuth. Bang’e nwayudo barua mowuok e ofis ka kwayowa ni pod wamed dhi nyime lendo e kanyakla marwa. Ne wang’ado mar dhi nyime gi lando wach Pinyruoth.

Bang’ ndalo, nayudo tich machielo Texas. Ne wayudo ni Texas ne en piny maliet mowinjore kodwa, to adier alworani ber kodwa. Wasedak Texas kuom chiegni higini 25 kendo wadak gi owete gi nyimine moherowa sidang’.

Grace osebedo ka kedo gi kansa mopogore opogore, to kendo nyocha oyud in en gi kansa machielo mar thuno. Kata kamano, pok oywago ang’e e yo moro amora kata kwedo chenro mar wich kaka Jehova noketo. Ji osebedo kapenje niya, “Ang’o mosekonyou mondo udag gi kuwe kendo gi mor kamano? ” Ojanyisogi gik moko ang’wen: “An gi jaoda wan osiepe mati mata. Wajowuoyo seche duto kendo pile kapile. Wahero dhi bayo kanyachiel kinde ka kinde. Kendo ok wajodhi nindo kapo ni achiel kuomwa iye pod owang’.” En adier ni seche moko wajochwanyore, to kapo ni mano otimore to ng’ato ka ng’ato ng’wonone nyawadgi kendo timo kamano osekonyowa ahinya.

Nitie gik mang’eny ma wasepuonjore kokalo kuom tembe mathoth moseyudowa:

1.  Gen kuom Jehova kinde duto kendo yie gi gik moweyo mondo otimre. Kik iket geno kuom lony mari iwuon.​—⁠Nge. 3:​5, 6; Yer. 17:7.

2.  Luw gima Jehova wacho kokalo kuom Muma kata bed mana ni en wach mane machandi. Winjo Jehova kendo luwo chikene en gima dwarore ahinya. Ng’ato ok nyal chung’ diere, nyaka oyier kabe obiro luwo chike Jehova kata ooyo.​—⁠Rumi 6:​16; Hib. 4:​12.

3.  Nitie gimoro achiel maduong’ moloyo duto e ngima dhano. En loso nying maber gi Jehova. Ket timo dwache ema obed mokwongo to ok manyo mwandu mag piny.​—⁠Nge. 28:20; Ekl. 7:1; Math. 6:⁠33, 34.

4.  Lam Jehova mondo okonyi ibed gi nyak kendo itim duto minyalo e tije. Ket pachi mana kuom gik minyalo timo to ok kuom gik maok inyal timo.​—⁠Math. 22:37; 2 Tim. 4:2.

5.  Ng’e ni onge riwruok moro amora machielo ma Jehova gwedho kendo oyiego mopogore gi mareni.​—⁠Joh. 6:​68.

An gi Grace wasetiyo ne Jehova kuom higini ma koriw to okalo 75, to chakre wakendre wasetiyo ne Jehova kuom higini madirom 65. Adiera en ni waseyudo mor mogundho ka watiyone Jehova kuom higinigo duto. Wageno kendo walamo ni owetewa gi nyiminewa duto bende biro fwenyo kaka keto geno kuom Jehova miyo ng’ato yudo gweth mogundho e ngimane.